你好,欢迎来到文山苗族网!
当前位置: 网站首页  >> 苗文空间  >> 文章作品  >> 查看详情

苗文空间

推荐文章

    暂无信息

NAF YEUF BANGX DEUS LANGS NTRAD HMONGB

来源: 文山苗族网  日期:2019-04-24 13:06:23  点击:2476  属于:文章作品
杨庭书(Ndeud yangx

Xongt 2018 lob 10 hlit shab 1, god mol dous gud dix drout Bangx Deus deb raol Kob Mof. Muax ib hmaot, god but zos dangs hmaot, hnaod ib lob shuab ghenx ndraod uat ngongd yenl duax, uat god zhif tlend dlangb ndob. Huaf gat, mid juat nzheux nzas drout shout khaod draik, ghas hlit gangx ndris, nblongx ndongt nzongd vouf dluab yaox yox yenl. Uat rongt nongs rangx ghenx yaos chuab dak:
Dit lad zhad, dit lad zhad,
Ngoux hnob bongb,
Zhit muax ndox, cab buat xongt.
Ndrous hlit draod,
Zhit muax deb, cab buak nax.
Des nox shenk, des nox shenk.
Ndox bual dangl, mol juax ndrangs
Zhit muax Hmongb,
Deb nzongs leuf, mol juax ndos,
Zhit muax Nzhongs.
Dit lad zhad, dit lad zhad.
Rangx ghenx nzend mol nzend lol dob yaos chuab let gat, sex chuab zos ndox sangb bof ged ruas. God sangd dak:Daof did yaos lenx dus ned, jat god sheud mol shaib shaib! Tlat pleud shout qeut, keuk ngouk zox puaf nzuad muas ndob raos dlex, aob shaot shaot lob plot, uat ndat shout nghangx, god jeuf zaox dreud lob shuab ghenx mol ntrad. Mol zos daof njoux raol lob naf changd buaf dlangd dlangd, bof ib dol naf yeuf bloub hout dleub bous ncod pongd, nzhex muas jeuk neux, nbuad dreud ib drangb ghenx chuab zhit zhes.
God nos dak: “Naf yeuf, gaox let ghenx chuab dout rongt hend max. Ek gaox yaos nyaob khaod dus duax let lak, yuad mol leuf khaod dus ?
“Lenx dob, god nyaob nox shuat deb daof bel duax, yuad mol leuf nox shuat deb daof dous nid .naf yeuf deb dak.
“Ox yaos let. Naf yeuf, god nongs gaox lob shuab ghenx bongb bongb shab, hlaik shab hlaik nzhuk, yaos wef let jangl ned?
“Lenx dob, wef god duax zos nox shuat deb daof dous, mol leuf juax ndrangs ek Hmongb dub zhit muax dangl, mol leuf juax ndos, Hmongb dub zhit bof muax ib dos, cax bongb dangl god lox shab nzhik bleud nid.
“Naf yeuf, uat jangl yuad dak zhit bof ib dol Hmongb nat ox! Zhit haik bef khaod, dangb yaos nyaob beb Bangx Deus deb tab Ndol Dlex Lab aob lob deb qeuk nat, zhit guangd yaos daox drongb houd hangd lak shik yaos ghangb gab houd langs, khaod dus dob muax Hmongb max. Gaox zhit nzhens, hnob nad god yuad mol Bangx Deus langs uat khuat, jat god jaox gaox mol nghuaf ib ras kut Bangx Deus, gaox yuad dout bof ndout dol Hmongb.
God tab naf yeuf mol bongb ngouk houd Bangx Deus langs, zhos bof dex duab nens nbout sit suk nbaox ghaib, haik lol nchot ghens suk ghangd lax. Njis dangl aob beb rangx kut, naf yeuf nos dak:“Lenx dob, uat jangl dub zhit bof ib dos hnangd chaot Hmongb, lak zhit hnaod ib lot shuab lol Hmongb nid, ek gaox haik let Hmongb nyaob khaod dus?
“Hex hex~~~,naf yeuf, yaos hod langs nad Mangb Shuad ndout leuf, god lak zhit boub dol dus yaos Hmongb leuf lak. Jat god jaox gaox mol daof lob qeut muas Hmongb dab chaot, gaox yuad bof drous ndout dol Hmongb.god deb dak.
Beb aob dos zhas mol tlout aob beb rangx kut, bof ib naf lob zhed shab shab muax gouf ndout cenx. Njet zos dif aob cenx ntangb, bof dex Hmongb dab chaot dlait lab vaos ib nghangs nghangs. God dak: “Naf yeuf, gaox buak bof lak? Jaod box yeus gus nyaob khaod nad muas dab chaot nat ib huaf yaos Hmongb ax.
“Ek mex buak yaos Hmongb das?naf yeuf nos dak.
“Beb yaos Mongb nak.buab deb uat ros reul.
“Ek mex yaos Mongb, zhit yaos Hmongblak? Mongbyaos zhangd nens dus?
God gangd jend ndros naf yeuf haik: “Naf yeuf, Mongb jeuf yaos Hmongb lak, aob xongt nat las buab ndout shuf dob yaos uat nad hot.
Naf yeuf zhit dous god, draod nos laos buab dak:“ Uat jangl mex zhit hnangd Hmongb rangf zhongl?
“Ek~~~hex hex, naf zhit rongt uat nof ek, beb zhit hnangd lak. Dangb guas beb zhit hnangd lak muax duab nens hnangd max, beb muas drout las buab hnangd nid.
“Uat let buab dab chaot nat jaod dus yaos Hmongb shib let, jaod dus yaos Hmongb nzhuab let, jaod dus hat yaos Hmongb dleub let?
“End ~~~Naf yeuf, nax xongt nat lenx dus hax yuad faib dex gat!
Zhenf haik dreud, ib dol mid nyuas dob shaib lol zos muax aob beb xongt nyaod let, tlat tlat lol duad ngouk ib dol yeus Hmongb lob ngheuk chaot haik dak: “Bat, god yuad naox tangx.
“God mangx zhit yenx, mol ndros gaox nait yuad.Dol yeus Hmongb deb.
Naf yeuf ib plot zhit dout ghangb hout let nos god dak: “Dolbattab dol nait nat yaos dlangb zhit nid?
“Naf yeuf, bat yaoszid, nait jeuf yaosbos lak, nil nat las buab dob dreuk Shuad hot leuf lak. Naf yeuf nongs god haik let, plot bual dangl, nzhex muas zhouk nab suk lob ndox yuad lol nangs.
Bof naf yeuf suk let, god dak:“Jaix nyongs chaob dob lak, naf yeuf beb mol gangd god dol dix lous yif lob ndenl jeud, hnob nat nil ghuat ncaik.God jangb dreud naf yeuf del chaot muab nil ndas mol.
Mol zos lob ndenl jeud, dex duab nens gus duax houk jeud ndrongt ndul suk nzhouf ngangs. Dol voud chab hnangd ib jet zaix ndrous renl, bloub hout fongt dlangx rab, ib yod ntat lol nbos dangl ib caik khaod muas, hax qeuk ib shangb khaod nzhex, jaox ib lob nbod nzhex nzhuab sab. Dol ngoux nyangb chab hnangd ib jet dab chaot Shuad dleub bous uat ncuad yenl, lob plot dleub trub juas npongt choud, deud muas fongt dlob njab. Ngeuf ib dos duax ib shangb duad dreud ib lob blab dlangd muax beb dlot let, hod blab ndruab dreud yenb tab tangx dex cuat yangf nat, luas ncit daol zaik dex khuat duax houk jeud.
Khaod nad buak yaos nil yis let zhed?naf yeuf nos dak.
“Zhit yaos, naf yeuf. khaod nad yaos hod ndrongs nat ib lob zhed naox maod, las buab yaos duax ndeuf nat bangf jeud sub.
“Uat let zhit hnangd Hmongb zhongl chaot, lak zhit yuad bet naf zid gud dix nenx zhangt lak?
“Naf yeuf, huaf nat nil buab dreuk nenx nyongs chab leuf lak.
Naf yeuf hnaod god haik let, uat nzhex muas bek ruad, guat muas dend yenl, dis hlaot jed traik drox jeuf mol. God gangd jend zaox nil ghangb, get mol get nos dak: Uat jangl lak naf yeuf?
“Bongb shab hend, god yuad mol lak.
“Uat jangl yuad bongb shab nik, uat jangl haik dob yuad naox maod let mol max.
“Hmongb zox jit bongb zos zix ndos nad, Hmongb yuad zhof dot nongb leuf, god naf yeuf maob shab hend, naox zhit nghel nghaol zhit mol, god hax shik mol lak.
“Naf yeuf, uat let gaox yuad mol leuf drox deb dus? Lob ndox lak zhenf nzod tab, taod gaox ndout nyaob ib zhangf, god dout ndout nongs gaox khuab khat.
“God yuad mol leuf ghangb ndox kub, ndox dleb ged njuat nded, god hax shik mol lak.
Haik dangl,naf yeuf muab drangb ghenx nbuad hod njoux, uat shuab ghenx ndangt yenl bongb shab nzhis, get chuab get tlat blox longs drout daof ged nkhouk leuf.

 

文山苗族网
主办:文山州苗学会
站长:张元奇
手机:15308766544
电子邮箱:464402767@qq.com