设为首页 加入收藏

用户注册· 联系站长 · · ·

>> 您现在的位置: 文山苗族网 HMONGB BANGX DEUS DEB >> 苗文空间 >> 文章作品 >> 正文
 
 

Nenb Loul, Mid Nyuas Tab Aob Dos Luad

文山苗族网 HMONGB BANGX DEUS DEB·[2018-4-15 16:53:35]

Nenb Loul, Mid Nyuas Tab Aob Dos Luad

老人、孩子和两只兔子

翻译:熊玉有 熊文国

 

Mid nyuas yaos zhit muax ros let.

Zhos wef ib dos luad, zhit yaos, yaos aob dos, nchait yif huab ndout.

Nenb loul lol dreud guat muas sangd dak yuad uat jangl hob dout mid nyuas.

Uat let dol luad gat, aob dos luad gat……Muax leuf rangx lol ndrual suk let jangl nid?

 

 

1

Yaos dak mol dit dleuf Bex Yangx, gaox zeux shaib bof ib dos luad ghok, ib dos luad ghok jed lox ndos laos. Nil ndrel drout shout lob baod daox shuab shab shab, suk let zhenf rod dreud dlangb zhit, zhas suk daol dreud dlangb zhit. Haik khat gaox, ndeuf zeuf yaos Dob Rod Nuaf luad wangx nzid.

Dol Dob Rod Nuaf lob jed daof ghangb yaos ndrangl shuab shaib zhit bof ndos, ndoub ndox sad gangx lol. Changd ndox jit muas laos ndrangx deuf nil dol ghoud dluab. Duax dleb shaib mol, nil suk ib dlaif dluab ndeud zab, yif huab suk ib dol dluab buab zous.

Ndrel drout shout lob baod daox shuab shab ghak njuat, Dob Rod Nuaf uat duab yus rod dreud daol dreud.

Ib daos xongt ndout lol, Dob Rod Nuaf zeuf uat nad rod dreud daol dreud. Nil jat shab dak zeux tlat duax ib dos luas, tlat duax ib dos gud luas, dangb shik zhit muax, ib dos lal zhit muax. Dangb shik, nil uat nax nzhens dout dak zeux muax ib dos luas ib dos gud luas tlat duax. Nil hax jat shab dak ndeuf nat uat nyaos deb nzhuab rouf, hax muax, shout dlaif deb nzhuab rouf nat zhit muax tix maot, zhit muax chuax laof, zhit muax bangk juaffad daof nat daof ot……zhif muax ib lob ndax deb ghangb shab yeux shab dax dol. Nil nzhens dout, dex nad lal zeux muax ib hnob yuad uat zos khaod das.

Dob Rod Nuaf yos drout ndeuf nad, lal hlob drout ndeuf nat. Ndeuf nad ib lob baod daox ib lob drongb, ib zox gux dles ib rangx baob zhangs, ib houd shod nzhif baox nghenb ib zhaob ndongt……Dob zhes muax nil lob shab njot ghangb rib. Drangs tlat drout shout dlaif ndrangl shuab dlangd faot, drangs tlout leuf ib zongx zongx Shod Chax Bat Gat, drangs tlout ib zongx zongx Lus Rangx Dlangx, drangs tlout ib zongx zongx Nghenb Maos Dlangb……Juat nzheux ndeuf khaod nzhex mol, changd ndox plut dreud ndrouk ghouf, dex mid gud luas uat shab ncheut laos shaib dreud yol……Ndeuf yaos lob jaix nyongs gus ndout zheus rongt shab changd ndox los ax!

Dob Rod Nuaf zeuf dak zhit zeux hot ngoux, dangb shik nil nyaf shuab ngoux. Touk lob jaix shout ndrangl shuab dol dob ngoux nongs bex linx hot ngoux, zhit haik dreuf uat dlex nof dlangb zhit, nil dob zeux ib blas ndrel drox nghel lol, rouf drout bes deb, nongs uat duab yus.

Nyaob shout dlaif ndrangl shuab gus changd ndox juat nchab bod npaot tab muax shuab ngoux rongt shab, Dob Rod Nuaf mangd mangf hlob lox boub dangb, hlob uat ib dos luad wangx nzid shab nchuat. Wef lak put luad lob ndas dos jax mol, wef lak pub luad hlob hlangd huaf wangf, wef lak put luad muax ros jax mol……yif huab wef lak put zhax ghok lob ndas plot, nil jaox dreud pub zhax ghok shid ros uat nenx.

Dangb shik, zhangd dlangb zhit dob ib huaf mol leuf zhit draod lol. Ib pub zhax ghok ndout zheus lox, huaf nat zhos chuad nil ib lens sub.

Dlaif ghob rangf dluab daos xongt daof ndex uat drout Dob Rod Nuaf ib ndangx nens lal zhit zeux hnaod ghangb. Gouf ndout dol nenb fad dreud bangk juaf jangb dreud dled leud nghaix tlat duax. Nil mex ntrad luad ghok drout cuat lob baod daox, ndrout ndul zouk nchait, haik njangx yaos ib dos lal zhit sangd zhaot tlout. Nyaob hod dled leud nghaix lob shuab ghuax shuab huak tab Bangk juaf lob shuab fad yangt, ib dos dos luad ghok ghous drol, daof ghangb drous ndruab drout hod hnangb deud nangb. Dob Rod Nuaf sangd tlat bek ntaot mol nzhus ib dos jax duas, bangb dex nzhuab ret boux joub, dangb guas nil hax shik uat dol nghel lol leuf. Nyaob hod dled leud nghaix lob shuab huak tab bangk juaf lob shuab fad, Dob Rod Nuaf tlat khaod nat khaod ot, zos daof ghangb uat chuk ngangs khaod ndongt let ngouf tlout ral bloub ndos nat. Beb uat yuaf leuf dlangb zhit? Yuaf leuf dlangb zhit yuad jat gouf ndout dol nenb  nghel del hnyangd luax ndos nat? Wef let jangl? Nad yaos wef let jangl? Dob Rod Nuaf ib shuab shuab nos yol, ib shuab shuab nos dlaif ndrangl shuab, ib shuab shuab nos lob ndax deb. Nil zhit boub, uat jangl lal zhit boub. Gouf ndout dol nenb mol dleb leuf, nil mex dex shuab traik drox blox ros rol, nil mex dex shuab haik luas lal blox ros rol leuf, dled leud nghaix lob shuab huak lal zaox dreud mol dleb leuf. Yol jaod nzhuab ret hod hnangb deud nangb drous nenb muab drik leuf, dleuf Bex Yangx kongb los, ndrangl shuab kongb los, ib lob ndax deb ib huaf kongb los, Dob Rod Nuaf hod shab lal kongb los leuf. Pleud hlaot shout njaot baod daox, Dob Rod Nuaf shaib nzhongd gouf ndout dol duab nens nzhox dluab blox los  shab langx nyaob. Nil mex ib shangk dang lib shangk tab, zhit boub yuad dous mol khaod dus. Dangb guas nil mex dex shuab ghut juas zhenf ndraod zhenl drout ndeuf nat, bangk juaf lob shuab ndraod Sueb sueb juas let zhenf ndraod ndrenl ndeuf nat, dled leud nghaix lob shuab tluak shuab huak lal juas let zhenf ndraod ndrenl ndeuf nat……Zeuf nyaob touk nat, Dob Rod Nuaf zad shab nyaob nghel lol, rod nuaf lob ghob vangx zhed nat. Nzhuab ret zhit muax leuf, dangb shik ndeuf dex nat hax muax nil mex ghob nend deut, hax muax nil mex lob khaod qeut nyaob, hax muax nil mex dex bangt ncab……Hax muax Dob Rod Nuaf njot zos nil mex, uat let, Dob Rod Nuaf zad shab nyaob nghel lol. Nil nzhens dout dleuf Bex Yangx hax zeux muax lob nenx rongt shab changd ndox los. Dob Rod Nuaf zhes nghel lol leuf, wef uat shab kaod kaot, nil zeux dik dout lob nbet Dob Rod Nuaf nad drout yol.

Gouf ndout dos duab nens gat nchait dak dleuf Bex Yangx zhit zeux muax luad ghok leuf, ndout zheus duab nens dob nchait dak dleuf Bex Yangx zhit muax luad ghok leuf, zeux zhit duax ndeuf nat leuf.

Kuk shab ab shab ris raox ndeuf dleuf Bex Yangx, lal ris raox ndeuf ndrangl shuab, ris raox Dob Rod Nuaf.

Huaf nat, nyaob hod lob nenx uat nax, Dob Rod Nuaf dex huaf cuat khaod mol dous dous, dex ral ndrel drout shout baod daox zhangt hout shaib cuat khaod, dex ral rod dreud lob deb qeut nad uat duab yus daol nzhongd……Dangb guas dex nat dob uat zhit dout nil rongt shab sheud lol. Uat jangl cax let dleuk dout kuk shab ab shab nid? Dob Rod Nuaf sangd ndros nongs bex linx uat shit, dangb shik nongs bex linx zhit dous nil. Nil boub dout nongs bex linx——las muax goux dik, yangt drout shout ndox, hax zeux hot ngoux, uat jangl nyaf ndros god nyaob uat get nid? Dob Rod Nuaf sangd tab nangl shuab uat shit, dangb shik nangl shuab uat nax blab drout hod khaod, lob khaod nghaif nghaif zhaot zhit mol Dob Rod Nuaf lob jed. Dob Rod Nuaf sangd ndros zhous uat shit, zhous sex zhid blab drout cuat khaod, ged uat shit zhenf zhit dout kheb houd zeuf muab lob nik doub hout ngouf leuf……Uat let, god ndros lenx dus uat shit nid? Dob Rod Nuaf sangd. Zeuf dak yaos luad ghok wangx nzid, dangb guas nil lal yuad uat shit ghangb shab.

Dangf zhenb kuk shab das, Dob Rod Nuaf muab deub rel dos dlangd loul dangf uat ged uat shit.

Dlangd loul yaos tangx deb qeut nat dol huab daik. Nil nyaob shout ndruab ndos yangt uat ris raox, zeuk dak dled deul dob nchait nil beb fenb.

Dob Rod Nuaf hax gangd mol rel nil uat shit.

 

2

Khaod das, Dob Rod Nuaf lal zhit kuk shab, muax ib dos duab nens uat nax dob kuaf nzhongd nil; Nchait yaos, muax hend ndout hend ndout duab nens kuaf nzhongd nil.

Ghuak dleuf Bex Yangx bloub zhib jait ged muax ib lob nyuas kut. Nyaob lob nyuas kut shangb hnob duax muax lob vangx zhed muab zhuangb nzhuab vual lab vod, hod nad muax ib dos nenb loul. Dol nenb loul nat zeuf yaos wef Dob Rod Nuaf let sex nyaob nghel lol let. Dol dob uat dlex nof hod ndrongs dob hot nenb loul zangd mol hod ndrongs nyaob, nenb loul haik duas zhit mol. Wef yaos dol nenb loul touk ndex shaib bof Dob Rod Nuaf uat lob nenx ghangb shab yol lal rongt shab, dangb shik huaf nat, nenb loul zhit zhaot shab drout Dob Rod Nuaf.

Dob Rod Nuaf cuat yangf cuat zhangd touk ndex dob nyaob hod nenb loul khaod muas; Huaf nat, Dob Rod Nuaf cuat yangf cuat zhangd yif huab nyaob hod nenb loul khaod muas. Daos xongt ndout lol, nenb loul uat nax kend mol dleuf Bex Yangx shaib Dob Rod Nuaf, wef Dob Rod Nuaf lob nenx langx dluat.

Nenb loul sangd dluat cuat yangf zhud yif bangb Dob Rod Nuaf, dangb guas dob zhit dout uat dad. Daof ghangb nenb loul zeuf sangd muab Dob Rod Nuaf leud zhid, guas nil njaif ndeuf Bex Yangx mol. Ndeuf nat zhit dangb jat nil laif zhes zox ged kuk shab ged ab shab, yif huab yuad jend let yaos, nenb loul nchait nil drous shout lob nyuas kut dol nenb leud nghaix plot sad lal shaib bof.

Dangb shik, Dob Rod Nuaf yuad uat jangl zeux njaif dleuf Bex Yangx mol nid? Nil yaos dol Dob Rod Nuaf ax!

Dol nenb leud nghaix gus plot sad lal ib hnob hnob nghangt dreud nil dol bangk juaf gat, suk ngouk dol dlangb maox rens dous drout shout mid kut tab shout ndrangl shuab.

Leud nghaix jax njais——zeuf dak duat dout ib nyik dol nchoub ris, dol nenb leud nghaix gus plot sad lal lal zeux ngangs longt mol hod zhed houk jeud, muab dol nyuas nchoub ris uat roub nzuas jeud houk jid kaob.

Dob Rod Nuaf lob nenx kuk shab ab shab yuad uat jangl tlout nid? Yaos dak Dob Rod Nuaf drous dol nenb leud nghaix plot sad lal boub leuf yuad uat jangl uat nid? Nenb loul sex ceux shab dex bloub ndos nat.

 

3

Dol gid nyaob hod ndrongs geuf ndeud lol shaib nenb loul.

Touk ndex, nenb loul mol dleuf Bex Yangx, dangd dus dob muab dol gid zhes drout hod nyuas kut. Nil zhit sangd jat dol gid shaib bof Dob Rod nuaf, yif huab zhit sangd jat dol gid boub Dob Rod Nuaf huaf nat lob nenx. Nenb loul lob shab sangd uat nad yaos shab rongt.

Dangb guas ral nat zeud leuf, dol mid nyuas suk let nyaob hod nenb loul lob khaod muas shaib deuf dlangb zhit; Zaik dreud, dol mid nyuas nyaob shout mid kut boub dout leuf dleuf Bex Yangx zob bloub ndos deuf muax, boub zos Dob Rod Nuaf lob nenx, let nat, dol mid nyuas uat jangl dob yuad ndros nenb loul mol dleuf Bex Yangx.

Mol dit dleuf Bex Yangx, mid nyuas shaib bof Dob Rod Nuaf.

Zhenf suk touk ndex, Dob Rod Nuaf ndrel drout shout lob baod daox shab shab, ib nzhik zhit zangd.

Shaib leuf ib njuak, nenb loul ndros dol mid nyuas haik dak: Beb draod mol lak baf!

Mid nyuas shaib bof Dob Rod Nuaf, zhit dout uat shuab deb.

Beb draod mol lak baf! Nenb loul draod haik.

Mid nyuas shaib dreud Dob Rod Nuaf, lal zhit uat shuab deb.

Zhit shaib lak——beb bangb zhit dout nil! Shaib nzhongd Dob Rod Nuaf, nenb loul aob shab tab zhit boub uat jangl.

Huaf nat, nenb loul lob shab sangd zhos yaos raox rens guas dol mid nyuas njaif ndeuf nat mol——nil nchait ged kuk shab ged ab shab gik drous dol mid nyuas. Nenb loul yif huab sangd dak uat nad zhit hof ged——wef let jangl yuad muab dol mid nyuas jaox duax lob deb qeut nat nid? Wef let jangl yuad muab dol mid nyuas jaox duax zos lob dleuf Bex Yangx gus drous ged kuk shab ab shab nbos ndrenl nat nid? Dol mid nyuas khaid nyik gouf xongt, uat jangl haik lal jaox zhit nyaos nil duax ndeuf nat ax! Nenb loul uat nad ndual dreud nil.

Naf yeuf, beb bangb zhit dout Dob Rod Nuaf das mad? Zhit uat rangx leuf ib dangs hnob, dol mid nyuas nos.

Bangb zhit dout. Nenb loul deb dak.

Beb bangb nyaos dout Dob Rod Nuaf! Mid nyaus haik.

Nenb loul zhit dout deb njoux, zhos yaos ab shab jot jot hout.

Beb bangb nyaos dout Dob Rod Nuaf! Mid nyaus draod haik.

Haik dangl, mid nyuas njaif dleuf Bex Yangx mol leuf, yangt nzas tlat mol daof mid kut.

Uat jangl bangb dout Dob Rod Nuaf nid? Nyuas lab zeuf yaos nyuas lab! Shaib dreud dol gid ghaix ghangb ghaix ghangb mol leuf, nenb loul draod jot jot hout, hlot ib bangt nded longt.

Duax daof mid kut tlat lol, mid nyuas buas dreud ib dos luad nyis——ib dos naf luad nyis hnob nyos shib tab jed kaod kaot.

Zhit yuad haik, mid nyuas muab dol luad nyis nat zhaot drout shout dleuf Bex Yangx leuf.

Nenb loul shab boub dout mid nyuas sangd dlangb zhit, dangb guas zhit zhaot shab drout dol mid nyuas uat zob bloub nat.

Dangb guas dol gid zhit nchait nenb loul uat jangl shaib, nil zhos dreuk dreud nil shab sangd mol uat.

Nyaob touk njaif dleuf Bex Yangx mol, dol mid nyuas dik dout lob nbet duaf cix lenl zaik drout dol luad nyis——Mid Gud Luas.

Mid Gud Luas, gaox yuad muax ros od! Dol mid nyuas haik drout dol luad nyis, Gaox yuad bangb ceub Dob Rod Nuaf. Nil yaos gaox dol dix lous, gaox yuad ndros nil uat duab rongt uat nenx ax!

 

4

Nenb loul ceux shab zhit yaos ndout leuf.

Shaib nzhongd lob ndrangl shuab zal ral dlangd faot nat, Mid Gud Luas ib blas mok ghok leuf.

Dob ret lob jaix ndox zal, shout dlaif ndrangl shuab nat muax leuf khaod zal ral. Mid Gud Luas jeuk boud duab yus drout ndeuf, uat rongt nzhat shaib cuat yangf ib njis ndos. Mid Gud Luas hod shab zhit boub, dol nyuas dob gat uat jangl yuad muab yol zhaot drout ndeuf nat.

Zhit nuf, lob hnob dob ghaix leuf, ndox yuad zhouk lak.

Mid Gud Luas zeuf dak zhit boub ndeuf nat muax bes zheus zhangd zhax vof laox nyif dreud nil zox shad, dangb guas nil hod shab hax shik muax ib nzhik nchait. Let nat, nil shif dreud tlat ib druaf drout daof ndex, draod shif dreud tlat ib druaf drout daof ndex, shif dreud tlat leuf jid druaf, dluat leuf, Mid Gud Luas zaox dreud lob baod daox shuab njis leuf ib njis, ntrad dout lob khaod shuab, ndeul ndas keub dout lob khaod raik, khaid nyik zouk muab lob jed raik drout hod khaod.

Ndox zhouk rub ruas, dlob zis ib blas zeuf zeux nbos dangl dleuf Bex Yangx.

Touk nat, dleuf Bex Yangx laof ref sheud lol, ib lob ndrangl shuab ib huaf laof ref sheud lol.

Nyaob Mid Gud Luas daof ndex tlat bleul ib dos hlut shuab, tlat dluat ib dos hmangt dlangx, draod tlat tlout ib dos ruax shuab……Nil mex zhenf ntrad nghaix naox. Khaod rongt yaos nil mex dob zhit dout bof Mid Gud Luas. Ndeuf yaos shuab dlangb zhit? Ngix——Ngix——Ngid ngid nguad nguad——Kix kix kox kox—— Yaos lenx dus zhenf geuk cuat yangf? Mid Gud Luas sangd. Oub——Loub——Oub! Hax hax! ib blas shout zhaob ndongt nyaob ndeuf Mid Gud Luas lob khaod ib pangb ndraod raox blangk lob shuab ghuax, zhuas langl hef nenb. Zaik dreud, shuab hmangt nyongx leul dleb dleb duax. Cax cax cax! Yaos lenx dus nyaob tlat daof ndex? Bil bil bongl longl—— Draod yaos lenx dus shik ndouk shik nzhus? Mid Gud Luas shab tlat bil bongl nongs dreud, ndeuf nat ib shuab, ndeuf ot ib shuab, cuat yangf shuab ndraod ros ghak reul deuf duax.

Nat yaos ib lob hmaot ndox dlob zis ndout zheus nchait ax!

Lob hmaot ndox nat zhas ndout zheus nded uat luax ax!

Mid Gud Luas kheb lox khaod muas uat shab nchait ntrut nzhat shaib ib njis ndos, ib hmaot zhit but.

Daol dout gangx ndos duax zos, Mid Gud Luas ngangs deuf hod khaod, njet drout shout baod daox.

Dleuf Bex Yangx sheud nzod yaos nzhas dot rongt ngoux uat luax, dangb shik Mid Gud Luas zhit muax lob shab mol shaib xuak. Nil hax shif uat duab rongt shaox shaib ib njis ndos, zhit boub nangs hmaot yaos uat jangl tlout let, yif huab zhit boub hnob nat yuad uat jangl tlout mol.

Lob nenx zhenf yuad uat nghel mol! Nyaob shout njaot baod daox ndrel leuf dangs hnob, Mid Gud Luas uat nat tab yol haik, lob nenx dout uat nghel mol!

Blangb chaib dluat shab nchait, Mid Gud Luas nghel del ntrad khoud naox.

Ndeuf nat dex cuat yangf muab nyaos lol naox daf shik zhit zheus, dangb guas, muab haik drout Mid Gud Luas, dob zhit sik njoux hend. Nyaob hod mid kut, Mid Gud Luas naox let yaos dol nenb yos keut nil uat duab rongt xeut let sif liaof, dob zhit yaos dex ndraox shod nat.

Mid Gud Luas duax zhaob ndraox nat pleud mol zhaob ndraox daof, zhas draod duax zhaob ndraox daof pleud lol zhaob ndraox nat……Pleud mol pleud lol, said shaib yuad naox yangf dus.

Zeuf nyaob huaf nat, Dob Rod Nuaf tlat duax lak.

Sheud nzod touk tlat mol shout baod daox, Dob Rod Nuaf ib muas zeuf shaib bof Mid Gud Luas. Touk bof hax zhit nzhens yol lob khaod muas. Uat jangl zeux nid? Dex yangf rongt bloub nat duax dout shait dluat hend leuf lak! Nad buak yaos das?Dob Rod Nuaf nos dluat yol, pleud lak ndout ral mol shaib, zhas draod pleud leuf jid ral mol shaox nuaf. Nyaob touk nil boub dak yaos das leuf, zeuf drangs tlat tlout lol.

Dob Rod Nuaf tlat mol ndeuf Mid Gud Luas zhit dleb, ndrel druax leuf. Congx lob khaod boub dangb, congx khaod shaib doul las, Dob Rod Nuaf zhit dout jat let mol dit Mid Gud Luas.

Uat nad, Dob Rod Nuaf ndrel dreud ib pangb nzhat nzhongd, daol dreud, daol zos Mid Gud Luas touk shaib bof nil, nil let tlout mol.

Dob Rod Nuaf ntoub shab zhit doul——yol muax leuf dol luas, muax leuf gud luas! Uat get, Dob Rod Nuaf zhas maob shab Mid Gud Luas hend——nil yaos ib dol luad nyis, buak nyaob nyaos dout ndeuf lob ndrangl ndox nat? Buak uat nyaos nenx nghel mol? Sangd zos dex nat, Dob Rod Nuaf muax leuf nchuak shab ndangt ndrangt hmongd——buad rod Mid Gud Luas!

Sob teux, Mid Gud Luas zhit dous Dob Rod Nuaf. Nil nyaob cuat lob baod daox tlat mol tlat lol, yol dob haik zhit nplaik tlat uat nad muax dlangb zhit ghangb hout. Yaos yuad boud cuat dex daox drongb khaod nat? Yaos duangf linf lob jed? Yaos ntrad zox ged mol zhed? Yaos muab lob zhud yif tlat nat lob zot ghel khaod hmaod njot lob nenx hod mid kut tab dex gud luas? Mid Gud Luas haik zhit nplaik das.

Dob Rod Nuaf nid, zhos zeux dangd dus dob zaox dreud Mid Gud Luas ghangb.

Muax ib hnob, tlat dreud tlat dreud, Mid Gud Luas bof ib beus  choud——jid dlaif baob reb buat uat ghoud pind zif drous hleud dlob dangl. Beus choud hleud deuf nad yaos lenx dus hleud zhes nghel lol let nid? Yaos dex nenb hod mid kut zhes nghel lol let mad? Yaos yol dol nenb zhud yos yol zhes nghel lol let mad? Zhit guangd uat jangl haik, dob yaos duab nens zhes nghel lol let! Mid Gud Luas rongt shab lak. Nil sangd, ndeuf nat muax duab nens duax dluat. Nil zaik dreud nzhual langl zos, ndeuf nat hax zeux muax nenb draod duax. Nil muax beus choud nad shaib uat cenb ret khaod jif nox keuk zhes drout nil, dangf uat ghob deb qeut mid kut dol nzhox dluab. Let nat, Mid Gud Luas laif zhes lob qeut touk ndex nil nyaob, nyaob ndeuf blangl daox ghuak beus choud zhit dleb njeuk khaod uat zhed.

Dangb shik Dob Rod Nuaf shaib bof beus choud nil ib nchait.

Mid Gud Luas nyaob ndeuf nat uat zhed, Dob Rod Nuaf bangb nil ceux shab.

Ib hnob , aob hnob, beb hnob……Mid Gud Luas nyaob ndeuf beus choud ib njis uat nenx zhit ceux zhit fangx, dangb guas ib zob zab nangf uat duab yus lol dit nil.

Mid Gud Luas zhit boub zob zab nangf nat zhit yaos zeuf shout ndax deb duax, yaos zeuf shout ndruab ndos duax.

Muax ib hnob, dleuf Bex Yangx shout ndruab ndos yangt lol ib dos dlangd.

Nad yaos Mid Gud Luas duax zos ndrangl shuab teux ib ras nzhib ged nchait.

Dlangd nyaob shout doub hout yangt uat ris raox, Mid Gud Luas hax suk let yangf bloub ndos dlangb zhit zhit muax uat dreud shit.

Dangb shik Dob Rod Nuaf nzhat muas nzhongd ib njis ndos.

Zeuf nyaob touk dol dlangd ngous longt zos shout Mid Gud Luas doub hout, Dob Rod Nuaf gad rens tlat zos Mid Gud Luas ib pangb, ndlaos longt, nzend lax, bloub caik deut duaf ndox, aob beb huaf duaf yangt leuf dol dlangd khuad……

Dob Rod Nuaf buad taid dout Mid Gud Luas leuf.

Mid Gud Luas maob shab dob laos.

Huaf nat, Mid Gud Luas boub dangl hod shit dak Dob Rod Nuaf uat jangl yuad rod dreud ndeuf nil ib pangb.

Uat nad, Mid Gud Luas tab Dob Rod Nuaf uat dout rongt gud luas leuf.

 

5

Lob nenx chab kheb houd lak.

Dob Rod Nuaf rongt shab laos tlat mol drout shout njaot baod daox, zhas rongt shab duax shout njaot baod daox tlat nghel lol; Rongt shab tlat mol lob baod daox nat, lob baod daox ot……Nil rongt shab laos tlat ax tlat ax, sangd muab lob sod mongt nat haik khat duaf cix boub. Haik khat dus nid? Haik khat changd ndox, huab dleub, juat nchab? Dangb guas, nil mex zhit zeux boub ax! Haik khat dob hot ngoux nongs bex linx, nangl shuab tab zhous? Nil mex lal nchait zhit zeux boub tab ax! Daof ghangb, Dob Rod Nuaf sangd zos jaod cenb ret, nil sangd muab lob mongt nat haik khat drout jaod cenb ret cuat lenx. Dangb shik jaod cenb ret zhas uat jangl hnaod nyaos dout nid? Nil mex dob drous nenb muab ndruab ngangs drout hod hnangb deud nangb gud mol leuf.

Uat zhit dout jangl, Dob Rod Nuaf zhos rongt muab lob rongt mongt nat raik drout hod ndruab shab.

Zix huaf gat mol, Dob Rod Nuaf zeuf ndros Mid Gud Luas drox druaf zhit njaif.

Nil aob lens uat get ntrad khoud naox, uat get uat wangx uat luas, uat get drangs tlat shaib leuf cuat khaod rangf ruas……Dob Rod Nuaf jeut Mid Gud Luas mol shaib xuak nil cuat lob qeut nyaob. Jaod qeut nyaob nat lob dus qangd but dob ndout hend, dlangd faot sik shab, zox gangb lut hod angd raik dout rongt uat nkouk longt, muax beb bloub lob njoux khaod deuf rongt fangx taid dex huaf deuf bloub.

Muax jaod vangx zhed gus zeud zangd rongt leuf nad, Mid Gud Luas dreuk shab zhaot zhes leuf lob zhed nyaob ndeuf beus choud ib pangb. Nat jat Dob Rod Nuaf hlot leuf ib bangt zhaot shab.

Ndros Mid Gud Luas nyaob uat get, Dob Rod Nuaf juas let muax dlex nof nbangx zhit dangl, juas let muax lol haik zhit dangl.  

Dob Rod Nuaf haik khat Mid Gud Luas yuad zhof mol khaod dus uat shit, khaod dus bangx lad ndout, khaod dus ndraox zhuas hlob, lob khaod qeut dus xongt nat khaid nyik hlob deuf mid ndongt, khaod dus hlob muax rongt ndongt shab dluat lox dluat nyaob hod khaod hangd, khaod dus zeux uat nax muax lox zhut ncab mol lol, khaod dus yaos lob khaod qeut nongs bex linx hot ngoux……Dob Rod Nuaf hax khat dout Mid Gud Luas yuad uat jangl mol ntrad dout khoud naox, lob jaix dus mol ntrad khoud naox, dlangb zhit ndraox shod rongt naox, dlangb zhit ndraox zhuas rongt naox tab yos jed, dlangb zhit ndraox zhuas kot dout dlangb zhit maob……Hax guas Mid Gud Luas nzhens dout, blangl hangd baod daox nat rongt ngoux hend, cuat khaod muax rangf ruas rongt shaib; Ib blangl hangd baod daox nat nbluat nbol hend, cuat khaod muax rongt roub, zeuf dak nyaob ndox zal, puab hlaot dex nbot zeuf ntrad dout zid lol naox.

Mid Gud Luas drout shab nongs dreud, hax ib lob ib lob muab njot drout hod shab, nbangx rongt dreuk dous Dob Rod Nuaf dex lol mol uat.

Muab haik drout Dob Rod Nuaf, lob ndox zal nat changd ndox ghangb shab dangl ntraot.

 

6

Nyaob hod ndox zal ib hnob sheud nzod, nenb loul tab mid nyuas zhas draod duax zos dleuf Bex Yangx.

Mid nyuas dangd dus dob njot dreud Dob Rod Nuaf tab Mid Gud Luas, hod nbout shuad uat nax zeux bof nil aob dos.

Dluat leuf dex nat, nenb loul yif huab njot Dob Rod Nuaf tab Mid Gud Luas. Dangb shik, nil dob zhes dout nded hend zhit dout duax dleuf Bex Yangx lak. Zix touk dol gid muab Mid Gud Luas zhaot drout dleuf Bex Yangx, nenb loul zeuf zhit dout draod duax dluat. Nenb loul muax nzhik nchait. Nenb loul sangd, god zhit mol dleuf Bex Yangx, zeuf juas let Mid Gud Luas dob sik nyaob shout blangl ndrangl shuab leuf, zeuf juas let Mid Gud Luas dob rongt shab kheb houd uat nenx leuf, zeuf juas let Mid Gud Luas dob ndros Dob Rod Nuaf uat leuf rongt gud luas……Nenb loul muab ndout lob juas let lol lus yol shab. Lak shik uat nad haik, nenb loul muab ndout lob juas let lol dlangs yol.

Mid nyuas draod lol lak, yuad zhof dout mol dleuf Bex Yangx.

Duax zos dleuf Bex Yangx, nenb loul shab zhit dol rongt shab lak. Nenb loul zhit dout zhit lenl zaik yol khaod ceux shab yaos ndout leuf. wef yaos muab Dob Rod Nuaf tab Mid Gud Luas dex nend shaib nyaos deuf nil aob dos lob nenx chab ib huaf leuf.

Mid nyuas lal rongt shab lak. Nil wef yol nbangx dout ib yangf rongt dlex nof rongt shab.

Mid Gud Luas, gaox lox shab kaod kaot das! Mid nyuas uat shuab lox ghut zos, Gaox jat Dob Rod Nuaf draod ntrad dout ged ghangb shab tab ged changd ndox leuf!

 

7

Huaf nat, Mid Gud Luas dob nyaf drous dleuf Bex Yangx leuf, nyaf drous blangl ndrangl shuab nat, nyaf drous lob nenx nyaob ndeuf ndrangl shuab leuf. Nil dak ndeuf nat dlangd faot jit los, juat hod shit, changd ndox lal jit dout rongt hend, dluat let, hax muax ib dol gud luas Dob Rod Nuaf muax juab gangd tab shab ngal del ndreuf.

Zeuf dak uat nad, Mid Gud Luas hax shik zhit hnaod ghangb lob mid kut, zhit hnaod ghangb mid kut lob nenx, zhit hnaod ghangb buab luas hod mid kut……Let nat, nil zeuf uat nax mol daof beus choud ib pangb shaib shaib.

Zos dex huaf nat, Dob Rod Nuaf dob yaos zaox jend jend Mid Gud Luas ghangb, muab gangb muas jend ndrenl shaib nzhongd ib njis ndos.

 

8

Ndox zal dluat leuf, Dob Rod Nuaf tab Mid Gud Luas kheb houd uat  lob nenx zaof nif.

Xongt nat lob ndox zhous nbot lol dout lox hend. Lol uat ndangb ghak yenl muab blangl ndrangl shuab nbos uat bangt dob zhit dlif. Uat nat, Dob Rod Nuaf tab Mid Gud Luas jaod jaix nyongs ndout dob yaos nyaob drout hod khaod.

Rangf ruas nbot jat Dob Rod Nuaf tab Mid Gud Luas nyaf shaib rongt shab laos, dangb guas lob bloub ndos ncod shab hnyangd lal leud ghangb  duax.

Dex khoud naox ndox zal zhit zeux muax ndout, Dob Rod Nuaf tab Mid Gud Luas uat get naox houk nchait zos zhit doul kheb chab. Let nat, Dob Rod Nuaf zeuf hot Mid Gud Luas naox dex khoud naox zhes ghel lol, yol mol ndrout ndrouk ntrad luf yangf naox.

Touk daox drongb houd bel dob yaos nbot bangx, lenx dus nyaob ndrout ntrad naox dob yaos dex deut del zouk nchait……Ib yaos tlat zhit sheud lol, kend drous dex dob leud duat leud juas; Aob yaos dex dob leud duat zaox nyaos dout nend deut ntrad mol zos ndeuf khaod drongx. Nyaob hod ndox lol nbot, uat nat dex luad ghok dob zhit zeuf langf dous langf gongf, dangb guas Dob Rod Nuaf nil dangd dus dob tlat deuf mol uat dex dlex nof nil sangd uat.

Zhit dek caob xenb, Dob Rod Nuaf nil muax nil zhud yif, drangs longt hod dex nbot, touk dus dob zhit dout nzhib drous dlangb zhit bloub ndos.

Zeuf dak uat nad, Dob Rod Nuaf deuf mol ntrad naox hax shik shid lob zhud yif gad rens ntrad dout gad rens draod ghangb. Gad rens mol gad rens draod, zhit nyaob ndrout lex nded. Uat nad uat, nil yaos zhit sangd jat Mid Gud Luas kuaf dreud nil.

Deuf mol dous ib luf, zhit haik uat jangl langx, Dob Rod Nuaf uat jangl dob yuad keuk Mid Gud Luas jaox lol ib zhangd rongt naox——ib nblongs roub maol jex ghangb nbot, ib dos gangd shod, ib dos jangs ghangb rib……Jat Mid Gud Luas rongt shab, jat Mid Gud Luas boub dout nblangl ndrangl shuab drous nbot nak dangl hax shik muax naox ndout, jat Mid Gud Luas nyaob hod lob nenx ndox zhous lal muax jat shab zouk ngouk.

Muax ib hnob, Dob Rod Nuaf puab hlaot dex nbot, hax ntrad dout ib ndrut zid lab, xangt lob!

Dob Rod Nuaf muab ndrut zid lab nat jaox draod mol hod khaod, jat drout ndeuf Mid Gud Luas daof ndex. Mid Gud Luas jenb hlaot, daof ghangb zeuf rongt shab zhit dangl. Nil shaib ib blas, zhas draod shaib ib blas, shaib dluat jid lob ib blas, muab xangt lob zid lab nat draod keuk drout Dob Rod Nuaf……Mid Gud Luas muab xangt lob zid lab nat keuk draod drout Dob Rod Nuaf, Dob Rod Nuaf zhas draod muab xangt lob zid lab nat keuk draod drout Mid Gud Luas. Zeuf uat nat, gaox keuk drout god god keuk drout gaox, dus dob zhit muab zhaot mol hod njoux.

Hod dex nbot bangx, xangt lob zid nat chab juas bangx lad, lab juas ngoux hnob ax! Lal shik uat nad haik, nil mex zeuf yaos ib dred dred bangx lad, ib lob lob ngoux hnob.

Xangt dred bangx lad, xangt lob ngoux hnob, nil mex yaos Dob Rod Nuaf tab Mid Gud Luas dex juab changx uat get nyaob hod ndox zhous.

 

9

Lob ndox zhous tlout leuf, lob ndox chab duax zos lak.

Nbot bangx yangx leuf, ndraox shod deuf goul, juat shod shib shib, dlex ndlul nblid nblongd……Blangl ndrangl shuab nzhas dot ib lob ndox zhous draod jax shad duax.

Dob Rod Nuaf tab Mid Gud Luas lob nenx yif huab rongt draod kheb houd leuf.

  Sangd sangd shaib, hax muax jaix nyongs rongt dluat ndox chab mad?

Dob Rod Nuaf tab Mid Gud Luas rongt shab laos tlat ax, tlat ax..Nil aob dol muab tlat ngoux zaik daol lob ndox chab zaik daol lob nenx chab……Nil aob dos zhit zeuf hot ngoux, zhos zeux muab tlat ngoux lol ntuad yol zox ged gangx shab. Nyaob shout blangl ndrangl shuab dlangd faot, Dob Rod Nuaf tab Mid Gud Luas suk aob dos dob lous nbot lal shik aob dos guk tlat ngoux, rongt shab laos tlat ax pleud ax, del deut bad dout muax ros kaot kaod, senb zeuf rongt ngoux. Ib njis, aob njis, beb njis……Nil aob dos njis laos zhit shot, njis laos zhit shot……Tlat dout dex ngoux suk let nat, nil aob dos ib nzhik zhit hnaod zos shad.

Zeuf nyaob lob ndox chab rongt ngoux nat, Mid Gud Luas uat naf leuf.

Mid Gud Luas yos dout 5 dos mid luad.

 

 

10

Muab haik drout Mid Gud Luas, zhit muax ib yangf rongt shab dluat uat naf leuf.

Nchait yaos rongt shab hend leuf, Mid Gud Luas uat naf dout dif beb hnob, nil zeuf deuf drongx leuf. Mol khaod dus leuf nid? Yuad zhof yaos mol daof beus choud leuf, wef dak nchait muax cenb ret dob nyaob ndeuf daol nzhongd god lob rongt mongt lak! Mid Gud Luas uat nat ndros yol haik. Uat let, nil zeuf ib get sangd dreud yangf nof rongt shab, ib get tlat mol drout daof beus choud.

Zix kheb houd zos daof ghangb, Dob Rod Nuaf zad shab zhit jat Mid Gud Luas draod mol daof beus choud. Mid Gud Luas ral nat tlat dout mol, yaos Dob Rod Nuaf deuf mol ntrad naox zhit nyaob zhed.

Uat nat, lob bloub ndos Dob Rod Nuaf zhit zhaot shab hax shik npout deuf lak.

Nenb leud nghaix plot sad lal deuf duax ndeuf dleuf Bex Yangx leuf.

Dob Rod Nuaf ndros nyaos dout nenb leud nghaix plot sad lal shik nzhus njis laos, dangb guas muab Mid Gud Luas lol haik zhas draod yaos leuf luf zhangd bloub.

Nenb leud nghaix plot sad lal zhos yaos duab dol nenb. Muab nil lot lol lol haik, nil naox zhout leuf nil dol dled dob zhit chaib leuf. Ib dos duf nenb uat nenx ndout xongt lol uat drout nenb leud nghaix plot sad lal zhit sangd uat dlangb zhit, lal zhit zeux uat dlangb zhit. Zhit sangd uat dlangb zhit lal zhit zeux uat dlangb zhit, xenx jat zhit muax nof, nenb leud nghaix plot sad lal zhos zeux mol daof dleuf Bex Yangx ntrad nzhik nghaix ghok.

Muab dex duab nens ib njis ndos lol haik, luad ghok zeuf yaos nghaix rongt dluat. Dleuf Bex Yangx dob zhit muax luad ghok leuf, nenb leud nghaix plot sad lal lal boub. Dangb guas lob dleuf nat dous dous, lob dleuf ot dous dous, dob yaos nenb leud nghaix plot sad lal lob nenx leuf. Hnob nat, nenb leud nghaix plot sad lal duax zos dleuf Bex Yangx leuf.

Huaf nat, nenb leud nghaix plot sad lal fad dreudBangk juaf zhenf mol dit beus choud.

Mid Gud Luas zhit boub bangk juaf, zhit boub bangk juaf shid lol uat dlangb zhit; Lal zhit boub nenb leud nghaix plot sad lal, zhit boub nenb leud nghaix plot sad lal duax ndeuf nat uat dlangb zhit. Mid Gud Luas mol dit nenb leud nghaix plot sad lal. Haik khaod njangx, Mid Gud Luas yaos tlat dreud mol dit nenb leud nghaix plot sad lal. Mid Gud Luas sangd, daol leuf ib lob ndox zal, draod daol leuf ib lob ndox zhous, huaf nat, dol nenb cenb ret daol dout jaix nyongs nded daol dout duax lak! God dob uat naf leuf! God dob yaos dol naf muax 5 dos mid nyuas leuf! 5 dos mid nyuas it nzif hlob uat luax! Mid Gud Luas tlat dreud, nil sangd gad rens muab lob sod mongt nat haik khat nenb leud nghaix plot sad lal, haik khat cuat lenx cuat dol.

Mid Gud Luas nyaob touk tlat mol ndeuf nenb leud nghaix plot sad lal……Nil yaos ndout zheus njot mid kut, ndout zheus njot hod mid kut buab nenb, ndout zheus sangd muab yol lob nenx ghangb shab tab lob sod mongt yol dob uat naf nat haik khat keuk buab nenb boub ax!

Tlat dreud tlat dreud, Mid Gud Luas ndrel hlaot leuf. Nil draod sangd, god sob khat zhangd bloub ndos dus drout nil boub nid? Yaos sob khat nil god lob nenx ghangb shab, lal shik sob khat nil god uat naf leuf? Mid Gud Luas sangd, zhit guangd uat jangl haik, duab ras dob haik zhit dout aob tax sif.

Touk nat, nenb leud nghaix plot sad lal lal shaib bof dol Mid Gud Luas mol ret yol. Wef yaos ib blas nzhib khaod rongt shab, nil lob shab tlat uat bil bongl, let nat, nil lob plot zat dout yif huab sad, juas ngouk dlaif shab nbuat job shad.

Nenb leud nghaix plot sad lal duad jend dol bangk juaf, zangd aob druaf drout daof ndex, zhas zangd aob beb druaf drout daof ndex……Daol zangd zos ndeuf lob qeut zhos ghuak Mid Gud Luas dleb muax aob beb zhangf zeuf ndrel nghel lol leuf. Nil luas duab yus, zenf zouk dlangl ros, zeuf val hlaot bangk juaf……  

Seub!

 Ndrangl shuab zhens yenl.

Seub——Seub——Seub——

Dol bangk juaf gat touk yangt lob shuab ndraod zhit lox, dangb guas ndraod uat longs nzhex dangl. Nil ndraod mol dleb dleb zhas draod uat duas longt draod lol.

Seub——Seub——Seub——

Ndox chab shout ndrangl shuab lob shuab dongs khaod nzhex ndraod mol ndraod lol.

Seub——Seub——Seub——

Buab nenb shout ndrangl shuab juas let ib huaf dob hnaod dangl lob shuab nat leuf, dangb guas Mid Gud Luas zhit hnaod. Wef dak, nil zhos sangd dreud sob haik khat nenb leud nghaix plot sad lal lob bloub dus.

Dangb guas, Mid Gud Luas sex zhit zeuf hnaod lob shaub nat lak!

Mid Gud Luas ib shab sangd mol dit nenb leud nghaix plot sad lal renf cenb ret, ib shab sangd haik khat dex sod mongt yol lob nenx ghangb shab tab yol dob uat naf leuf drout nenb leud nghaix plot sad lal. Dangb guas, nil dob mol zhit dit nenb leud nghaix plot sad lal, haik zhit dout yol hod shab dex lol, touk nil shaib bof dol ghuk daof ghangb fad duax zeuf ib yangf zhit boub leuf.  

Mid Gud Luas ghous nghel mol leuf.

Zeuf uat nat, Mid Gud Luas ghous bongl drout shout dleuf Bex Yangx.

Zhit dout mol dit nenb leud nghaix plot sad lal, zhit dout ndros nenb leud nghaix plot sad lal renf cenb ret, zhit dout haik khat nenb leud nghaix plot sad lal yol lob nenx ghangb shab tab yol dob uat naf leuf……Nat yaos Mid Gud Luas lob shab zhit khuad. Hax muax, zhit dout draod shaib ib muas dleuf Bex Yangx, zhit dout ndros Dob Rod Nuaf haik ged shik njaif, zhit dout muab dex guat mil ghangb rib sangt drout mid nyuas……Nat yaos khaod Mid Gud Luas lox shab zhit khuad.

Mid Gud Luas but duab yus drout shout dleuf Bex Yangx.

Ndros Dob Rod Nuaf tlout leuf lob ndox zal, zhas draod tlout leuf lob ndox zhous gus zaof nyif lex nded, lob rongt nenx zeuf yuad kheb houd lak, dangb guas Mid Gud Luas dlangb zhit lal zhit boub leuf.

Dex nat dob yaos Mid Gud Luas lox shab zhit khuad.

 

11

Nenb loul yaos nyaob shout mid kut shaib bof Mid Gud Luas let. Mid Gud Luas drous nenb leud nghaix plot sad lal muax qaob drout shout dol bangk juaf dlob jit los.

Huaf gat, nenb leud nghaix plot sad lal luas uat muax plot nzas drout  dex nenb shout ged. Nil nzit dreud njoux, dex hnad dlangx zhit cix deuf les ndrout ndrouk, naf drox mid druaf mol drout ndeuf ib yif zhed houk jeud.

Dol luad qaob shout nenb leud nghaix plot sad lal dol bangk juaf buak yaos Mid Gud Luas? Nenb loul uat duab rongt shaib dreud, jot jot hout.

Nenb leud nghaix plot sad lal lob jed dob ngangs mol hod zhed houk jeud leuf, dangb shik nil dolbangk juaf zhenf deuf drout ndrout ndrouk.

Dol luad qaob shout nenb leud nghaix plot sad lal dol bangk juaf buak yaos Mid Gud Luas? Nenb loul maok maok khaod muas, draod uat duab rongt shaib dreud.

Yaos, yaos Mid Gud Luas, yaos Mid Gud Luas das!

Shaib leuf dangs hnob nenb loul zhit dout zhit lenl zaik lob bloub das nat.

Mid Gud Luas!

Nenb loul nyaob hod shab hot dreud, daof ghangb zhos hnaod daof ndex ib zhouk. Nil ghaix raos, buas druax dol njex sod sob let zhit dout ghous.

Nenb loul dous ged mol zhed. Ndeuf nil khaod muas sex dluab njab, nil yaos suak dreud ged let draod zos nil lob vangx zhed.

Ndox buak dlob leuf? Nenb loul sangd, ndox uat jangl haik dlob zeuf dlob nid? Nenb loul zaik dreud sangd. Sangd dreud sangd dreud, Nenb loul zeuf ghuax lak.

Mid Gud Luas zhit nyaob leuf!

Mid Gud Luas zhit nyaob leuf das!

Mid Gud Luas zhit nyaob leuf, Dob Rod Nuaf hax uat jangl dluat nid? Nil daof ghangb lob nenx yuad uat jangl tlout nid?

Zhit muax Mid Gud Luas, Dob Rod Nuaf daof ghangb lob nenx  langx tlout lak. Nenb loul sangd, yaos dak Mid Gud Luas zhenf uat nenx drout shout dleuf Bex Yangx zeux muax ndout zheus rongt ax!

Dangb guas, Mid Gud Luas zhit nyaob leuf das lak.

Nenb loul ghuax dreud sangd, Mid Gud Luas zhit nyaob leuf, lob bloub ndos nat uat jangl dob jat zhit dout drout dol mid nyuas boub. Dangb guas, nat yaos dlangs zhit dout dol mid nyuas let. Mid nyuas shik yaos yuad draod lol let, nchait zhit lex zeuf yuad lol lak. Mid nyuas draod lol god yuad uat jangl ndros nil haik nid? Nenb loul sangd, zeuf haik Mid Gud Luas hax jax drout shout dleuf Bex Yangx, jax dout rongt das nix; Haik nil tab Dob Rod Nuaf uat dout lob nenx rongt shab; Haik nil dob uat naf leuf, zhenf jaox dreud nil buab mid nyuas nyaob lob qeut dus dob zhit bof uat shit……Dangb shik jaod lol nat yuad uat jangl tab dol mid nyuas haik nid? Zeuf uat nad, nenb loul lol dreud guat muas, kheb houd sangd shaib yuad uat jangl dlangs dol mid nyuas.

Nenb loul zhit boub, mid nyuas dob lol leuf. Huaf gat dol mid nyuas zhenf ndrel dreud hod changd buaf uat gangb muas caik dreud nzhat nzhongd nil.                               

 

 
【 文章作者:熊玉有 熊… 文章来源:熊玉有 熊文国 点击次数:901 文章录入:hmongheu    责任编辑:hmongheu 】 
 
 【发表评论】【加入收藏】【告诉好友】【打印此文】【关闭窗口
 网友评论:(评论内容只代表网友观点,与本站立场无关!)
 
 

 

点击申请点击申请点击申请点击申请点击申请点击申请点击申请点击申请点击申请
| 设为首页 | 加入收藏 | 联系站长 | 友情链接 | 版权申明 | 管理登录 | 
云南网警


主办:文山州苗学会
Copyright 2007-2015 © 文山苗族 All Rights Reserved 滇公网安备 53262102000271号

苗山新事:侯 健 七彩苗山:吴德华 苗学研究:李维金 苗山音视:陶志文
苗文空间:张元奇 文学园地:陶兴安 苗山风谣:杨朝山
站长信息:QQ 464402767 邮箱464402767@qq.com 手机 15308766544
 站  长:张 元 奇..技 术:杨 永 平、许 东

信息产业部备案
滇ICP备15005284号