设为首页 加入收藏

用户注册· 联系站长 · · ·

>> 您现在的位置: 文山苗族网 HMONGB BANGX DEUS DEB >> 苗文空间 >> 文章作品 >> 正文
 
 

Nghuab Yangt

文山苗族网 HMONGB BANGX DEUS DEB·[2018-4-15 16:51:02]

Nghuab Yangt

鸽飞

翻译:熊玉有 王兴发

 

Dol dled gat duax zos god yif dob yaos ib dol tangd dled leuf. Nil teux ras bof god zeuf suk dol ghob gud luas jot got dud, uat drout god maob shab laos. God denb nghel mol, suak suak nil doub hout tab got dlangb. Nil vud vud nyox nyid, suk let muax ndout zheus ged kuk shab yuad ndros god haik.

God zid yaos zhed kot maob hod kut ib dol guk kot. Hnob ndeuf, nil mol ib lob raol nyaob dleb bangb las kot maob, touk draod lol nzhib drous dol dled nat. Dol dled nat nzhat nzhongd god zid, tlat leud lob cheb duaf. Naf shuab ntet nil, muab baob angd zeub, dob zhit muax yongf, nil hax shik sex dek leud jat daof ghangb zhit zhaot. God zid nuaf deuf lol nil zhit yaos dled vuf, dangb guas sex zhit zhaot shab drout dol dled plot duab gus zhit boub deuf khaod dus lol, buaf yif raof ged daof qeut ndrel ngaox lol, sangd dak uat nat muab nil laif dangt. Nyaob ngaox mol leuf, dol dled tlat zos, sob yaos nyaob ndeuf qeut ndrel ngaox tlat mol tlat lol, daof ghangb "nblongd" ib shuab tlat drout hod dlex. "dled puab" leud lob ngaox ghangb. God zid dak touk ndeuf nil zeuf uat ib shab muab nil shout jat"dled lol muax , chuk lol bluas" yaos langf haik let, dangb guas duab nens hax shik yuad dreuk hmongd.

Dol dled nat yaos ib dol naf dled bloub choud dleub shik zuaf, dex khaod bloub choud lox lox yout yout, ghoud rangf shik zeud, shaib mol suk let ghoud deb qeut baod daox had zid. Wef hod nat muax ib khaod bloub zaix suk dol nghuab ntuad dik, beb dik dout ib lob nbet hot "Nghuab Yangt" drout nil.

Nchait Nghuab Yangt shout jed muax dod, god zid zeuf muab ib nzhik Laix Sut Erk guas god bangb nil nzuad jed. Nghuab Yangt zhit nyaf hnat ncab Laix Sut Erk, dangb guas nil lal nyax ndrenl, nchait nil sangd dak ral nat yaos teux ras nil ndros god mol lol, dout keuk god ib nzhik blax plot. Nzuad dangl jed, nil nqok jed zhit zhes, yaif bloub, sangd shait nzhik jat lob jed khuad. Laix Sut Erk yaos ib jaod chuax cuaf, muax nzhik dux, ngangs zhit dout khaod muas khaod njoux, god tab god zid gad renl ndouk dlex lol bangb nil youl, del mol deut zhit duax muax nzhik bongb nzhex muas.

Hnob ghangb sheud nzod, god zid mol zhed kot maob nbangx dlex nof, Nghuab Yangt zhas leud ged, lal uat ib dos plot duab laf dreud. Uat zhit dout jangl, zhos rongt muab nil geut drout hod zhed. Nghuab Yangt muab drout deut zhuab khaod drongx, nyongx ruad drout god, taod god kheb  drongx zhaot nil mol. Zhit dout! Nat uat zhit dout shab dlangd, lenx dus bof dluat ib dol guk kot jaox ib dol dled mol uat nof ax? Nghuab Yangt nongs god dex shuab lol boub dout god khaod shab deud, zhit laof leuf, dangb guas nil zhit nzhex god leuf.

Dangd shot dluat, Nghuab Yangt zhit bof leuf. Dol dled nat blas nchik quab qid duax god yif, blas nchik zhit haik zeuf mol leuf, qif duas nenb lak! God naf dak dex tangd dled luax nat yaos zhes zhit dout let, jat nil mol baf.

Tlout leuf jid hnob, Nghuab Yangt draod lol lak, ib jet lot angd lit, ghoud rangf bongb blis jaol. Nil khaod nzhex dlait njod, doub ghangb zeub lal, got dud val mol val lol, muab dex deut del nat lol khat nil khaod taod rangf tab zangx muas. God lob shab muas leuf, sangd keuk nil ib nzhik naox let. Zhos ntrad dout ib ndangd ndif ghux zheul, shif muab jid lob drout nil. Nil yuad zhof yaos chaib tlout leuf, hnat dob zhit hnat, zeuf langf tluak sheud lol, muab njoux dob pongf dluas leuf.

Dox dled zhas draod zhit bof leuf ib ras. Ras nat, Nghuab  Yangt muax ib caik deut daof ghangb jes deud bluad, yif huab langx shaib. God naf god zid sangd dak dol nyuas naf dled nat lob shab zhit dol, nuaf zhit bof beb dex rongt shab nzhuk, dob tluad dangl, uat ib shab muab dol dled gus shaib mol nil  hod shab ncod nyaot nat leud deuf mol. Dangb guas, leud deuf ib dol dled jes deud bluad hax shik muax nzhik duf shab, daol nil caik deut rongt nzhik zhas haik baf!

Nghuab Yangt suk nongs boub nenb dex lol, zix touk gat mol zhit zeux langd zhid, zhit zeux touk dus dob leud god  zid leuf, ndros god shik rongt hend, muab god dangf uat nil "teux dol nenb zhud". Dled yaos boub nyaos nenb let, shaib nyaos deuf dol nenb dus zouk nzhens. Nyuas dob tab dled muax ib zhangd cenb ret zix yos deuf lol zeuf muax, nil said drous god leuf.

Touk gat, dob ghongb (muax dex nenb yif shout gab nyaob hod) yos dled tab huaf nat yos zhax cot uat shit zhit ib yangf. Nil buab yaos zhaot jat yos let, zhit muax khaod nyaob rongt naox rongt, ib hnob dout naox jid lot ghob maod ghob roub dob yaos rongt zhit dangl, fenf ndout hax yuad yol mol ntrad naox yos shad. Yaos dak jat dled said kahod " zhaot yos" tab "geut yos", god sangd nil buab yuad zhof zeux said khaod " zhaot yos" , wef yaos zhaot yos nil buab muax ndout zheus yeux shab, zhos yuad nil buab ndruab hnob zhit njaif lob raol mol dleb, ib hmaot zhit njaif dleb vangx zhed zeuf dout lak. Zeuf dak zhit muax fuf keud, nil buab lal yaos hod raos ib dol, hod raol dex nenb dob boub nil buab, boub nil buab yaos dus yif let dled, ib yangf, nil buab lal boub dex nenb hod raol.

God yif nyaob shout mid kut pangb ndrangl ghangb, lob kut ndrangl ghangb ib huaf yaos Nghuab Yangt khaod qeut uat shit. "Ndouk dled yuad shaib nenb zhud plot", nyaob shout kut ghangb deb, Nghuab Yangt fenf ndout zhit zeux nzhib drous naf bloub ndos. Mid dled jok jad caox baob drous nenb hmaod chuat, nyaf ngangs mol ndeuf dex duab nens jongb jongb, bof muax naox let zeuf uat plot duab mol yuad, zhit dout naox zeuf ghuax vux veud, suk dol mid nyuas drous laf. Cuat yangf shad jax caox baob dob yaos shad ax chab kob. Dex dled lox drous nenb hmaod chuat, gangd nyaob hod nbaox nenb ndrel ndrenl tab dous ged guas nzas. Nil buab muax guas suk naf duab nens, uat shab dol yenl nuaf nenb. Muax nenb hot drous nil buab lob nbet, nil buab zeuf ib jot got dudNil buab zhit langf shid ros jot dut, suk let duab nens zhit langf haik lol luas dlaos.

Nghuab Yangt shab dol nghel lol lal muax blax plot suk let dex dol dled geut yos, nat uat god lal muax nzhik plotYuad boub dout, nil zhit nchait dlangb zhit, zeuf yaos muax god taid dout ax! Nat yaos god ndangx nens nat teux ib ras ndangt ndrangt drout luf zox shad.

Ndangt ndrangt drout luf zox shad zhit yaos ib yangf nof yongx yif. Touk ndeuf, ghongb naox yaos dex cuat yangf nbangx dreud faib drout, luf zhangd khoud naox lal zheus hend, haik drout ib dol nyuas zhos muax gouf ndout xongt, yos jax ib dol dled yaos langx hend. Zhit haik uat jangl, god ib hnob yuad dout bob Nghuab Yangt ib ras ax.

Haik zos dled dex khoud naox, sob sangd zos let zeuf yaos nghaix baob cangt. Nghaix baob cangt nyaob touk gat yaos nyax yaos gob, ib dlaif baob cangt zeuf hout nyaos ib loux goub guat ghangb lak, lenx zhit drous dled naox let. Dex cuat yangf god ntrad lol drout Nghuab Yangt fenf ndout  yaos dex dut ghaok keuk lol tab zaot guat hod zhed douf bangx____dex puat zhuab. Jat dled naox dex nat muax nzhik zhit chuak rongt drout nil buab. Nghuab Yangt lenl naox dex khoud nat, nil boub dout god tab nil dob zhit muax dlangb nzhit yuad said. Muax dex huaf ntrad nyaos dout ib nzhik blangb hnyod nzhel, nghaix blas dlex lal shik cangt nzhel nangb lol dleuk hlod Nghuab Yangt dex khoud naox ib nzhik. Blangb hnyod nzhel tab cangt nzhel nangb yaos god mol ndeuf qeut uat maod lob khaod drongx daof ghangb hod tongk zhuab zhuab ntrad dout let, blas dlex yaos god mol hod ndos dlex suak lol let. Dex cuat yangf nyongl nat dob yuad dout langf hout dluat ib nzhik. Ndros hmangt zhit suk, dled dob naob zhit dout nyongl zhal leuf, yif huab zhit nyaf dex zhax dles zhut nyongl leul.

Bangb Nghuab Yangt uat dex nat, god muax shab yenf laos, zhenf gob shab ghak leul. Nghuab Yangt boub dout tab zuas laos god bangb nil cuat yangf, uat zhous god, nzhens  god, yuad zeux shid ros bangb god jaox duax ndout zheus ged rongt shab.

Nghuab Yangt yaos dol naf dled, senb zeuf muax nzhik zangx muas, zheus zheus jat let dof las, let nat dex nenb nyaob nbuak dob dak Nghuab Yangt yaos ib dol dled shab rongt. Dangb guas, zhos yuad god nyaob ndeuf, Nghuab Yangt dangd nzid zeux lox ndout zheus, zeux jat let nyongx dref, ntet ntaot luf dol dled. God naf dak nat hot dlex ntat nenb ros, dol yeuf Sunb nbuak beb yif zhas dak dled uat nat yaos tab nenb zhud zenb plot.

Yeuf Sunb yaos uat dob draos draod lol let, touk nzod mol Chaox Xenk ndouk dluat juaf, nyaob dluat ghouf deb hnob duax uat nenx ndout xongt, haik dout haod ndout hmangt tab dled let lol ndrual, god nzhens laos nil ib cat lol haik zos dled. Yeuf Sunb dak, zhit dek muab dex dol dled hlob dad nuaf suk mid nyuas zhit boub dangb, ndros nil buab haik lol zhit dek muas qif qangt, zhit let dled zeux sex suk dol nyuas dled, uat nyuas nzhuad, langf juat cuat yangf, zhaot ghuad zhit said qeut. God nzhens dex lol nat, ndros Nghuab Yangt haik lol yuad zend shid naf hlob shuab lol.

Zos huaf nat god hax njot nzhongd touk nzod ndros Nghuab Yangt ib cix nyaob hod lax drangs yangt longt rongt shab laos. Muax dex huaf, beb zeux ghut leul tlat mol hod got rongd uat dreuk let leud nghaix. Ghangb deb mid got rongd khaod das zeuf yaos daox nzangt, zhit muax nghaix dlangb zhit leud, Nghuab Yangt tlat gis gas mol hod got rongd zeuf yaos mol ntrad dex daos ndongt tab baob angt gus god laif mol hod got rongd. Cuat yangf dlaos dlis dluat ndaik, dled dob zeux duax shab ghak laos, haik zos dex yangf "leud nghaix" nat, nil buab yif huab duax shab. Uat ib dol dled zeux hnat ncab, ntrad dout daos ndongt zhit langx, dangb guas nil langx des ntrad dout baob angd, wef yaos baob angd bongb zos hod bes deb zeuf deus dangl, maol uat hmongd angd shout zhit dout. Nghuab Yangt gud dout daos ndongt zeuf rongt shab uat khaod muas jit los, bloub caik deut ndlid laos ngous longt. Dex nat nchait zeuf yaos muax plot nzas baf? Shout zhit dout baob angd lol, nil lal zeux bongb shab suk nenb, uat duab yus muab gouf muas soux god ib muas, soux ib muas yaos shaib god nzhex muas nix. Yaos ax, dled yaos zeux nyaob shout nenb lob plot boub dout nenb lob shab sangd let. Dled zhit zeux raik shab guas, zhit zeux dlangs khaod rongt shab, nil buab touk ntuad ged rongt shab yuad zhof yaos rongt shab das das. Dled yaos dex zhax cot gangx shab. Nil buab zhit zeux qif shab nded nded, yif huab zhit zeux ceux ndox ceux deb, zhos yaos shid ros muab dex ged  rongt shab senb zeuf jaox lol gik rel dol nenb zhud.

Zix touk nuaf dluat rangx dluab sobNgoux Songf Jenk, dex nyuas dob uat nax nghangt dreud dex paof xongb dras ndongt gus yol dul uat get drangs longt shout dex lax ndrangl, tlat mol hod pub dob draos yol sangd dak yaos Shenb Gox Linx Qenf zhux jaox. Nghuab Yangt tlat yangt longt daof god houd ndex, shaib lol khuab khat shad del, zhit yaos dlaos dlis. Uat shit dex nat, beb zeux uat hnaod ghangb leuf cuat yangf, suk let yol zeuf yaos dob draos das, tlat uat guas nzas drout shout qeut draos gus ndangx dras nzhaik zhat. Dex uat shit nat let yaos dex uat shit das das, dex uat shit das let yaos ib lob ndrangl ndox rongt shab. Touk ndeuf, beb muab cuat zhangd cuat yangf laif dangl drout daof khaod ghub, daof ndex daof ghangb ib huaf zhit muax nghet hlaot. Touk nat, beb nzhet ndreuf zeud ngouk, tlat zhit yuad shad, ib lob jed dob yangt sheud lol, ndrangl ndox dlangd zhit muax geus, cuat yangf jax zhal uat nbaox yenl. Yaos dak beb ndros ndrangl ndox yangx laos uat ib get, huaf nat beb zeuf zeux bof dex ndongt shend jed, hnaod dex ndraox hot ngoux,  boub dout yol zeuf yaos ndax deb cuat yangf cuat zhangd ib zox shad, hluak tab kaod kaot.

Yeuf Sunb haik, dled nyaf tab nenb zhud uat get uat shit. Nil buab lal zeux dangb gof uat shit, ndeuf yaos wef nenb zhud zhit ndros. Nil buab jat shab ndout nenb zhud lol ndros uat shit, nchait nil buab sangd dak boux nenb zhud uat shit yaos nil buab lob ndrangt nof, lal shik nchait nil buab zhos yaos wef yif huab muax ghangb hout.

Nghuab Yangt lob blangb ib hnob hnob lox sheud lol. God naf dak, Nghuab Yangt hait nyuas leuf. Nad caik dout dak Nghuab Yangt muax dluat ib ndot ged hlob raik mongt ndit.

Ndox chab naot lal, yuad dout ntrad lob rongt qeut keuk Nghuab Yangt yos nil mid nyuas. God naf bangb Nghuab Yangt kot qeut drout ndeuf beb yif jex ghangb”. Lob zhed nat beuk drongx zhit dlaos dlis, shab, wef jat cheb luab rongt mol lol, ib lob loux nyaos dout ndrof. Khaod drongx nzhol ndrenl, muab beuk drongx hlet hlaot, Nghuab Yangt nyaot nzhik jed zeuf ngangs nyaos dout mol lol leuf. Hod zhed zhaot muax ib cat ghob drongx daos ndluas tluak, god nyaob ndeuf gouf cangx jex ghangb lob guef zid nzend lenl buat dout ib lob hnangb langd, haik drout dol Nghuab Yangt draik lox draik lenl dak: "Zeuf nyaob ndeuf nat, ndeuf nat zeuf yaos gaox lob zhed chab lak". Lob koub hnangb touk ndex zeuf yaos buat drout ndeuf lob ghob qeut let. Nghuab Yangt boub leuf, gad renl ngangs mol, nyaob hod njis gongs, zhenf but nghel lol shif shaib, muab got dud buas jat yol, uat dout ib lob goux qenb. Nil muab lob khaod muas nzhat nzhongd god, suk let nuaf jat ib dol ncaik ghouf ndox. Nil sheud lol, njaif qeut mol, nyaob hod zhed njis ib njis, zhas draod ghangb mol hod hnangb langd qid uat ib beus. Nil zeuf uat nat muab nil dex deut del khat deuf nil khaod zouk shab tab uat zhous.

Dluat leuf jid hnob, god bof Nghuab Yangt muab lob koub hnangb langd zangd mol drout luf lob deut cangx. Uat nat zangd yaos zhit muax dlangb nzhit ged jait hlaot let, god zhas muab hnangb langd zangd draod ghangb. Nghuab Yangt dlait khuad hend, chenf touk god zhit nyaob zhas muab lob langd hnangb zeud draod mol ndeuf lob deut cangx nil shaib drous. God sangd dak nil drik nblangf leuf god lob rongt shab, ghut leul ntet nil. Nghuab Yangt blas nchik puab luas bes deb, aob lob khaod nzhex bok nyaot, tlout leuf ib nzhik let gangd nuaf god. Nyaob hnob ghangb gus god tab Nghuab Yangt nbout deul dluat, beb yif duax lak ib dol yeus tab ib dol nyuas dob ndros god hnob nyongs chaob bek dob. Nil buab zeuf yaos Nghuab Yangt dol nenb zhud touk nzod. Nil buab muax ib ras nyaob hod kut nzhib drous Nghuab Yangt, juab juab nil, sangd muab nil jaox mol. Nghuab Yangt zhenf boub dol nenb zhud ghob, dangb guas nil zhit dout leud jat mol, zeuf zhid lol zhed leuf.

Touk god hnaod mongt draod lol zos zhed, god zid dob  ndros aob dol khuat nat dous dout lob houd boul Nghuab Yangt leud nil lol leuf. Dol yeus gus haik lol jaox muax shuab Sub Bex nat yaos ib lob naf ngaox dol zhud. God zid lak mol dluat shout lob ngaox nat bangb las nuaf maob, bangb dol yeus nat dol zid nuaf dluat maob. Nenb loul maob hnyangd hend, god zid zeuf hot cheb jeuf shad duax muab dol nenb loul nat hait mol zhed kot maob leuf. Dol nenb loul nat daof ghangb duas drout hod zhed kot maob leuf, touk draod mol zos naf ngaox dob uat leuf ib hof mongd cangt. Nghuab Yangt sex dlait shab drout dol nenb loul gus god zid zaik mol leuf, touk nil draod shaib bof god zid zeuf zaox leud zhit zhes, uat ib shab ntrad dout nil dol nenb zhud loul. Ntrad zhit dout dol nenb zhud loul, nil zhos rongt dous ghob ged draod ghangb, dangb guas nil lob ngaox dob njaif lob qeut ndrel ngaox mol  tab zhit boub dluat dus leufNad zeuf yaos lob houd boul nil duax god yif tab zhit bof leuf aob ras.

God hnaod dol nyuas dob ghut Nghuab Yangt uat "Hox Lif". Nil ib lot shuab Sub Bex, lal zhit boub yaos aob lob muas ndeud dus.

Ndros nyaob uat get daos xongt ndout, ndros Nghuab Yangt muax ged mol lol dob, god zhit yenf zhaot Nghuab Yangt mol let, dangb guas, nongs dangl rangx lol ndrual Nghuab Yangt ntrad nenb zhud kuk shab ntraot, nuaf jat dol mid nyuas dob ndros Nghuab Yangt shik buas uat get shod shab laos, god zhit boub uat jangl.

God mol drout hod zhed, Nghuab Yangt gad rens leud ngangs lol, zhangt hout shaib nzhongd god lob plot, shid ros jot got dud; Ib blas zhas tlat drout ndrout rongd, jot got dud drout dol nyuas dob. Nil zeuf uat nat mol mol lol lol faib dreud nil dex shab chuat, khat deuf nil aob daos dob zhit sangd zhaot zhes.

God draod mol ndrout rongd, Nghuab Yangt ngouf drout ndeuf lob daos daof ghangb, pux jat, aob caik del tab lob  doub hout dob pux jat hod bes deb, zhit uat shuab hlaot , lob  jed muax nzhik chent nyaot. Nghuab Yangt boub deuf dlangb zhit bloub leuf, nil hod lob shab kak ab ncod nyaot: Yuad uat Hox Lif nid lal shik uat Nghuab Yangt?

Aob dol zid dob uat shab dlangd faot, ib dol dak jat dled zhes jat baf, ib dol dak jat dled draod mol. Aob dol dob dob zhit haik dlangb zhit, khaod das yaos zhit boub yad uat jangl  uat. Daof ghangb jat god naf souk lol: Jat Nghuab Yangt draod mol shout ngaox, daol nil muab nyuas xangt dangl, said ib dol mid dled suk ngouk Nghuab Yangt duax keuk drout beb yif.

Nghuab Yangt mol leuf, yaos dol nyuas dob buas mol let.  God hod shab langx nyaob, zhit dout mol sangt Nghuab Yangt.   

God zhit dout draod bof dluat Nghuab Yangt, lal zhit bof aob zid dob it sangt mid dled duax. Nchait nil buab draod mol Sub Bex leuf lak baf?

God yif lob zhed ndrangl ghangb nbuak jat lob vangx xongb. Ib hnob, god bof lob qeut dled god bangb Nghuab Yangt said duax muax ib dol nzhuas xongb! Khaod das, Nghuab Yangt nzod zeuf nongs hod angd muax shad ndit rol, cax let uat jangl dob hlod qeut.

Tlout leuf ndout xongt, god muab ndot ged tlout dluat nat shout uat ib rangx lol ndeud zox duab lot hotZhox Nbot. Nat yaos god teux pout ndeud zox nyuas shout deuf. Shangf HadNyuas Hluak Ndeud Zoxndeus ndas zeuf luaf deuf rangx ndeud zox nat, zhit lex dol zhud dot ndeud Renf Daf Xenb muax nof duax Changx Shux zhed nyuas hluak, hot sod dongx yof god shik nzhib. Guk ndeud shod shab laos khuak ceub god sex shout ndeud zox drout dex nyuas, ndout shout dex ndeud zox sukZhox Nbotnat. Renf Daf Xenb yaos guk shout ndeud zos touk god yout zeuf ncheut heuf, nil dex lol god zeux shaib dout hnyangd hend. Zix touk ndeuf lol god kheb houd shout zox ndeud nyuas, kheb houd uat god lob nenx nyongs zox ndeud nyuas dout muax jid jouf xongt.

Lal haik nyaos dout dak, dol dled Nghuab Yangt nat, gik rel drout god ib shif nenx leuf.

 
【 文章作者:熊玉有 王… 文章来源:熊玉有 王兴发 点击次数:644 文章录入:hmongheu    责任编辑:hmongheu 】 
 
 【发表评论】【加入收藏】【告诉好友】【打印此文】【关闭窗口
 网友评论:(评论内容只代表网友观点,与本站立场无关!)
 
 

 

点击申请点击申请点击申请点击申请点击申请点击申请点击申请点击申请点击申请
| 设为首页 | 加入收藏 | 联系站长 | 友情链接 | 版权申明 | 管理登录 | 
云南网警


主办:文山州苗学会
Copyright 2007-2015 © 文山苗族 All Rights Reserved 滇公网安备 53262102000271号

苗山新事:侯 健 七彩苗山:吴德华 苗学研究:李维金 苗山音视:陶志文
苗文空间:张元奇 文学园地:陶兴安 苗山风谣:杨朝山
站长信息:QQ 464402767 邮箱464402767@qq.com 手机 15308766544
 站  长:张 元 奇..技 术:杨 永 平、许 东

信息产业部备案
滇ICP备15005284号