设为首页 加入收藏

用户注册· 联系站长 · · ·

>> 您现在的位置: 文山苗族网 HMONGB BANGX DEUS DEB >> 苗文空间 >> 文章作品 >> 正文
 
 

Mid Dled Xit Mik

文山苗族网 HMONGB BANGX DEUS DEB·[2018-4-15 16:54:38]

Mid Dled Xit Mik

小狗粞米

翻译:熊玉有 王兴发

 

  Touk gat, hax zhit dout laix haid dex lax, ghangb deb dex got zhuas dex ral zhenf muax hlut deuf lol.

 Lob jaix ndox shod muax ib dangs gil, beb jid dol mid nyuas dob jaox aob dol dled mol ndeuf ib lob naf daox nzangt leud hlut. Muax ib dol dled yaos god yif let, hot Had Aof. Muax ib dol yaos Jed Lox yif let, hot Xit Mik. Xit Mik lob jed yout, lox zhit dluat dol chuk bes zheus, Xit Miklob nbet nat zeuf yaos haik dak nil youtyout zos zhos muax nzhat nzhab ib ndrangb lox ib nzhik mid.

 Beb langf ntrad dout ib lob khaod, guas Xit Mik ngangs mol hod khaod ndes hlut. Had Aof lob jed lox, ngangs zhit dout mol, beb zeuf jat nil rod luf lob drongx khaod ghuak zhit dleb. Beb sangd beb dak, aob lob khaod nad yaos qeuk uat get let, ib lob yaos hlut lob naf drongx, ib lob yaos hlut lob mid drongx, zhos yuad Xit Mik ngangs khaod mol, dol hlut hod khaod zeuf zeux zhid lob khaod drongx daof lol, zhid deuf lol zeuf zeux drous Had Aof ndel dout.

 Xit Mik zhit yenf ngangs khaod, ghuax nggid nggad guas beb zhaot zhes uat nat. Dled zhit nongs lol, nenb zhud zeuf truad plot, Jed Lox nbout deul zhit doul, naf shuab ntet ntaot, ghut aob beb ras guas mol. God yif dol Had Aof lal zhit yenf rod rongt njoux khaot, tlat lol ndeuf Xit Mik ib pangb, deuf jat Jed Lox uat nyox nyad, suk let ndros Xit Mik bangb jait. Xit Mik ngouf daof Had Aof ghangb, puab drout bes deb, shid ros fad dol mid got dud, uat ib dol ghoud nzif chuat nzhuad.

 Aob dol dled uat nad jat beb nbout shab hend, beb jat let keuk nil buab aob njeuk deut. Daof ghangb, nyaob jex beb del ndouk deut njeuk, Xit Mik hax shik  ngangs drout hod khaod leuf, dangb shik ib blas zeuf ghuax ghut leul toub deuf lol. Nil shout khaod nzhus muax aob khaod lut goul hnad lab kadNil drous nangb dof lak!

 Huaf nat sangd lol, dled zeux hnat ncab hend, Had Aof tab Xit Mik yuad zhof yaos nzod zeuf hnat deuf hod khaod zhit muax hlut zhos muax nangb. Wef  nenb did ndrenl, nil buab nchait dak nenb zhud zeuf yaos yuad nil buab ngangs hod khaod ndel nangb, zhos rongt did duas ngangs mol lak.

 Xit Mik lob khaod nzhus ib blas zeuf aot sheud lol, nchait lob ros muas lal drous gik rel lak, ib mol ged zeuf zeux pongf cuat yangf. God njot god yif nbangx muax Jif Dex Shenf chuax nangb, zeuf jat Jed Lox buas Xit Mik zaox dreud god tlat. Had Aof boub dout nad yaos jeuf Xit Mik shad, ib ged tlat drout daof beb houd ndex, shaib shaib beb uat ghangd dleb leuf, zeuf ib get tlat draod lol ib git dref laos guas beb shait nzhik.

 Tlat zos zhed, god uat jangl dob ntrad zhit dout chuax nangb. Had Aof uat shab jend jend shaib god fangb cheub tib, ceux jend, zhas bangb zhit dout dlangb zhit, ib blas tlat deuf mol, ib blas tlat ngangs lol, zos shad hloud nblais les, bok shab ndrenl zhit gangd ghuax deuf shuab.

 Jed Lox ib blas sangd zos hnaod nenb haik dluat ib lob zhud yif kot nangb dofdrous nangb dof zhos yuad muab dex bangx fongf xenb dleub duad maos nbuab drout shout khaod shangb. Lob jaix nat bangx fongf xenb zhenf deus uat nchot vaos, zeuf yaos ib blas sangd zhit deuf khaod dus muax bangx fongf xenb dleub. Jat Had Aof nyaob zhed rod dreud Xit Mik, god tab Jed Lox mol ntrad bangx fongf xenb deub. Suangf yaos njangx del, god ndros Jed Lox ndeul ndas zeuf dlet dout bangx fongf xenb dleub. Gad renl muab bangx duad maos, nbuab drout shout Xit Mik lob khaod shangb.

 Xit Mik boub dout nad yaos bangb nil kot maob, pef hox hend, puab luas duab yus, muab doub hout zhaot drout shout aob caik del, zend zhit ndit, zhit jat dex chuax bongb zhes. Nyaob touk nat, Had Aof nyaob beb ib pangb ib druaf zhit njaif, val got dud zhot zhes, hod khaod muas ib huaf yaos uat zhous tab pef fux. Nil uat zhous beb wef lak Xit Mik tlat njis laos, pef fux beb dexbangx del kot maob.

 Xit mik zhit dout rongt sheud lol, hnob ndeuf dangd shot zeuf duas leuf.

 Zix Xit Mik drous shangb zos touk duas, Had Aof dangd dul dob rod jat ndeuf Xit Mik ib pangb. Xit Mik duas leuf, dol Had Aof nyaf tlat shab tlat gheluat duab yus dout haod jid hnob, hod khaod muas ib huaf dob yaos dot shab. Zeuf suk god tab Jed Lox, Had Aof tab Xit Mik yaos uat get hlob lox let.

 Muab Xit Mik zox shad jat shout lob zhud yif gus zhit zouk nzhens, beb yaos ndout zheus langf uat ax! Touk mol ntrad dex bangx fongf xenb dleub, god muax aob ras tlout ndeuf qeut muas chaox ndraox, zeuf shik zhit dout sangd zos yuad mol hod qeut muas chuax nongs shaib muax zhit muax chuax kot nangb dof.

 Uat ndex Xit Mik ngangs mol hod khaod dex gangb muas dot shab uat zhit dout del, zos huaf nat god dob zhit dout hnaod ghangb.

 
【 文章作者:熊玉有 王… 文章来源:熊玉有 王兴发 点击次数:259 文章录入:hmongheu    责任编辑:hmongheu 】 
 
 【发表评论】【加入收藏】【告诉好友】【打印此文】【关闭窗口
 网友评论:(评论内容只代表网友观点,与本站立场无关!)
 
 

 

点击申请点击申请点击申请
| 设为首页 | 加入收藏 | 联系站长 | 友情链接 | 版权申明 | 管理登录 | 
云南网警


主办:文山州苗学会
Copyright 2007-2015 © 文山苗族 All Rights Reserved 滇公网安备 53262102000271号

苗山新事:侯 健 七彩苗山:吴德华 苗学研究:李维金 苗山音视:陶志文
苗文空间:张元奇 文学园地:陶兴安 苗山风谣:杨朝山
站长信息:QQ 464402767 邮箱464402767@qq.com 手机 15308766544
 站  长:张 元 奇..技 术:杨 永 平、许 东

信息产业部备案
滇ICP备15005284号