设为首页 加入收藏

用户注册· 联系站长 · · ·

>> 您现在的位置: 文山苗族网 HMONGB BANGX DEUS DEB >> 苗学研究 >> 学术论文 >> 正文
 
 

Ntuad Khat Ndeud Hmongb 60 Xongt Khaod Uat Dout

文山苗族网 HMONGB BANGX DEUS DEB·[2017-11-5 15:07:50]

 

纪念川黔滇方言苗文推行60周年座谈会”论文选登

 

Ntuad Khat Ndeud Hmongb 60 Xongt Khaod Uat Dout

Tab Khaod Zaik Nzhib

熊玉有(Zhud Yaob Hmaob

 

Nzhab lol: Haik zos ndeud Hmongb ntuad khat dout let jangl, zix ndeud Hmongb zhif deuf lol, uat dout ndout yangf dlex nof, bangb ceub dout Hmongb lob nenx mol leuf drox druaf lox. Dangb shik lal zaik nzhib ndout yangf kuab del kuab deuf, yuad dout nbangx dleuk nbangx kot, ceub guas ndeud Hmongb ntuad khat mol dleb.

Lol ndeud yuad jend: ndeud Hmongb, ntuad khat, uat dout

 

    Zix Zhenf Fud bangb zhif dout Ndeud Hmongb lol zos nil nat, ntuad khat ndeud Hmongb dout muax 60 xongt leuf.Nyaob touk lob jaix ntuad khat ndeud Hmongb bod 60 xongt nat, zhif nyaos beb dis lol nzhat shaib ntuad khat ndeud Hmongb khaod uat dout rongt let jangl? Khaod zaik nzhib yaos dlangb zhit? Boub zos dex nat, beb let dous nyaos dout yangd ged mol daof ndex. Ndeuf nat, god sangd muab khaod god bof haik deuf lol, taod duaf cix bangb deut khat, guas ceub nyaos dout beb zox ged ntuad khat ndeud Hmongb mol dout rongt, mol dout njangx.

    Ib  Khaod Uat Dout

    Nyaob jex Dangd tab zhenf fud maob shab bangb ceub, nyaob jex ndout lenx guk zox guk ndeud shid ros, ntuad khat ndeud Hmongb 60 xongt lol, god bof dak khaod uat dout muax ndout yangf.

    1.Buad taid dout Hmongb lob ndas dos shid tab hlob hlangd yol lol yol ndeud.

    Gox juab zox jait zhux deb qeut haik dak: Cuat haid nens dob muax jait yeux shab shid tab hlob hlangd yol lol yol ndeud. Dangb shik yaos zhit muax ndeud, zox jait nat zeuf shid zhit dout zouk. Zhaot jait drout gaox, gaox lal uat zhit dout dlangb zhit. Zix zhif dout ndeud Hmongb lol, beb muax ndas dos ndros cuat haid nens ib yangf, dout ged shid yol lol yol ndeud, zhit drous las shaib zhit doul, lal shik ghuab yuaf zhit bob shid beb lol beb ndeud. Muax dex zhenf zeux shid lol Hmongb ndeud Hmongb haik bloub ndouk nos tab.Khaod nat yaos ib khaod muax nghet lox drout beb haid duab nens. Uat ib haid duab nens, shid zhit dout yol lol yol ndeud, yaos ib zox ged zaof nyif, ged kuk shab. Nil nat, beb zhit muax khaod nat leuf.

    2.Ceubnghangt dout beb Hmongb dous mol zox ged nenx rongt.

Ib haid duab nens, zhit muax ndoub zhit muax ndeud, uat nenx zeuf suk dol dlis muas, zhit boub mol pangb dus tab uat let jangl. Zheus xongt zheus daf,yol zhos bof ndeuf yol sob ndas, zhit zeux shout keuk ged boub dangb, khuab khat zhit dout yol duab nens, nenx nyongs bongb ghangb zaof nyif nzhuad. Yaos muax ndeud leuf, beb shout nyaos dout beb ged tlout njot jat, sangt nyaos dout mongt mol dleb, muax ged khuab ged geuf, shik boud dout zhud yif, ged zeux ged nzhet ntuad dlangd duax, cuat yangf hlob hlangd huaf wangf lox, beb lob nenx let zeux rongt. Nil nat, beb shid dout ndeud Hmongb sangt mongt, shik tangf tab njot cuat zhangd cuat yangf. Beb lob nenx zeuf dak zhit dout rongt zouk, lal yuad rongt dluat touk nzod leuf. Haik dout dak zix muax ndeud Hmongb lol, Hmongb lob nenx njet leuf ib gheb shab.

    3.Zheb khat dout Dangd tab zhenf fud gangb ged zhud yif tab zox jit bangx del.

    Zhangt sod dongx juat haik lol Hmongb, caik lol Hmongb dluab sob,zhif qeut dot luaf ndeud Hmongb, muab Dangd tab zhenf fud dex zhud yif, dex zox jit bangx del ndout yangf caik uat ndeud Hmongb luaf deuf, khat dout beb Hmongb boub ndout yangf. Suk let cif zhangt lob nenx rongt cix cuat, uat zos Zhongb Gox nbout shuad, jif huaf yos nyuas, fangx taid maob aif zib,sangt dob ncaik geuf ndeud dex nat, uat drout beb Hmongb lob shab ntuad ncend, duaf cix duax shab laos dous uat Dangd tab zhenf fud dex zhud yif, shid zox jit bangx del uat ghongb uat longt, uat langs uat luaf, ceub dout lob nenx traik druaf lox.

    4.Shout keuk dout Hmongb dex ghob zox ghob jit.

    Hmongb zeuf nyaob shout ndax deb nat, zhif dout ndout yangf zox jit rongt, suk let lol ndrual, ngoux, bangx lol, mid zid, gangb chongb ged gol,rangx ghenx rangx njangk ndout yangf. Dex zox jit nat muab ndeud Shuad shout zhit dout. Muax ndeud Hmongb leuf, muab ndeud Hmongb shout let keuk nyaos dout dex zox jit nat jat. Nil nat, dob keuk shout tab luaf deuf muax Khuab Get, Lol Ndrual Hmongb ndout yangf. Dex ndeud nat, duad nyaos dout beb dex zox jit muax nyaob nghel mol,keuk drout dex duab nens daof ghangb dout geuf dout boub.

    5.Ceud zhif dout Hmongb dex zox jit chab.

    Zhit muax ndeud shout, beb zhos zeux muab lob shab njot keuk dex ghob zox ghob jit, ib dos haik zhenf zeud leuf ib dos. Muax ndeud Hmongb leuf, beb zhit dangb shout keuk dout dex ghob zox jit, zhenf ceud zhif dout dex zox jit chab tab. Suk let ngoux, dluat leuf dex ghob, Nqaid Yenx Dlob tab Qix Nyangb dex rangx Beb Lob Nbet Hot Uat Hmongb tab Kend Langf Gaox Yaos Ib Dred Bangx, hot ndraod cuat khaod cuat qeut. Beb zhenf zhif muax xangf shenb, xaod pind tab caik dout ndout rangx dluab sob haik lol Hmongb. Dol buad lal muab ndeud Hmongb shout ndeud zox ndout rangx. Zhit muax ndeud Hmongb, beb yuad zhit muax dex zox jit chab nat.

    6. Dot yos dout ib pub dob zeux dob nzhet

    Khaid nyik zhif dout ndeud Hmongb, dex qeut dlex nof zeuf shaib hnyangd tab maob shab khuab khat guk ndeud Hmongb, sob sob yaos sangt mol Guef Zheub,daof ghangb yol zhas khuab khat yol, muax ndout lenx dout uat guk ndeud ndaot nbet, zhenf dot yos dout ib cat dob zeux dob nzhet zhif zox zhif jit, sut let Nqaid Yenx Dlob, Qix Nyangb, Vangf Xongx Dluas, Faid Sent Dluas, Nzeuf Dlob dex nat, nil mex uat dout ndout yangf drous gud dix Hmongb khuak ncak, lob nbet ndaot laos drout cuat khaod, yenb gongb nyaob laos hod ged tlout njot.

    7. Bangb ceub dout ged geuf rongt duax.

    Zix muax ndeud Hmongb lol, ib cat gud dix Hmongb zhit boub ndoub ndeud, nghuas geuf ndeud Hmongb, hlet leuf lob maof zhit boub ndoub ndeud. Suk let Bangx Deus tab Dlex Lab, shuad zix xongt 1982 zos 1994, ib huaf muax 36391 lenx gud dix Hmongb dout geuf boub ndeud Hmongb. Ib cat deb qeut zhed geuf gheb ghel kheb ged khuab khat aob yangf lol ndeud, bangb dout dex mid nyuas muax shab geuf ndeud, nghangt shab ndeud del. Suk let Bangx Deus Yik Naif Hex, Fuf Linx Lif Duaf Changd Nyox dex nat dob yaos dex zhed geuf uat dout rongt. Nyaob ged geuf gheb shab, dluat leuf Guef Zheub nens zheus zhed geuf gheb shab kheb ged geuf ndeud Hmongb, zix xongt 2012 lol, Yenx Nangx nens zheus zhed geuf gheb shab lal kheb muax ged geuf ndeud Hmongb, nil nat dob shout dout 6 pub khuat geuf tab muax 2 pub dob geuf dad leuf, bangb beb Hmongb drob dout ib cat dob ncaik geuf ndeud shab, muax nghet lox drout khaod dous keuk beb dex lol Hmongb tab zox jit.

    8.Ntuad kheb dout Hmongb ged langs ged luaf.

    Geuf zeux ndeud Hmongb, khaod muas bof dlangd, langs luaf ceud duax.Ib cat gud dix Hmongb geuf dluat ndeud Hmongb, boub Hmongb nyaob khaod ot khaod nat, zeuf ntrad ged uat langs uat luaf mol Guef Zheub, Sif Chuangb, muax dex zhenf mol drout Mid Ndox, Laok Zhuak tab Taib Deb. Ib cat geuf dout bangx del, yos zhax yos cod hlob dout shait, jaos zid hmangb zid ndongt zit dout ghangb, muas dout zax ndout. Dex dol uat dab uat chaot muas, seuk aob lob ndeud Hmongb drout shout, langs luaf rongt deuf duax. Dex dol uat zhed naox maod zhed houk dlex zhed muas chuax, dik lob nbet ndeud Hmongb, shaib hlaot ghoud zeud sangd ngangs mol, duab nens soud nzas laof ref ngouk.Dex nat zeuf yaos ndeud Hmongb lob ros ceub zax langs.

    9.Hlob hlangd dout ib cat lol Hmongb rongt.

    Muax ndeud Hmongb, zhit dangb yaos bangb dout Hmongb lob nenx, zhenf hlob hlangd dout Hmongb jaod lol tab. Wef zhit muax ndeud, beb dex lol Hmongb zhit zouk shid, haik dex cuat yangf nil nat deuf muax zeuf haik zhit dout. Ib cat jat let haik lol Shuad, dex Shuad hnaod dex Shuad dob boub leuf. Dangb shik muax ndeud leuf, beb muax ndout lenx shout ndoub shout ndeud, muab lol Shuad caik uat lol Hmongb, dik dout ib cat lol Hmongb rongt duax. Suk let dlangd hlout, cheb nghangx, zhed kot maob, zhed geuf gheb shab, zhed dot bloub, sod dongx del dex nat, uat drout beb Hmongb dex lol ndeud chab ndout rox rol, ceub dout lol Hmongb muax ros duax.

    Aob  Ged Boub Dangb

    Ntuad khat ndeud Hmongb dout 60 xongt lol, beb bof uat dout ndout yangf, lal keuk dout ib jaod ged boub dangb.

    1.Ntuad khat ndeud Hmongb yuad muax Dangd tab zhenf fud bangb ceub.

    Ndeud Hmongb yaos Dangd tab zhenf fud bangb beb zhif deuf let, ntuad khat ndeud Hmongb lal yuad Dangd tab zhenf fud bangb ceub. Dangd tab zhenf fud zhaot jait drout beb, bangb ceub nyax zas, bangb beb khuat khat dob zeux dob nzhet, beb let uat dout ndout yangf. Khaod nat beb yuad njot nzhongd, yuad uat zhous drout Dangd tab zhenf fud. Daof ghangb nat, beb uat dlangb zhit tab uat jangl uat, lal yuad kaof Dangd tab zhenf fud. Beb yuad nyaob jex Dangd tab zhenf fud bangb ceub, shid ros muab ndeud Hmongb ntuad khat mol dlangd mol dob, ntuad deuf ndeud Hmongb lob ros, ceub guas beb Hmongb lob nenx rongt mol.

    2.Ntuad khat ndeud Hmongb yuad muax ib bub dob nof dob zhud tab dob zeux dob nzhet maob shab.

Yangd dangl lol, ntuad khat ndeud Hmongb uat dout ndout yangf, beb bof muax ib pub dob nof dob zhud tab dob zeux dob nzhet dout maob shab shid ros, suk let Vux Chenx Yenx, nil geuf dluat ndeud Hmongb, boub dout ndeud Hmongb yaos lob ros ceub beb Hmongb lob nenx, daof ghangb nil dout uat nof zhud, njot nzhongd shid ros bangb ceub ged ntuad khat ndeud Hmongb, mol zos khaod dus haik zos khaod dus, bangb ntrad nyax ntrad zax lol khuab khat. Zhenf muax Taox Shuf Qangx, Qix Nyangb, Yangx Shaof Longx, Xongx Shuf Chenx dex nat, dob uat muax yenb gongb drout ged khat ndeud Hmongb. Zhif nyaos beb yuad njot zos tab keuk shid nil mex dex shab guas, dreuk nil mex dol ghoud, zaik dreud muab dlex nof ntuad khat ndeud Hmongb uat nghel mol tab uat gas rongt.

    3.Ntuad khat ndeud Hmongb yuad muab ged ntuad khat ndros ged geuf zox zhif jit shik zuak uat get.

    Hmongb yaos ib haid duab nens nyaf zox nyaf jit, touk ntuad khat ndeud Hmongb, dex guk ndeud duax shab muab khat ndeud Hmongb tab khat hot ngoux shik zuak uat get, zhif zox zhif jit, jat duab nens geuf ndeud Hmongb muax ngoux hot, muax zox jit geuf, geuf dout shid dout, lox shab gangx los, dous ged shuab ngoux ndangt yenl, cuat ral geuf dad souk ghangb, dob uat muax ged laof ref, uat drout duab nens gob shab, ndeud Hmongb let khat dout rongt, ntuad dout dlangd. Khaod nat yaos ib khaod ged boub dangb lox, beb yuad njod nzhongd keuk shid.

    4.Ntuad khat ndeud Hmongb yuad dreuk nenx nyongs dis hlod.

Ndeud Hmongb yaos zhif lol bangb ceub nenx nyongs let. Lob nenx nyongs dis hlod leuf, ntuad khat ndeud Hmongb lal yuad dout dis hlod. Suk let zhenf fud haik guas dreuk jait kot lil deb qeut, beb ntuad khat ndeud Hmongb lal yuad khuab khat mid yif geuf jait dous jait. Zhenf fud haik guas yuad zheb khat kob xox zox jit, beb ntuad khat ndeud Hmongb lal yuad dout khuab khat kob xox zox jit.Touk ndex ntuad khat ndeud Hmongb nyaob rex raol, nil nat duab nens ngangs ndrongs ndout duax, ib khaod mak yaos sheud dleuk muax sod dongx del leuf tab, ntuad khat ndeud Hmongb zeuf yuad shid sod dongx del tab ngis shik zuak, uat nat let kheb dout ged drout duaf cix. Zhit dreuk nenx nyongs dis hlod ntuad khat, dlex nof zeuf leud zhit juas nenx nyongs, nzod lis zeux blox mol. Let nat, ntuad khat ndeud Hmongb yuad dreuk nenx dreuk nyongs.

Dex ged boub dangb nat, zhif nyaos beb muab njot keuk jat tab jaox lol shid drout beb zox ged ntuad khat ndeud Hmongb daof ghangb.

    Beb  Khaod Zaik Nzhib

    Ntuad khat ndeud Hmongb uat dout ndout yangf, lal zaik nzhib ndout yangf ndeuf beb houd ndex.

    1.Beb Hmongb zhenf boub zhit zos lol Hmongb ndeud Hmongb dol nghet

    Lol yaos ib haid duab nens dol ghoud khat, ib haid duab nensyaos dak zhit muax lol, las zeuf boub zhit dout gaox yaos ib haid duab nens. Ndeud yaos yangf juab yenx ceub nghangt haid nens lob nenx sheud. Dangb shik, beb Hmongb fenf ndout zhenf boub zhit zos lol Hmongb ndeud Hmongb dol nghet, ndout ndout lenx zhenf zhit boub muax ndeud tab.Zhit boub dol nghet, zeuf zhit zeux mol geuf mol shid. Gaox mol khat nil, nil zhenf nos dak geuf uat dlangb zhit?Muax dlangb zhit ghangb hout? Uat nat, beb ntuad khat ndeud Hmongb,zeuf zeux nzhib ndout yangf dangd ged, uat dlex uat nof zhit yongx yif hlaot. Yaos dak beb Hmongb ib huaf boub zos lol Hmongb ndeud Hmongb dol nghet, sheud dleuk zeux haik sangd shout, ntuad khat ndeud Hmongb zeuf yuad yongx yif ndout.

    2.Beb dex lol Hmongb blox shait tab zhit muax khaod zhif chab

Beb Hmongb nyaob xeut Mangb xeut Shuad, beb dex lol drous lol Shuad gik rel lox, muax ndout lot lol Hmongb ghed lol Shuad lol shid, zhit haik nyaob khaod dus, nax hnob nongs tab haik lol Shuad ndout, uat drout lol Hmongb ghed shid lol Shuad ndout duax. Muax dex deb qeut, naf hot Mat, zid hot uat Dib, hot dol box uat Laok Mat. Dex nat khat dout dak beb dex lol blox shait hend.Nil nat, beb Hmongb rex raol dex hluak mol drout hod ndrongs ndouk ros, lol Hmongb yif huab shid zheus.Ib cat jat let zhit haik lol Hmongb, nax hnob haik lol Shuad leuf sub, uat uat jat let muab lol Hmongb hnaod ghangb dangl. Yaos beb zhit haik zhit geuf, nchait zhit lex lol Hmongb yuad blox leuf.

    3.Lol Hmongb ndeud Hmongb ndox ndrout lol gik rel

    Hmongb nyaob tongb ndax deb. Zix dleuk hlod kheb zhaot lol, gud dix Hmongb nyaob ndox ndrout ndros beb dout mol lol, sheud dleuk shik boub shik ceub, khaod nat yaos ib khaod rongt. Dangb shik, wef nyal nyaob nyal, lol tab ndeud lal zeud, muax ged mol lol leuf, lol Hmongb ndeud Hmongb ndox ndrout lol gik rel beb ndout duax. Shaib dluab sob yaos ndox ndrout let, hot ngoux lal yaos ndox ndrout let, haik lol lob shuab lal yaos ndox ndrout let, dex ral zhenf muax dex lot "ok" tab "baid baik" nyaob hod tab. Gaox zhit boub gaox nchait dak nil yaos Hmongb ndox ndrout, ib nos let boub yaos yol deb qeut duab nens. Hmongb ceud zeuf Zhongb Gox, fenf ndout lal yaos nyaob Zhongb Gox, zhit yaos yuad zud zhit bob geuf xof ndox ndrout, dangb shik beb yuad muab yol uat khaod lox, yol shaib doul yol. Ib cat duab nens zhit yaos uat nat, yol shaib yol zhit muax nghet, muab ndox ndrout shaib lox tlout, zhaot zhes yol houd boul, leud las nbluas ghuad, uat drout ntuad khat ndeud Hmongb nzhib ged ncod, yuad dout duax shab shaib xuak.

    4.Zhit zeux duad zhux zox ged sod mongt deuf shait

    Ged sod mongt yaos lob nenx nil nat dol ghoud.Zix muax hlub hlout tab ngis shik zuak lol, cuat khaod cuat qeut dob bof shid sod mongt soud nzas. Dangb shik beb dex dlex nof ntuad khat ndeud Hmongb zhenf leud zhit juas zox ged sod mongt deuf shait nat. Ndeud Hmongb shid hod hlub hlout tab sod dongx del yongx yif hend. Dangb shik chuad dex gedshid hlub hlout caik lol, haik lol tab luf yangf beb zhenf zhit dout zhif muax. Dex nat khat dout dak ged ntuad khat ndeud Hmongb zhenf bongb ghangb dluat zox ged sod mongt deuf shait, zhif nyaos beb yuad maob shab ceub nghangt zos.

    Bloub  Zhud Yif Dis Kot

    Muax ged zaik nzhib, beb yuad uat jangl uat? Dreuk god shab sangd, beb yuad dis kot rongt dex yangf ndrangl ghangb nat.

    1.Ntuad khat haik lol Hmongb tab geuf ndeud Hmongb dol nghet

    Lol Hmngb tab ndeud Hmongb yaos beb Hmongb yangf zox jit muax nghet hnyangd. Beb yuad dout ntuad khat lol Hmongb tab ndeud Hmongb dol nghet drout duaf cix boub. Dob zeux dob nzhet yuad nghuas shout ndoub shout ndeud haik zos lol Hmongb ndeud Hmongb. Bangx Deus sod dongx juat yuad ndout khuab khat duaf cix shid lol Hmongb ndeud Hmongb, muab dex ghoud shid lol Hmongb ndeud Hmongb rongt ntuad khat duaf cix. Beb yuad nyaob shout ngis shik zuak ndout shid lol Hmongb ndeud Hmongb, ntuad deuf nil dol nghet rongt shid drout shout ngis shik zuak, ceub lol Hmongb ndeud Hmongb zox shad jax nghel mol. Duaf cix boub dout lol Hmongb ndeud Hmongb muax nghet lox, duaf cix let zeux nghuas haik nghuas geuf.

    2.Hout nof hout zhud tab dob zeux dob nzhet yuad jaox ged

    Hout nof hout zhud tab dob zeux dob nzhet yaos Hmongb jaod duab nens jaox ged. Uat ib dos Hmongb, lol Hmongb dob zhit haik, ndeud Hmongb yif huab zhit zeux, Hmongb yuad shaib zhit doul bes zheus, lal jaox zhit dout Hmongb mol uat lob nenx gangx shab.Hout nof hout zhud tab dob zeux dob nzhet ndout shid lol Hmongb ndeud Hmongb, duaf cix zeuf zeux leud ghangb haik tab geuf, lal muax shab heuf nil mex, ceub nil mex. Duaf cix shik nghol shik ceub, Hmongb lob nenx zeuf yif uat yif rongt. Zhit dangb nbluat nox, zhes dout zox jit duaf cix let zeux uat nenx luas nkhuak.

    3.Xof zeux yol khat geuf yol

    Haik lol Hmongb, geuf ndeud Hmongb, zhit muax zheus dol guk khat, fenf ndout yol zeuf yaos yol dol guk. Haik yol lol, geuf yol ndeud, beb yuad xof zeux yol khat yol, zhit dek daol lenx dus.Ib haid duab nens, yol lol yol ndeud zhit nyaf haik zhit nyaf geuf, zhos zeux yangx uat las luf jaod, uat nenx zhos muax zhouk shab nchik. Yaos dak dos dos nyaf haik yol lol, nyaf geuf yol ndeud, haid duab nens nat zeuf muax ged jat shab, duaf cix uat nenx muax shab muax guas, lob nenx daof ghangb let zeux rongt sheud lol.

    4.Ndout zhif lol tab ndeud

    Haik lol geuf ndeud,yuad muax lol haik tab muax ndeud geuf, let haik dout rongt tab geuf dout ndout. Haik zos lol, beb zhit yaos zhit muax lol, dangb shik beb dex lol zhit zouk shid drout lob nenx nil nat, suk let dinf, dinf shif, dinf naok, dex nat beb dob haik zhit dout. Let nat, beb yuad dout zhif ib jaod lol chab drout dex cuat yangf deuf chab nat, beb dex lol let zeux ndout duax. Suk let dinf, ndox ndrout hot hluad deul sob; Dinf shif beb buak hot nyaos dout uat dluab sob? Dinf naok beb buak hot nyaos dout uat hlub hlout? Muax dex nbet nat leuf, beb dex lol let haik nyaos dout beb lob nenx. Geuf dout ndeud zhit muax ndeud shaib, beb lal shid zhit deuf nil lob ros, fenf ndout zhenf kend hnaod ghangb leuf tab. Let nat, jaod geuf dout leuf yuad ndout shout ndeud tab luaf deuf lol drout duaf cix shaib, shik boud zhud yif, let ceub dout Hmongb hlob hlangd.

    5.Ndout ntrad ged bangb ceub

    Ntuad khat ndeud Hmongb, Hmongb yuad nghuas geuf, lal yuad ntrad ged bangb ceub, dlex nof let uat dout dlangd, uat dout ndout. Yuad ndout mol ntrad zhenf fud, bangb nyax zas, bangb zhuf yif, muab ged khuat khat ndeud Hmongb ntuad mol drout cuat gheb zhed geuf, ntuad mol drout cuat khaod cuat qeut. Yuad mol ntrad dex qeut langs qeut luaf muax zax, bangb uat yangf ot yangf, jat ged geuf ndeud Hmongb muax nghet sheud lol. Yuad taod sod dongx juat tab qeut dluab sob, ndout zhif zox zhif jit, jat duaf cix nyaob hod zhed tab cuat khaod, get nongs sod dongx juat tab shaib dluab sob zeuf geuf dout ndeud Hmongb. Uat let nat, ged geuf ndeud Hmongb zeuf ntuad dout dlangd, mol dout dob, deus nyaos bangx, zit nyaos zid.

    Souk dex lol bel shuab, ndeud Hmongb zhit deuf lol, ntuad khat 60 xongt, khaot uat dout muax ndout, khaod zaik nzhib bof los, beb yuad sangd zhuf yif, deud shab muab ndeud Hmongb ntuad khat nghel mol, bangb beb Hmongb keuk tab zhif rongt lol, shid ros muab beb Hmongb lob nenx ceub nghangt shab, jat beb Hmongb ndros cuat haid nens ib cix, dout uat lob nenx rongt cix rongt cuat, uat zos lob Zhongb Gox nbout shuad gus Zhongb Huax Minx Cux huaf wangf lox!

 

Xongt 2017 lob 7 hlit hnob 20

 
【 文章作者:熊玉有 文章来源:熊玉有 点击次数:95 文章录入:hmongheu    责任编辑:hmongheu 】 
 
 【发表评论】【加入收藏】【告诉好友】【打印此文】【关闭窗口
 网友评论:(评论内容只代表网友观点,与本站立场无关!)
 
 

 

点击申请点击申请
| 设为首页 | 加入收藏 | 联系站长 | 友情链接 | 版权申明 | 管理登录 | 
云南网警


主办:文山州苗学会
Copyright 2007-2015 © 文山苗族 All Rights Reserved 滇公网安备 53262102000271号

苗山新事:侯 健 七彩苗山:吴德华 苗学研究:李维金 苗山音视:陶志文
苗文空间:张元奇 文学园地:陶兴安 苗山风谣:杨朝山
站长信息:QQ 464402767 邮箱464402767@qq.com 手机 15308766544
 站  长:张 元 奇..技 术:杨 永 平、许 东

信息产业部备案
滇ICP备15005284号