设为首页 加入收藏

用户注册· 联系站长 · · ·

>> 您现在的位置: 文山苗族网 HMONGB BANGX DEUS DEB >> 苗文空间 >> 文章作品 >> 正文
 
 

Dlex Tlout Ndrangl Shuab

文山苗族网 HMONGB BANGX DEUS DEB·[2018-4-15 16:52:08]

Dlex Tlout Ndrangl Shuab

河过沙原

翻译:熊玉有 熊文国

 

Nyaob touk dlex Bex Mux lob shuab dlex tab shuab ndos dlex baob ndraod duax, Wangf Qeub tab nil zid dob mol dleb leuf.

Shaib hod blouk blangd mol, beb zhos shaib nyaos bof ib nzhik nil aob dol lob jed dluab daof ghangb……

 

 

1

Wangf Qeub zid yaos dol nenb leud nghaix gus ndaot nbet laos cuat khaod, dangb guas nil dangd dus dob hlut bangt zos yol zhit muax ib dos dled leud nghaix jangb nyaos deuf drongx. Muab haik drout ib dos nenb leud nghaix, khaod lox yaos suk Wangf Qeub zid dex nenb leud nghaix nat, zhit muax ib dos dled leud nghaix jangb nyaos deuf drongx, ndeuf yaos ib khaod bongb shab das das.

Nil nat, Wangf Qeub zid dout muax ib dos dled leud nghaix hof shab leuf.

Nil hot Dlob Zis.

Wangf Qeub zid jaox dreud Dlob Zis nzhib nenb zeuf nos:

Shaib——god dol dled leud nghaix nat rongt let jangl? Haik khaod das——dod dled leud nghaix nat rongt let jangl?

Zos touk gus muab dol nenb nos uat deb rongt rongt Wangf Qeub zid let zhaot zhes.

Yaos dak lenx dus khuak Dlob Zis aob beb lot, Wangf Qeub zid zeux luas uat njoux ris lenl muab dol nenb gat jangb mol hod zhed, nyaob hod hob muab deuf dex nghaix luad ghok nghaix ghaib ghok langs nzhed, draod muab ib toud jeud dleub loul, yuad ndros nil houk ib ndif.

Dlob Zis suangf yaos ib dos rongt dled das. Nil lob nzhex khuk dout rongt, jed shab nchuat, dluad shongb laos, gangd jes nded, tlat dout shait,  shab lox shab ngal. Yif huab zhif nyaos haik let yaos, nil ib jed dlob jit nbluk, zhit muax ib zox bloub zuaf, suk let ib dlaif tent khaid nyik dlis hod khaod zok deuf lol.

Wangf Qeub lal nyaf drous Dlob Zis, lal jat shab Dlob Zis uat dol dled leud nghaix gus rongt zeud. Dous mol hod raol, yaos dak muax ib dos dled leud nghaix gus rongt zeud zaox dreud daof ghangb, dex nenb zeux ncheut shab nzhat shaib ros reul , ndout zheus muax guas ax! Dangb guas huaf nat, Wangf Qeub zhit yenf nongs nil zid uat gat khuak Dlob Zis, wef Dlob Zis zhit dout ndel dluat ib dos nghaix rongt raos——zhos ndel dluat dol buad luad ghok, nangl lax, nangl ndraox suangf dlangb zhit zid yeus!

Uat let, dangd dus touk nil zid khuak Dlob Zis, Wangf Qeub zeuf dak: Zid, gaox zhit dek sob khuak Dlob Zis——nil hax zhit dout ndel dout ib dos nghaix rongt raos. Daol Dlob Zis ndel dout ib dos nghaix rongt raos gaox let khuak nil!

Nil zeux ndel dout let! lenx zid haik, Wangf Qeub——gaox shaib dout, Dlob Zis zeux ndel dout ib dos nghait rongt let. Nil yaos ib dos dled leud nghaix rongt zeud! 

 

2

Ndos dlex Bex Mux pangb hnob duax muax ib dos ruax shuab, nil nblas del ndaot nbet laos. Let nat, ndeuf nad dex nenb dob bof dak, yaos lenx dus muab dout dol ruax shuab gat, lenx dus zeuf yaos dol nenb leud nghaix rongt nyaob shout ndrangl shuab.

Ndout zheus nenb leud nghaix sangd muab dout dol ruax shuab gat, dangb guas zhit muax dus uat zos.

 Shaib lol, nyaob shout ndrangl shuab nat nenb leud nghaix rongt zeud zhos muax Wangf Qeub zid lak! Khaod lox yif huab yaos, Wangf Qeub zid sangd jat Dlob Zis lob nbet ndaot——ndel dout dol ruax shuab gat,khat dout dak Dlob zis yaos ib dol dled leud nghaix rongt zeud

 

3

Zhit boub yaos nyaob huaf dus, Dlob Zis lal boub muax dol ruax shuab gat, zhenf duax shab drout nil hend. Let nat, Dlob Zis dex huaf  mol pangb daox hnob duax ntrad dol ruax shuab gat.

Dlob zis jend shait drox ndreuf, dol ruax shuab deut del yif huab zhit yaos dlaos dlis.

Wangf Qeub ndout ral shaib bof Dlob Zis nyaob shout dlex Bex Mux pangb daox hnob duax jout dol ruax shuab.

Dlob Zis tlat njet mol, dol ruax shuab gat hax zhit nchait nil, tlat uat nyox nyaot, ndros Dlob Zis ghuak dleb hof shif. Yaos dak Dlob Zis zhit leud njet mol, nil zeuf shot drox druaf, dis doub hout lol shaib Dlob Zis, rel Dlob Zis draod leuf njet mol……

Ruax shuab suk let ndros Dlob Zis uat shit.

Dlob Zis ndel zhit dout dol ruax shuab gat, daf shik nil zhit khuad shab, hax shik ib ras ras tlat mol daof ndos dlex Bex Mux, tlat mol shout  daox hnob duax shif dreud uat zos yol shab sangd.

Lob daox hnob duax ghuak lob raol zeuf dak muax xangt yif jait ged, dangb guas Wangf Qeub hax shik uat nax mol ndeuf gat. Nil nyaf shaib Dlob Zis nbob ruax shuab.

Ib ras nbob juaf dangl leuf, touk Dlob Zis wef uat zhit zouk yol shab uat shab zhouk nchik njaif ndeuf daox hnob duax, dol ruax shuab gat zeuf ndrel drout shout lob daox hnob duax nzhat shaib Dlob Zis uat jangl draod ghangb. Dol ghoud ndeuf suk let sangt ib dos gud luas, muax nzhik shed zhit doul. Yaos dak nyaob touk yuad zhouk ndox, lob naf hnob lab blongs suk let zeuf ndrel shout daox hnob duax ghuak zhit dleb, dol ruax shuab gat drous nbuad ngouk drout hod lob hnob. Ruax shuab zat uat dlob zis, nil zhit zangd zhit ghaix, suk let ib dos dluab buab ndrel drout hod changd ndox, shaib zhit dout minx los, zhos bof nil dol ghoud rangf. Nil uat jangl yuad gais uat luax.

Huaf gat, shout ndrangl shuab nzhas ghak dot, zhos hnaod ndrangl deut daox dex shuab dlex Bex Mux tab shab ndos dlex baob ndraod vox vongl.

Wangf Qeub ngouf drout khaod dleb, uat duab yus shaib nzhongd. Nil drous lob rangf ruas gat hef hangb leuf. Wangf Qeub boub dak, yol dob nyaf drous dol ruax shuab gat leuf, hax leuf ib lob shab heuf drout nil.

Muas ndout——

Muas ndout!

Shaib dreud shaib dreud, Wangf Qeub ghut deuf nil lob nbet.

Muas ndout!

Nad yaos Wangf Qeub nzod nyaob hod shab dob dik dout ib lob rongt nbet drout nil.

Wangf Qeub zangd dit dluat uat duab rongt shaib dol ruax shuab gat. Wangf Qeut shaib bof, dol ruax shuab gat ngeuf khaod muas nzhet shout daox muax aob xod bloub dlob, suk let khaod muas——nil ndout dluat luf dol ruax shuab ib ngeuf khaod muas ax——let nat, Wangf Qeub zeuf dik dout lob nbet Muas ndout drout nil.

Dlob Zis nyaob shout daox hnob duax nbob dol ruax shuab zhit lex zeuf jat hod raol dex nenb boub leuf. Hod raol dex nenb dak dol ruax shuab gat muab Dlob Zis dlangs uat shit.

Nad zeuf yaos nyaob shout Wangf Qeub zid lob plot blend blob. Wangf Qeut zid lob shab nyax zhit doul, nil suk let drous las deub luas zangx muas zhit doul.

God yuad guas hod raol dex nenb ib huaf keuk god duas zais! Wangf Qeub zid haiku at nyongx ghenl, Jat nil mex boub dout Dlob Zis yaos shout ndrangl shuab dol dlex leud nghaix rongt zeud!

Let nat, Wangf Qeub zid zad shab, zhit haik uat jangl lal yuad gad rens ndel dout dol ruax shuab gat, zhenf yuad yaos jat Dlob Zis ndel dout nil.

 

4

Ib gaob nbot dluat leuf, yaos lob rongt jaix leud nghaix. Wangf Qeub zid fad dreud nil dol bangk juaf, jaox dreud Dlob Zis mol daox hnob duax ndel dol ruax shuab.

Jid hnob daof ghangb, Wangf Qeub zid muab dol ruax shuab gat ndel lol hod raol leuf das.

Ruax shuab yaos Dlob Zis ndel dout let——muax jid dol nenb hod raos khat dout——nil mex shaib nzhongd Dlob Zis muab ruax shuab nak drout bes deb.

Draod daox hnob duax lol, Wangf Qeub zid muab dol ruax shuab geut drout hod vangx changd buaf.

Shaib dreud dol ruas shuab drous ndel, hod raol dex nenbkhuak ncak Wangf Qeub zid, yif huab khuak ncak Dlob Zis.

Wangf Qeub zhaot geuf lol zhed shaib bof dol ruax shuab.

Huaf gat, dex nenb hod Wangf Qeub yif changd buaf zhenf zhit dout mol.

Wangf Qeub zid ndrel drout hod changd buaf ndruab ndrangb, zhenf nongs dreud dex nenb khuak ncak nil tab Dlob Zis, shout plot muax plot ncak.

Wangf Qeub ngouf drout buab nenb daof ghangb, shaib dreud dol ruax shuab gat.

Muas ndout——Muas Ndout, god dol Muas Ndout!

Wangf Qeut hod shab ghut hot zhit dot.

Ndeuf yaos ib dos ruax shuab ndout zheus kaod kaot ax! Dangb guas nil nat ghous leuf!

Wangf Qeub touk nat, Wangf Qeub zid shaib bob dol dob ngouf drout nbaox nenb daof ghangb, Shait lol shaib——Dlob Zis ndel dout dol zhax ghok lox leuf——dus sangd zos, nil ndel dout let yaos dol ruax shuab ot ax! Hax, beb dol Dlob Zis…… God haik dluat, beb dol Dlob Zis zhit dlaos dlis das!

Wangf Qeub uat duab yus, sex shaib dreud dol ruax shuab.

Wangf Qeub, gaox shait lol shaib ak! nil zid draod haik.

Wangf Qeub zhit uat shuab.

Huaf nat, Wangf Qeub zhos hnaod maob shab tab langx nyaob. Nil nyaob dleb dleb shaib nzhongd dol ruax shuab, nyaob hod shab haik: Muas Ndout……Muas Ndout uat jangl zeux ghous leuf nid? Nil yaos ib dos ruax shuab ndout zheus gais yenl kaod kaot ax! Muas Ndout yaos zhit zeux ghous let ax! 

Wangf Qeub shid ros jat yol dol shab nghel lol. Zeuf dak dol ruax shuab yol khuak ncak dob ghous leuf, dangb shik Wangf Qeub hax shik yuad shaib shaib nil, uat duab rongt shaib shaib nil!

Wangf Qeub mol dit ruax shuab……

Ib blas, Wangf Qeub bof muax ib yangf dlangb zhit.

Dex nenb zhenf khuak dreud nil zid tab Dlob Zis zhit dot.

Wangf Qeub njaif leuf ruax shuab, dis raos lol ndeuf nil zid houd ndex.

Beb yif dol Dlob Zis……Wangf Qeub zid zhenf sangd tab Wangf qeub khuak nil dol dled leud nghaix, dangb guas lol dob haik zhit dangl, nil ib blas muab caik lot lol daof ghangb shout draod mol leuf, zhos yaos shaib ndrox ndrenl dol dob lob plot.

Zid, yaos Dlob Zis ndel dout ruax shuab let mad? Wangf Qeub nos nil zid.

Ndeuf hax muax juad? nil zid deb.

Zid, gaox nongs god haik, Dlob Zis ndel dout ruax shuab, dangb guas zhit yaos nil ib dos let dlangl ros! Wangf Qeub shaib dreud nil zid.

Uat jangl zhit yaos nil ib dos let dlangl ros! Yaos Dlob Zis nil ndel dout let——muax ndout zheus nenb shaib nzhongd nix! Lenx zid dex shuab lol haik uat nplaik nplad, Nil mex khat nyaos dout khaod das!

Ndel dout ruax shuab, zhit yaos Dlob Zis duab dos let dlangl ros. Wangf Qeub shuab lol lal deud nguad.

Wangf Qeub gaox zhit sangd jat dex nenb dob khuak Dlob Zis zhit dlaos dlis? Zhit sangd jat dex nenb dob haik Dlob Zis yaos dol dled leud nghaix rongt zeud mad? Lenx zid lob plot ib blas zat uat nzhuab sab.

God jat shab. Wangf Qeub haik, Dangb guas yuad yaos shid yol  dlangl ros!

Wangf Qeub! Lenx zid ghut ntaot.

Wangf Qeub zhit uat shuab leuf. Nil muab gangb muas nzhat drout shout dol ruax shuab caik deut daof ghangb——ruax shuab shout caik deut daof ghangb muax ib lob khaod shangb luax lob ndit zhenf baif nchangd nzhuad. Bof los das, ndeuf gat yaos bangk juaf nbleuf let.

 Lob khaod shangb gat khat dout dex nenb——yaos Wangf Qeub zid ndouk shangb ruax shuab daof leuf Dlob Zis let ndel dout nil let.

Dluat leuf ib njuak, Wangf Qeub muab gangb muas nzhat shaib ruax shuab lob khaod shangb dis lol drout shout nil zid lob plot.

Zid, yaos gaox bangb drous Dlob Zis!

Lenx zid zhit uat shuab, muab plot dis mol ib shangb.

Zid, gaox haik——yaos gaox bangb drous Dlob Zis! Wangf Qeub zhas haik.

……

Zid, gaox haik lol ax!

Lenx zid hax shik zhit uat shuab.

Dex nenb hod changd buaf dob nzhat nzhongd Wangf Qeub zid.

Wangf Qeub zid zhit uat shuab hlaot. Nil lob plot chent nyaot zhit dot.

Zid, gaox haik lol ak! Wangf Qeub shaib nzhongd nil zid ndrox ndrenl, Zid, gaox haik lol!

Hod changd buaf nzhas dot.

Yaos……Yaos god bangb drous Dlob Zis. Tlout leuf dangs hnob, Wangf Qeub zid let haik lol.

Touk haik lot lol nat, Wangf Qeub zid maob shab zhit doul.

Gaox wef let jangl yuad bangb ceub Dlob Zis? Gaox wef let jangl zhit jat Dlob Zis nil ndel nil!Wangf Qeub nos.

……   

Gaox wef let jangl yuad bangb ceub Dlob Zis? Gaox wef let jangl zhit jat Dlob Zis nil ndel nil! Wangf Qeub lob shuab nos zhas nghangt shab duax.

Wangf Qeub, yaos zid uat zhit hof……Uat nad uat, beb sob zhit duat dol ruax shuab nat——jat gaox lol yos nil…… Wangf Qeub zid haik lol ib dlais dlais, Muab nil yos rongt, zos huaf gat, draod hot Dlob Zis ndros nil shik bed!

 

5

Buab nenb dob sangf dangl, dangb guas Wangf Qeub zid hax zhenf ndrel duab yus hod changd buaf.

Zid…… Wangf Qeub shaib nzhongd lenx zid.

……

Zid, dex nenb mol dangl leuf. Wangf Qeub haik.

 ……

Zid, dex nenb dob mol dangl leuf. Wangf Qeub zhas haik.

Ox…… Tlout leuf dangs hnob, Wangf Qeub zid deb uat mok ghok dreud, Dex nenb dob mol leuf lak?

Dob mol leuf…… Wangf Qeub haik.

Wangf Qeub zhenf sangd haik dlangb zhit, dangb guas nil zid zhit dout nongs. Lenx zid draod mol hod zhed muab dout zas ndongt, nzhat hlut tab ib cat juab yenx, nghel del uat nguax ndongt drout ruas shuab.

Wangf Qeub sex nyaob ib pangb shaib dreud.

Lob nguax ndongt nat uat dout lox tab dlangd los.

Nzhat dangl dol nzhat hlout nzhat nguax souk ghangb, lenx zid haik drout Wangf Qeub dak:

Wangf Qeub, gaox uat jangl dob yuad yos rongt dol ruax shuab nat.

……

Yaos nil muax ib shab aob nghel, god raox zhit dout gaox! Lenx zid draod haik.

…… 

Wangf Qeub shaib dreud nil zid, sex zhit uat shuab.

Wangf Qeub, gaox nongs dout——gaox yuad dout yos rongt dol ruax shuab nat! Lenx zid ib blas hut sheud lol, Daol dol ruax shuab nat khaod shangb rongt hod leuf beb let haik!

Zid, god zeux yos rongt dol ruax shuab nat let! Wangf Qeub haik lol leuf.

Wangf Qeub uat jangl dob yuad yos rongt dol ruax shuab nat. Nil jat zhit dout dol Muas Ndout gus nil hmaod heuf jeuf yongx yif uat nad ghous nghel mol.

 

6

 Zix nat, Wangf Qeub nghel del drout shab bob yos dol ruax shuab nat.

Ruax shuab nyaf naox nghaix, let nat, cuat hnob zhaot geuf dangl Wangf Qeub dob mol ndel nangl lax drout nil, duat ghaib shuab……Wef jat nil lob khaod shangb rongt shait nzhik, Wangf Qeub nyaob hod dex khoud naox xeut ib jaod chuax dleuk vongl.

Zeuf dak Wangf Qeub uat nat yos nil, dangb guas ruax shuab ib nzhik zhit bof doul sheud lol, khaod shangb zhenf zhit bof rongt ib nzhik.

Muax ib hnob, lenx zid bof Wangf Qeub xeut chuax dleuk vongl drout ruax shuab, haik zhuas blil dak: Gaox shid dex nat yaos chuax dlangb zhit? Daof ghangb, lenx zid nyaob hod hnangb chaot trot deuf ib lob mid fub doub, loub deuf ib cat chuax nzhat jed drout Wangf Qeub, Cuat hmaot gaox nyaob hod dex khoud xeut aob beb nblaik, zhit yuad caik hlit, nil khaod shangb zeuf rongt shait lak!

Dluat leuf nghaix, ruax shuab zhit nyaf naox luf yangf, dangb guas Wangf Qeub beb bloub hnob lal nzhab zhit dout ib dos nangl lax. Touk nat, lenx zid duat dout luad ghok, ghaib ghok dex nat dob sob laif drout ruax shuab, jat nil naox zhout.

Wangf Qeub sangd dak nad yaos lenx zid zhit nzhens shab nil, zeuf haik drout lenx zid dak: Zid, gaox zhit dek draod bob ruax shuab lak, god yos nyaos rongt nil. 

Dangb guas lenx zid zhit nyaf dous Wangf Qeub.

 Zid, god yos nyaos rongt nil! Wangf Qeub draod haik.

Gaox nchait dak god yaos bangb gaox yos ruax shuab? Lenx zid haik uat nyaok gheul, God yaos sangd jat nil shait nzhik rongt sheud lol, jat nil gad rens muax ros sheud lol, hot Dlob Zis draod nzhab dout nil——haik khat gaox, god yaos wef lak god dol Dlob Zis!

 

 

7

Yos nil dluat leuf ib ndot jaix nyongs , ruax shuab lob jed tab shab guas ghoud rangf suk let rongt juas daof ndex ndel dout leuf.

Nyaob hod lob ndox zhous nad, Wangf Qeub zid uat nax jaox dreud Dlob Zis mol cuat khaod leud nghaix ghox. Dlob Zis jed hlob shab leuf ndout zheus, ndos leuf ndout zheus, lal hlob dout yif huab del ndreuf shab ngal. Haik nyaos dout dak, nil dob yaos ib dos dled leud nghaix rongt zeud leuf.

Zid, yaos jaix lak——jat Dlob Zis ndros ruax shuab shik dud max! Wangf Qeub sangd dak Dlob Zis tab ruax shuab dlangl ros dob shik zis leuf.

Lenx zid shaib shaib ruax shuab, jot jot hout.

Zid, yaos jaix lak——jat Dlob Zis ndros ruax shuab shik dud max!  Jid hnob daof ghangb, Wangf Qeub draod ndros nil zid haik.

Wangf Qeub dob daol zhit doul leuf.

Lenx zid shaib shaib ruax shuab, zhas jot jot doub hout.

Lenx zid yuad zos touk dus let jat ruax shuab tab DLob Zis shik dud nid?

Wangf Qeub daol ghak nzhongd.

Zhas tlout leuf ib ndot jaix, Wangf Qeub daol dob daol zhit doul das leuf, zeuf ndros lenx zid haik:Zid, gaox sex dek zhit jat nil aob dos shik dud, yaos nchait Dlob Zis zhit hend baf? Shaib nyaos deuf , Dlob Zis dob yaos ib dos dled leud nghaix rongt zeud leuf!

God nchait Dlob Zis zhit hend? Lenx zid shaib dob zhit shaib Wangf Qeub ib muas, God yaos shaib ruax shuab lob jed tab shab guas ghoud rangf zhenf zhit dout rongt hod shit. God yaos daol ruax shuab lob jed tab shab guas ghoud rangf rongt hod shit let jat Dlob Zis ndros nil shik dud! Haik khat gaox, zhit dek bob ruax shuab njuad maos maod nblex dex nat, draod ndout ndel jid dol ghaib ghok drout nil!

Uat nat, ib lob ndox zhous zeuf tlout mol lak.

Zos touk lob baod daox dex ndraox hlangd goul nzhuab leuf, dlex Bex Mux shuab dlex ndraod ril ril rual rual, Wangf Qeub zid shaib lak shaib ruax shuab, haik drout Wangf Qeub dak:

Dout lak, ruax shuab doul lak! Jat nil ndros Dlob Zis draod shik dud baf!

Wangf Qeub daol zos lob jaix nat leuf.

Lob hnob zhenf zhit dout deuf duax, Wangf Qeub nil mex zeuf njaif leuf hod raol ngangs mol hod ndrangl shuab.

Wangf Qeub jat nenb muab lob nyuas cheb luad hait dreud ruax shuab, Wangf Qeub zid jaox dreud Dlob Zis, dex nenb hod raol zaox dreud daof ghangb.

Mol zos hod bleud ndrangl shuab, Wangf Qeub guas lob nyuas cheb luad ndrel jat, haik drout lenx zid dak:

Zid, zeuf nyaob ndeuf nat baf.

 Zeuf nyaob ndeuf nad baf. Wangf Qeub zid ndrel jat.

Dex nenb hod raol dob ndrel jat leuf.

God sob zhaot ruax shuab. Wangf Qeub haik.

Gaox sob zhaot. Lenx zid haik.

Daof ghangb gaox let ndeul ndas zhaot pluad Dlob Zis. Wangf Qeub haik.

God zhit zeux jat ruax shuab zhif kueb. Lenx zid haik.

Wangf Qeub kheb hlaot lob nguax ndongt khaod drongx.

Ruax shuab blox blongs ib blas, deuf bleul nguax ndongt. Ndox zhoux tlout leuf, nil draod ghangb dout ged yeux shab. Ruax shuab nqok nqok jed, tlat mol daof ndex. Tlat mol ib njuat, nil ndrel jat, dis hout draod lol nzhat nzhongd. Nil nchait yaos nzhat shaib Wangf Qeub, lal nchait yaos nzhat shaib Wangf Qeub zid, lal nchait yaos nzhat shaib Dlob Zis, lal nchait yaos shaib dex nenb hod raol……Uat nad shaib leuf ib njuak, dis jed tlat drout daof ndex leuf.

Daof ndex yaos ndrangl shuab dlangd faot.

Muas Ndout——god dol Muas Ndout! Ral nat zeuf shaib gaox lak! Zhit muax las luf dol ndros, ral nat zeuf shaib gaox lak! Shaib nzhongd ruax shuab mol dleb rox rol, Wangf Qeub hod shab uat duab yud haik.

Ruax shuab zhid leuf, Dlob Zis nyaob hod lenx zid caik del uat shab ndreuf nzhaos.

Wangf Qeub haik drout nil zid dak:

Zid, zhaot nyaos Dlob Zis lak baf!

Lenx zid zhit dout uat shuab.

Zid, zhaot nyaos Dlob Zis lak baf! Wangf Qeub draod haik.

 Lenx zid hax shik zhit dout uat shuab.

Zhaot Dlob Zis baf, zid! Shait zhaot Dlob Zis! Wangf Qeub yaos uat shuab ghut leuf, Uat nad zhit shik zis drout Dlob Zis leuf!

Lenx zid hax shik zhit dout uat shuab.

Uat nad zhit shik zis drout Dlob Zis leuf! Wangf Qeub draod ghut ib naf shuab.

Jat Wangf Qeub uat jangl ghut, Wangf Qeub zid uat jangl dob zhit dout uat shuab.

Daol zos ruax shuab blox leuf , Wangf Qeub zid let zhaot pluad Dlob Zis,

Dlob Zis suk let dol sob yangt bleul, tlat mol daof ndex.

Huaf gat, Dlob Zis boub dout yangf dlex nof nil yuad dout uat.

Daof ndex yaos ruax shuab, daof ghangb yaos Dlob Zis, shout ndrangl shuab ib ras shik nbob shik dud kheb houd lak.

Dex nenb zaox dreud Wangf Qeub tab Wangf Qeub zid, tlat mol drout shout lob qeut shab bof dleb.

Dlob Zis zaox dreud ruax shuab nend deut jout njet mol.

Ruax shuab shab ngas, nil dangb tlat mol shout qeut shab, wef ndeuf yaos angd khuad, zeux jat yol drox druaf shib shait. Dangb guas ndox chab angd shuab paob hend, ndraox shuad zhenf zhit dout hlob shab, let nat, jat ruax shuab lob shab sangd uat jangl dob uat zhit zos. Zeuf dak nyaob shout ndrangl shuab lob qeut shab, ruax shuab tlat drox dus dob zeux hangf drout hod shuab leuf, zhes muax dex nend deut gus hangf dob dob.

Dlob Zis tab ruax shuab shik ghuak yif uat yif ret.

Zeuf dak uat nad, ruax shuab hax shik shid dangl dlangl ros yuad laif zhes Dlob Zis.

Dlob Zis nbob njet mol, ruax shuab ib dis jed, laif zhes Dlob Zis; Dlob Zis draod nbob njet mol, ruax shuab zhas ib dis jed, draod muab Dlob Zis laif zhes……

Dangb guas Dlob Zis uat jangl dob yuad uat dad yol lob shab sangd, nbob leud zhit zhes.

Daof ghangb, ruax shuab draod uat jangl dis jed dob zhit muax ghangb hout leuf. Dlob Zis nbob juas ruax shuab rox rol. Shaib lol, ruax shuab draod sangd laif zhes Dlob Zis yaos langx uat zos uat luax.

Jid lob hlit jaix nyongs, Dlob Zis hlob shab leuf, jed ndos leuf, lal yif huab shab ngas del ndreuf leuf. Ruax shuab khaod shangb zeuf dak rongt leuf, dangb guas nil lob jed zhenf muax nzhik muas, draod juab dout jid lob hlit dob drous muab geut drout hod nguax ndongt zhit shid del deut, huaf nat ndros Dlob Zis shik dud, nil muax nzhik ros zhit dreuk shab das.

Dlob Zis ndros ruax shuab ndot ged shik ghuak duab lot rox rol, duab lot rox rol……

Hax, god dol Dlob Zis! Mex shaib god dol Dlob Zis! Wangf Qeub zid ghut uat ntoub shab laos, God dol Dlob Zis, shait ndel dout dol ruax shuab! Zhit dek jat god shab ndreuf lak!

Dangb guas, zeuf nyaob touk Dlob Zis shaib mol yuad nbob juas ruax shuab, ib blas daof ghangb tlat deuf pub dled leud nghaix——gouf ndout dol dled leud nghaix. Nil mex chuaf drout hod Dlob Zis tab Ruax shuab ndruab ndrangb——gouf ndout dol dled leud nghaix lal duax nzis hout drout hod ral zhod draos ndel ruax shuab nat.

Pub dled leud nghaix nat uat chenx ib zox sod draos sangd, duax beb pangb muab ruax shuab buad dout.

Pub druas baob nat! Pub druas baob nat! Wangf Qeub zid nbout deul nab muab lob ndris nyif jend jend ndraod uat ghox gheux. Nbaox druas baob nat……Bual leuf god Dlob Zis jel naf nof! Hof duat lol naox nghaix das!

Pub dled leud nghaix sangd nzhab dout ruax shuab, dangb guas lal bangb drous leuf ruax shuab——nil mex buad dout ruax shuab, lal taid leuf Dlob Zis dreuk nbob zox ged.

Daol Dlob Zis tlout dluat pub dled leud nghaix, ruax shuab dob nzent leuf ib lob daox shuab, tlat dleb dleb.

Laif zhes pub dled leud nghaix, Dlob Zis draod dreuk nbob dluat.

Pub dled leud nghaix zaox dreud Dlob Zis daof ghangb.

Touk nat, dled dex shuab ghuax ndraod ncet ncat ib lob ndrangl shuab.

Daof ghangb yaos dled leud nghaix Dlob Zis, zhenf muax ib pub dob bangb ceub. Ruax shuab tlat mol daof ot daof nat, tlat mol shout daox shuab zhas draod ngangs hod khaod hangd, tlat deuf khaod hangd zhas draod tlat mol shout daox shuab……ndros nil mex did deuf uat guas nzas. Dangb guas, ruax shuab yuad sangd laif zhes nil buab, ndeuf dob yaos yangf nof uat zhit dout leuf.

Dlob Zis yuad zeux ndel dout dol ruax shuab gat let! Wangf Qeub zid ghut naf shuab.

Dlob Zis zhenf shid ros dreuk nbob, pub dled leud nghaix lal zhenf shid ros dreuk nbob.

Zhit dek shaib pub dled druas gat xuax tlat, nzhab dout ruax shuab let hax shik yaos god dol Dlob Zis! Wangf Qeub zid shaib shaib dex nenb ib njid ndos haik, Hax shik yaos god dol Dlob Zis!

Ruax shuab tlat dreud, tlat dreud……suk let zhit chuak shait leuf. Nil tlat mol daof ot daof nat, tlat mol shout daox shuab zhas draod ngangs hod khaod hangd, tlat deuf khaod hangd zhas draod tlat mol shout daox shuab……Daof ghangb, tlat draod ndos dlex Bex Mux——nad yaos nil ghangb deb ghuat qeut.

Ruax shuab zaox dreud ndos dlex Bex Mux drangs tlat. Nil muab drox druaf zhaot ghenb, ib shix dis lol nzhat shaib ndos dlex, suk let dreuf ntrad ib yangf dlangb zhit.

Wangf Qeub shab jend hend. Nil sangd, Muas Ndout shab ngas, gaox uat jangl zhit tlat drout daox shuab ax——tlat mol ndeuf gat rongt  ngouf ib tangf ax!

Dangb guas ruax shuab zaox dreud ndos dlex drangs tlat.

God dol Muas Ndout, gaox yaos sangd zhous ros nded droutlob ghangb deb ghuat qeut yos gaox mad? Wangf Qeub hod shab langx nyaob ib rangs.

Hex! Zhid zhit dlif lak! Ruax shuab zhid zhit dlif lak! Wangf Qeub zid ghut ib naf naf shuab.

Ruax shuab tlat drout daof ndex, daof ghangb yaos Dlob Zis. Pub dled leud nghaix zhas nyaob Dlob Zis daof ghangb, nil mex hlod mol uat ib zox sod, suk let drous dlangb zhit cuat yangf nghol dreud, uat get zangd drout daof ndex.

Dlob Zis ghuak ruax shuab dob zhit muax bes zheus dleb leuf.

Muas Ndout, shait zhid ax! God dol Muas Ndout, shait drangs ax, Muas Ndout! Wangf Qeub nyaob hod shab ghut dreud, zhenf wef nil dol Muas Ndout juab ros. Wangf Qeub zhit nzhens nil dol Muas Ndout zeux shub leuf.

Dangb guas huaf nat Dlob Zis zhos ghuak ruax shuab jid druaf dleb lak. Muab haik drout ruax shuab, zouk nchait leuf das das.

Tlat dreud tlat dreud, tlot zos shout ndos dlex ib lob qeut shab, ruax shuab ndrel raos drox druaf. Dlob Zis jenb drous, lal ndrel jat tab. Pub dled leud nghaix duab blas nzhoud raos njet lol.

Beb pangb dob yaos dled leud nghaix, muax ib pangb yaos dlex Bex Mux, ruax shuab ndrel drout shout ndos dlex.

Muas ndout, god dol Muas Ndout! Huaf nat, Wangf Qeub zhos zeux nyaob hod shab uat nat ghut leul zhit dot. Shaib lol, ruax shuab yaos zhit muax ged zhid lak.

Huaf nat, zeuf dak ruax shuab ghous nghel mol, Wangf Qeub lak  khuak ncak nil, nyaob hod shab khuak ncak nil.

Ndrouk ghouf dub dreud dlex Bex Mux, ruax shuab ndrel duab yus drout ndeuf gat. Nil shaib dreud Dlob Zis, shaib dreud pub dled leud nghaix.

Pub dled leud nghaix muax dex rouf dreud, muax dex ndrel dreud, muax dex puab dreud……Uat dout ib rangx sob shab muab ruax shuab buad drout hod ndruab ndrangb. Ib rangs shuab ghuax juas let yaos ndraod hod rangx sob cangx deuf lol.

 Daof ghangb, dlex Bex Mux lob shuab ndraod ril rual, shuab ndos dlex baob vout lal ndraod vel vongl.

Ruax shuab drous leud mol drout hod qeut duas.

Huaf nat, muab haik drout jaod dled leud nghaix, nzhab dout ruax shuab zhos yaos ib jeuk pleud, dangb guas nil mex zhit dreuf deuf del, suk let yaos sangd uat duab rongt shaib shaib nil mex hod del dol nghaix nyaob uat ndex touk yuad duas rongt let jangl.

Wangf Qeub sangd tlat mol bangb ruax shuab ndit dlif khaod qeut duas, dangb guas nil zhit dout uat gat uat, nil sangd dak uat gat uat yaos shaib zhit doul Muas Ndout.

Ib pub dled leud nghaix dob nzhat nzhongd ruax shuab ndrox ndrenl, hod khaod muas lab kad goul hnad nzit nyangl. Dangb guas ruax shuab zhit muax ib nzhik nchait hlaot, lal nzhat nzhongd dled leud nghaix ndrox ndrenl.

Dled leud nghaix nzhat nzhongd ruax shuab, ruax shuab lal nzhat nzhongd dled leud nghaix.

Zeuf uat nad, ib dos ruax shuab tab ib pub dled leud nghaix did deuf dreud.

Dlex Bex Mux lob ndox chab dlex ndlul ndlangk ndluat, ndlul dlaos yongk nzas. Dlex ndlul youl nzhout dex roub shod roub shuab tab lus rangx dif ndos. Dex angd ndeuf ndos dlex ib blas baob vout, shuab ndraod vox vongl……Nblaif dlex dlangd faot nzuax nzas, ndangb dreud ib beus jes khuad tab ndraox shod. Dex jes khuad tab ndraox shod ib blas shik shout, ib blas sangd leuf, sangf leuf zhas draod shik shout, uat dout ib lob lob mid Drongb Deul.

Deuf dreud nzhat shaib dluat leuf, dled leud nghaix nghel del lak. Nil mex zangd mol daof ndex, goux qenb buad taid ngouf yout rox rol, ib nzhik ib nzhik……

Huaf nat, muax ib dol dled leud nghaix suk let ntluad leuf jel dlex nof nat, pleud ncak daof ndex sangd yuad khaod uat dout. Lal nyaob touk dol dled leud nghaix pleud hlaot, ruax shuab uat jed shib shib ib pleud, ib blas tlat hlaot ndeuf ndos dlex, nghol deuf ib zox sod nkouk rongt ngoux, jat let bongb druax ndrenl drout shout ib beus drongb deul.

Pub dled leud nghaix ndrox muas hlaot, puab hangb nod drout shout ndos dlex shaib dreud dol ruax shuab mol dleb leuf.

Ruax shuab dlif leuf ged nchait!

Dangb guas, zeuf nyaob touk nat, Dlob Zis lal duab jeuk pleud, tlat hlaot ndos dlex, bongb drout shout luf beus drongb deul.

Pub dled leud nghaix ghux uat nchot ghens. Muax jid dol dled leud nghaix lal sangd pleud njaif ndos dlex, dangb guas shif leuf jid ral, draod shout zhes drox druaf, toub ghangb draod leuf, zhos yaos deuf dreud dlex  ndlul ghuax leul jid shuab.

Drongb deul nbaox laos ib shot ib shangt, shik shout shik faib, njis ghak lenl, shik ndrout dreud, daos drout hod dlex zhas ndangb deuf lol, ndangb deuf lol zhas draod daos mol hod dlex……

Dlob Zis nyaob shout lob drongb deul daof ghangb, ruax shuab nyaob shout lob drongb deul daof ndex. Aob lob drongb deul nyaob shout dlex Bex Mux njis lox lenl, ndangb ghak laos.

Shout drongb deul, ruax shuab tab dlob zis yaos ndrel dol yenl.

Ruax shuab tab Dlob Zis, ib dos yaos daol jaix zhid dlif draod mol ndrangl shuab uat yol lob nenx, ib dos yaos daol jaix muab luf dol duat duas. Dangb guas touk nat, nil aob dob yuad dout did deuf dol Bex Mux ndlul dlaos jex ghangb got deut——haik zhit dout ib ntud dlex dus zeuf zeux muab nil aob lens nbluad drout hod dlex deuf zhit lol leuf.

Dangb guas, nil aob dos zhit dout ghuax ib shuab.

Huaf nat dob yuad zhouk ndox. Changd ndox yeuk hangd fongt lab ndruab ndos, fongt lab leuf dlex Bex Mux, lal fongt lab leuf dex drongb deul shout dlex Bex Mux.

Dex drongb deul drous changd ndox yeuk hangd fongt lab jaox dreud shuab juat ghuax vub, yangt nzox ghak nzas.

Dlob Zis tab ruax shuab nyaob shout dlex Bex Mux ndangb leuf haod nded jaix nyongs, ndagnb leuf haod dleb, dus dob haik zhit dout.

Wangf Qeub, Wangf Qeub zid tab dex nenb hod raol nyaob shout ndos dlex Bex Mux tlat dreud, nbob dreud drongb deul, nbob dreud ruax shuab tab Dlob Zis shout drongb deul.

Touk nat, muax ib jaod drongb deul ib blas shik shout lol ndeuf ruax shuab ib njis. Ruax shuab zhit sangd dlangb zhit, duax beus drongb deul nad pleud mol drout beus drongb deul daof, zhas pleud beus daof mol drout beus dif……daof ghagb duab pleud njet mol drout shout ndos dlex leuf.

Ruax shuab dex deut del nat ndreuf shait uat luax.

Dlob Zis shout shab laos drout shout ruax shuab lob jed, zhit dout daol nil sangd rongt, dex drongb deul zeuf ib blas ndangb lenl, ib blas ntuad luas, suk let dex huab ndangb hod juat……Dlob Zis zhenf ndrel dreud shout lob drongb deul, ndangb mol ndrangl ghangb.

Wangf Qeub sex tlat ndeuf ndos shaib bof khaod nat, Wangf Qeub zid shaib bof khaod nat, dex nenb ib huaf dob shaib bof khaod nat.

Ruax shuab Muas Ndout! God dol ruax shuab Muas Ndout!

Wangf qeub ntoub shab laos pleud sheud lol.

Muas Ndout, God dol Muas Ndout!

Wangf Qeub teux ib ras muab Muas Ndout lob nbet nat hot keuk nil zid nongs, hot keuk dex nenb hod raol nongs, hot keuk dlex Bex Mux nongs, hot keuk ib lob ndrangl shuab nongs.

Ruax shuab tlat mol drout shout ndos leuf, dis hout shaib shaib dlex Bex Mux, shaib shaib dex drongb deul uat nbaox uat beus ndangb mol dout yongk nzas, shaib shaib Dlob Zis ndrel drout shout drongb deul, draod shaib shaib lob ndruab ndos gus drous changd ndox yeuk hangd muab fongt lab……Daof ghangb tlat drout hod ndrangl shuab leuf.

Dlob Zis ndrel zal ral shout lob drongb deul, shaib ruax shuab tlat mol shout ndos, nil ghuax leul ib shuab nded longt——nil boub dout, zhes drout yol let yaos ib khaod bongb shab lex nded.

Dlob Zis lob shuab ghuax yaos bongb shab, yaos kub shab, yaos langx nyaob……Dangb guas zhit muax ib nzhik maob shab.

Hod dlex Bex Mux, drongb deul uat nbaox uat beus ndangb leul.

Dlob Zis leud dreud dex drongb deul mol dleb dleb rox rol.

Changd ndox yeuk hangd shout gangb jit souk ghangb. Huab lab  blox longs, ndox lal zhouk nghel lol. Dlex Bex Mux zat uat dlob ghak njab, zhit nchot ghak ghens, suk let zhit ndlul leuf.

Dex dled leud nghaix ndeuf ndos ib huaf dob shaib nzhongd pangb Dlob Zis mol dleb leuf. Nil mex zhit dof leuf, zhos yuat duab yus muab khaod muas sangt dreud dol luas mol dleb.

Dlob Zis——

Touk nat, Wangf Qeub zid sex ndrel ndeuf ndos dlex ib blas ghut dak:

God dol Dlob Zis……

Ghut dreud, Wangf Qeub zid zaox dreud ndos dlex jout njet mol. Jout mol ib ndot, draod jout mol ib ndot, daof ghangb, Wangf Qeub zid ghous drout shout bes deb.

Wangf Qeub zid boub dout, nil jat let nblangf leuf Dlob Zis.

Dlob——Zis——

 Dlob——Zis——

Shout gux dlex Bex Muxd dlangd faot, shout ndrangl shuab blox longs, Wangf Qeub zid lob shuab ghut zal ral ncet ncat blox longs.

 

9

Jid hnob dluat leuf, dex nenb nyaob dlex Bex Mux ghangb dles ntrad dout Dlob Zis. Nil but duab yus shout beus shuab dleub bous.

Wangf Qeub zid buas sheud Dlob Zis, ghuax lak.

 Daof gangb ndraod duax dlex Bex Mux lob shuab ril rual tab ndos dlex baob vout lob shuab vel vongl.

Wangf Qeub, dol ruax shuab gat hot Muas Ndout baf? nil zid nos.

Wangf Qeub zhit uat shuab.

Muas Ndout deud del! Nil zid haik.

Wangf Qeub hax shik zhit uat shuab.

Muas Ndout deud del! Nil zid draod haik.

Wangf Qeub shaib nzhongd khaod dleb.

Wangf Qeub…… Lenx zid hax sangd haik dlangb zhit.

Zid, Dlob Zis……yif huab chenx! Wangf Qeub haik hlaot deuf lol, Dlob Zis suangf nyaos ib dos dled rongt zeud!

……

Zid, Dlob Zis suangf nyaos ib dos dled rongt zeud!  Wangf Qeub Draod haik.

Dangb guas nil, zhit dout ndel dout dol ruax shuab. Lenx zid shaib dreud dol Dlob Zis hod sob ndlas, lob shuab ghel ghel, Nil zhit dout ndel dout dol ruax shuab……

Lenx zid lob shuab dob ceuk leuf.

Zhit dout ndel dout dol ruax shuab lal yaos dol dled leud nghaix rongt zeud! Wangf Qeub haik kaod kaot.

Lenx zid shaib dreud Wangf Qeub, suk let shaib ibdol nenb khaid nyik boub.

Zhit dout ndel dout dol ruax shuab lal yaos dol dled leud nghaix rongt zeud! Wangf Qeub haik uat yif huab kaod kaot.

Lenx zid ndrox muas lenl shaib dreud Wangf Qeub.

Wangf Qeub muab gangb muas dis draod ghanagb lol, bongb drout shout dol zid lob plot.

Lenx zid shaib dreud Wangf Qeub, zhenf uat guat muas ndros ndas.

Zhit dout ndel dout dol ruax shuab lal yaos dol dled leud nghaix rongt zeud!

Haik dreud, Wangf Qeub nyaob hod lenx zid caik del muab Dlob Zis zaik lol, buas dreud nil, mol drout ndeuf zhed. Lenx zid shaot shaot guat muas, zaox dreud dol dob ghangb.

Daof ghangb ndraod duax dlex Bex Muxlob lob shuab ril rual tab  ndos dlex angd baob vout lob shuab vel vongl. Wangf Qeub tab lenx zid ib chent, dangb guas zhit dout dis hout. Buas dreud nil buab dol dled leud nghaix shab nyaf, aob dos jat let ndaox mol daof ndex.

 
【 文章作者:熊玉有 熊… 文章来源:熊玉有 熊文国 点击次数:624 文章录入:hmongheu    责任编辑:hmongheu 】 
 
 【发表评论】【加入收藏】【告诉好友】【打印此文】【关闭窗口
 网友评论:(评论内容只代表网友观点,与本站立场无关!)
 
 

 

点击申请点击申请点击申请点击申请点击申请点击申请点击申请点击申请点击申请
| 设为首页 | 加入收藏 | 联系站长 | 友情链接 | 版权申明 | 管理登录 | 
云南网警


主办:文山州苗学会
Copyright 2007-2015 © 文山苗族 All Rights Reserved 滇公网安备 53262102000271号

苗山新事:侯 健 七彩苗山:吴德华 苗学研究:李维金 苗山音视:陶志文
苗文空间:张元奇 文学园地:陶兴安 苗山风谣:杨朝山
站长信息:QQ 464402767 邮箱464402767@qq.com 手机 15308766544
 站  长:张 元 奇..技 术:杨 永 平、许 东

信息产业部备案
滇ICP备15005284号