设为首页 加入收藏

用户注册· 联系站长 · · ·

>> 您现在的位置: 文山苗族网 HMONGB BANGX DEUS DEB >> 苗文空间 >> 文章作品 >> 正文
 
 

Khuat Gaob Yif Lob Vangx Xongb

文山苗族网 HMONGB BANGX DEUS DEB·[2018-4-15 16:49:26]

Khuat Gaob Yif Lob Vangx Xongb   

高家竹园

翻译:熊玉有 王兴发

 

Nyaob ghouf deb shaib ghangb deb, khaod drongx nbuak bangl, ghouf zhed pinb vangx xongb yaos mid yif ghangb deb dex ghoud vangx zhed.

Nenb yis ghoud zhed pinb vangx xongb, muax lob khaod drait nzhuab ghak rouf, dex juat tlout zhed jat vangx xongb lif dluat dob yaos liangx nzas.

Dreuk bos yeuf dex gangb ged, zhed zaik khuat lob khaod drongx zhit jat kheb drout daof ghangb, guk shaib qeut haik dak uat gat zeux sout bangt nyax zas. Khuat gaob yif zhit ghuad nzhex dex nat, pinb pinb yuad kheb lob khaod drongx drout daof ghangb, ib blas dleuk hlod dout lob zhed nyaob muax rongt rangf ruas. Ngangs zos khuat gaob yif houd dangs, gaox zeuf boub khaod kongb los, khaod dlangd faot, boub dak lob zhed nat muax zox muax jit dob, nyax  zhit doul sangd deuf lob khaod drongx daof ghangb mol drout hod lob vangx xongb nzhuab rouf blox longs.

Zox mid ged zuak ndeuf khaod drongx yaos muab reb ghuad rangx buat let. Wef lak ngouf zhes ib zongx xongb ndox, mid ged muax nzhik nkouk mol shangb lous, let nkouk draod shangb sik, uat nenb ghous shab laos blox drout daof ghangb zongx xongb ndox.

Mid yif ghangb deb zhit jaos xongb bloub, fenf ndout jaos xongb cangx, xongb minx zhuf tab xongb lod. Jid zhongd xongb nat hlob lox shab muax beb zhangf, houd bleud muax xangt yif lix mik, zad lol dind hof uat nghangx rab koub dluas. Fenf ndout dob ghongb dex zhed muax beb qangd zos zhib qangd, khuat gaob yif lob zhed muax xangt qangd, ghouf zhed lob vangx xongb lox dout hof shif. Dluat leuf xongb minx zhuf, ndeuf nat lak jaos muax ib zongx xongb bangs, pangb hnob bongb ghouf deb zhenf muax jid zhaob naf ndongtshab nchuat. Khuat gaob yif lob vangx xongb rangx sob vangs yaos sob vangs zangd doutib rangx koub bol zab dout cix vob. Jaod koub bol nat muax lob nbet hot koub bol zid keub, ib jet duax bol, ib xongt nzhuab rouf, nax hnob lob ghoud rangf dob uat luas ncit.

Khuat gaob yif dex nenb dol dol shod shab laos, zhos yuad hod zhed muax nenb, khaod drongx daof ndex daof ghangb dob kheb nchod. Khuat gaob yif nenb zhit nyaob zhed, gaox lal ngangs nyaos dout ndeuf lob khaod sob vangs mol lol hod vangx xongb, zhit muax let jangl. Ndeuf sob vangs aob lob khaod ngangs yaos khuat gaob yif bef yif zhes jat jaod mid nyuas let, ib xongt zhos muax lob jaix duax nzhuas tab jaix shout ghongb let taid jat ib ndot. Vangx xongb tab  lax deb zhos ghuak muax ib dol mid zhangs lax, touk ghongb shad, khuat gaob yif dex nenb nchait hod vangx xongb dex ghaib mol hod lax zhoub ghongb longt.

Jaix ndox shod, touk uat shit uat dout ndaot fuk leul, beb nbaox mid nyuas nat zeuf tlat mol hod khuat gaob yif lob vangx xongb. Nyuas dob yif huab nyaf ngangs ndeuf lob khaod vangx mol, zhit muax dus haik. Ngangs zos hod vangx xongb, let boub ndrout ndrouk changd ndox gob uat luax, juat hnob bongb ghangb deb shod uat luax. Changd ndox gob leul drous dex nblongx xongb duab duab drongl dangl, dex juat shod ib ngangs zos hod vangx xongb blas nchik zeuf liangx nzas leuf, zhit boub uat jangl haik. Zhangt hout nuaf njet mol, nuaf bof dex uak jes xongb rongt ngoux nded lot shik kouf, nuaf bof nblongx xongb gud dreud changd ndox nyaob hod juat nzuax nzas rongt shab. Dex nblongx xongb  shout daox nyaob hod nchangd ndox rat dreud ndos gob dleub. jit los ib ndrangb, uat rongt nuaf, lens nblongx lal yaos bof los let. Dex nblongx xongb jex ghangb suk let duab dluat, nzhuab ghak sab, suk let dex nbod nzhuab nghet hnyangd. Nyaob hod dex nblongx xongb sef zeud shik chuaf, changd ndox shid ros zid dreud, sout nghel lol, zat uat blad jit. Xongb nyaob hod juat yaox yenl, blad jit tlat uat beus los, zeuf suk ib pub nchoub ris rongt shab laos. Touk nat, gaox sangd nyaos dout dak yol yaos dol ghangd nyaob hod ghangb khaod, sangd nyaos dout dak yol yaos dol mid nzhel shot drout jex ghangb dex ncuab. Dex shab sangd nad dob liangx nzas hend od.

Nyaob hod vangx xongb ndruab ndrangb muax ib nyik blangl zhuangb buat dout dlaos dlis, dlangd juas beb bloub lob drongx. Haik "dlaos dlis" yaos buat zhit cix, wef yaos ngouf jat dex xongb. Jid dol xongb nyal haik nyal lol muab blangl khaod qeut mid mid nat dluat uat shangb uat shuat. Khuat gaob yif dol ncaik hot Mid Fongf kend tab nil dex mid ved njoul nyaob ndeuf nat uat bangx ndoub, ib dol nyaob ib lob mid daos xongb, ndeuf ib pangb got deut zeub muax ib lob mid deub xongb. Dex bangx ndoub rongt ngoux nzhux lenl hod mid deub xongb, njet drout shout, njet zos shout nil mex dex houd joul, njet zos shout nil mex dex ndid del.

Changx Shux bangx ndoub muas dleb drout deb qeut Eub Mek, ndaot nbet ghak laos. Ndros bangx ndoub uat nax bof shik zeud, uat bangx ndoub zhit yuad juaf zid nghol, del lous nyif ndoub, del sik qaob gongb, nbet hot "zous lous", yaos ghangb deb hluak ncaik ib yangf bangx del uat zox ndaot nbet. Dex dob ghongb hluak ncaik shab ngal del ndreuf uat bangx ndoub muax blax plot drout khaod uat dout rongt. Ngoux Fongf uat dout ib del rongt bangx ndoub, zeuf yaos lob deb qeut nat dol "ncaik uat hout".

Dex ncaik nyaob uat get, haik zhit zeux dangl, luas zhit zeux zouk, xenx zhit laof ref, hax nyaob shout dex jes xongb dlait jid dol gongx rak ghuax nchot nab. Nenb ghangb deb muab gongx rak hot uat "dix lous hot ngoux", wef yaos zhos muax zid gongx rak let zeux ghuax, ghuax dreud uat nat nongs lol shod shab. Lob mid deub muab njout dlangx hab, khaod deub muax drout lob gouf, lox suk njuad maos, hot uat deub njuad maos. Dex lob deub dlangx muab ib zox sod lab kit dreud, nyaob hod yaos dol mid gangb nzhuab suk nbod, rongt nuaf hend. Dix lous hot ngoux yout hend, yuad sangd shaib deuf bes zheus rongt zeuf shaib deuf bes zheus rongt, dex dol gob shongb zos nuaf dob nuaf zhit bof, lob shuab ghuax ndraod rend suk shuab sod gob. Hnaod haik nongs dangl dix lous hot ngoux lob shuab shend uat drout shoud lens tongb los, let nat dob ghongb ghangb deb yif yif yos muax dex gangb nat, dex gongx rak nat lob nenx yongx yif, ib hnob bob ib nzhak douf nzhuab zeuf dout leuf.

Ngoux ncaik buad dreud hod vangx xongb ndruab ndrangb, ib njis ndeuf zongx xongb bangs yaos jid dol ghaib lob qeut, nyuas dob zeuf mol vangx xongb pangb hnob bongb ghouf deb uat shit. Ndeuf nat muax jid zhaob ndongt shab nzhuab rouf ntuad dreud, xongb duab duab, nzhuab ghak rouf, muax nzhik zhouk ruas.

Hod vangx xongb ndraox zhuas zheus, shout dex angd luax dlangs muax dex uak nblongx xongb, hod shit tab muax nzhik muas ruad, shaib nzhongd sangd mol nyaob ib nzhik, but ib njuak. Ndros Ngoux Fongf buab yuad ib zox sod lal shik ib zox bloub hout lol, draod shunf del dlet aob dlaif nblongx xongb zuak got lol ndouk uat ib lob ghoud "8", ib lob "juat njis njis" zeuf uat rongt leuf. But ndaos luax deb nuaf juat njis njis sex njis, plot muas ib blas zeuf ngenl sheud lol, sangd zhous ros. Zhit sangd zhous ros, zeuf nuaf dex gangb ruas shangb ndok rel. Gangb ruas shangb nzhet hend, boub shaib "mef daox", zeux muab rel ndok drout shout ndruab ndol dex khaod ged; Zhenf boub dout huab juat, nyaob hod lob jaix ndox shod nongt laos, nil mex zeuf muab rel uat dout ghel ghel. Nyaob lob jaix nat, dex mid gangb yuad zhof zeux yangt ghel ghel let.

Gangb ruas shangb ib hnob sheud nzod zeuf muab rel ndok rongt leuf, touk nat yuad shaib ndok rel, zeuf yuad muab nil mex lob rel dluat ndluas. Rel yaos gangb ruas shangb lob drongx naox maod, ndok rel yaos gangb ruas shangb dex del deut uat nenx, nil mex dind maob shab, zeux gad rens muab rel nzid rongt, dex ral zhenf yuad dout draod ndok dluat ib lob. Yaos dak nil mex zhit duax ndok rel, uat let nchait zeuf yuad muax naf nangs naf juat lak.

Nyuas dob yaos yuad zhof shaib shaib gangb ruas shangb ndok rel let, ndeuf yaos ndrangl ndox ib khaod bloub ndos zeud hend, muab haik drout nenb yaos ib zhangd blangb bleud khuab khat, ib zhangd blangb bleud nzhual shaib.

Ndros ndout zheus nyuas dob ib suk, god lal "Puat" dluat jid dol gangb ruas shangb, uat nat yaos sangd nuaf shaib nil mex hod blangb dex cuat yangf uat sod shangb rongt let jangl. Gangb ruas shangb hod blangb zhos yaos ib jaod guat dlob zis, dex guat nat uat jangl uat nyaos dout dex sod shangb jit los nid? Gangb ruas shangb yuad zhof yaos muax ib lob mongt raik zhif deuf sod shangb let, nil mex yenf duas dob zhit yenf haik deuf lol.

Gangb ruas shangb ndok rongt rel leuf, gaox zeuf tab gangb ruas shangb muax ib lob shab shik suk____ gad jend sangd daol jat muax ib dol gangb jax lol mangs hod lob rel. Lol ib dol maol max, lol ib dol gangb nblax max, zeuf dak lol ib dol yongd njoux ndet lal rongt ax. Dangb guas, zhit muax. Daos zhit doul das lak, zeuf ngangs sheud lol bangb gangb ruas shangb ib des.

Muax jaod ghoul muas ib jet dlob njab nyaf shot drout ndeuf lob vangx xongb dex qeut zhouk, zhos yuad gaox drout shab dous ntrad, fenf ndout ndes nyaos dout ib aob dol. Ndel dout leuf, gaox yuad dout sangd zhud yif muab ghoul muas zhaot drout shout rel gangb ruas shangb, yuad uat duab rongt, zhit dek muab rel uat ndluas leuf. Dex bos lous haik dak, dex ghoul muas dlob nat yaos Zhux Yenb Taix zat let, nongs jat muax nzhik dot shab. Ngoux ncaik nzhens dex nat, nyuas dob dob zhit nzhenszhit zeuf yaos nyuas ghoul muas dlob max!

Ntrad ib dlaif xongb yib nkouk uat ib lob goux kunx, kit drout shout ib dol bangk xongb nded, ib lob ghoud "rel lot" zeuf uat rongt leuf. Zhenf muax ib yangf nof yuad uatzeuf yaos muab dex sod shangb dris drout shout lob goux nat zhit zhes. Muab ndout cenx sod shangb dris rongt, lob rel lot muax del nded nat let shid nyaos dout, shid lol lot gangb nghaos, lot gongx nzhual. Dluat leuf "Zhux Yenb Taix" qif shab, ndel dout ghoul muas muax nzhik langx, khaod rongt yuad daol zos touk nil mex "uat get naox maod". Ndox zhouk ruas, yad lol zhangf nangs leuf, lob ndox vul hend, dex mid gangb hod ndraox zhuas yad yangt sheud lol, dex ghoul muas lab, ghoul muas dlangx hnaod said yangt zos, yangt duax naox denf rongt. Muax ndout zheus ghoul muas yangt dit dit hod luax deb, ntoub shab yuad duas. Dex huaf nat, lob rel lot zeuf yuad zenb plot lak.

Nyuas dob ndel ghoul muas khaod lox zhit yaos wef bob ghaib, yaos sangd ndros ghoul muas uat shit. Ib zhangd ged uat shit yaos jat ghoul muas mol "muas deul"hlaik dot ghoul muas got dud, traik ib yangd gangd ndraox mol hod, let muab nil mex zhaot yangt. Khaod uat shit nat muax nzhik hef nenb, zhit rongt. Uat let zeuf uat "ghoul muas dik chongb"muab aob dol ghoul muas kit drout shout zox sod nded chif buad aob daos, let zhaot yangt, jat nil mex jangb dreud sod lab ngangs zhed chongb. Khaod ged uat shit nat nongs jat muas shab yuad duas, khaod das lal zhit rongt, aob dol ghoul muas fenf ndout zeux kuab drout shout jes ndongt, daof ghangb duas chaib leuf. Dex nyuas dob ghut uat naf shuab mid tret zhit boub "duas" yaos dlangb nzhit, zhit duax shab dex mid gangb jax duas, dis lol sangd sangd dangf zhenb muax nzhik zouk nchait. Ghoul muas hod jed hlob zhit muax cangt, ndrout ndrouk lal hlob zhit muax ploub, zhit suk nboux nbaif rongt ngoux jat nenb zhit sangd haf nil, lal zhit suk gangb nzhis hlob dout langx shaib jat duab nens shaib bof zhid dleb dleb, zeuf ndraif zhit tlout jat dex nyuas dob langf dout langf uat.

Nyaob vangx xongb pangb hnob duax ghouf deb shout rangx sob vangs buab muax ib zongx bangx qangx wex, sangd lol yaos ghoul muas dlob lob vangx zhed. Ghoul muas dlob jed shongb hend, ndreuf hend, zhos yuad mangd mangd nzuax aob dlaif goux dik zeuf suk ib doud huab yangt uat yeux shab laos. Dus lal zhit zeux mol qib yuaf dex mid shad nat, "nyuas dob kouk del" lal zhit zeux, nil mex rongt ngoux tab yout yout, zhenf muax lob nbet nzif chuat gus hot "Nyangx Douf" nat. Bloub zhib dol ghoul muas dlob nyaob shout dex sob vangs tab bangx qangx wex nzhuab rouf mangd mangd yangt mol yangt lol, yangt mol yangt lol, nil mex uat duab ghak rongt, zhit dout yangt shab dluat rangx sob vangs. Nil mex zhit yaos ntrad naox, ib dos ndros ib dos zhit shik hot lal zhit shik pangd, zhit boub nil mex uat nat yangt mol yangt lol zhit zeux zos shad yaos wef dol dlangb zhit. Nil mex yuad zhof yaos muax jait let, zhos yaos beb zhit boub sub. God nyaf shaib dex mid shab ngal nat shend jed zhit muax nzhab lol, nyaob bol duab yus shaib nyaos haod lex. God uat nat shout deuf lol, yol lal boub dak zhit muax dol zhit rongt shaib let, dangb guas god nzhens dout, touk nzhib drous uat nad, gaox nchait lal zeux shaib uat ntoub shab laos, nad muax nzhik zeud. Lob jaix ghoul muas deuf lol yaos lob jaix douf ghex uat bluad, "Nyangx Douf" lob nbet nat nchait zeuf yaos uat nat dout lol let. Ghoul muas dlob lob nbet nat rongt hend, rongt nongs dluat gongx chuab nduas, jat nenb ib nongs zeuf zhit zeux hnaod ghangb.

Haik lol zos, touk gat zid nzeuf khuat gaob lal ret bloub jous xongt leuf, dangb guas beb shaib lol nil hluak hend, ndros beb dex nyuas nat nyaob nyaos dout ib beus. Muax ib ras, nil hnaod beb zhenf lud zos dex xongb jax muax zhit muax bangt juat, nil lal nzis hout lol, bangb ceub god. God sangd dak hod dex xongb muax bangt juat, zhit let nat, dex xongb hod job deul uat jangl yuad zeux deus uat npid npongd nid? "Xongb Deus " lob muas ndeud nat muax lob muas ndeud "Xongb", zeuf yaos wef touk nzod zhit dout zhif deuf chuax deus, "Xongb Deus" zeuf yaos ib yangl yangl xongb. Zid nzeuf khuat gaob touk ndeuf zeuf zad hlaot ib dol xongb lol, geut uat jid daos lol nak drout hod dlex shix shaib. Zeux uat let jangl? God zhit haik, gaox mol shif uat nyaos dout.

Muax dex mid nyuas xangt yif xongt duax, zid nzeuf khuat gaob zeuf zeux nyaob shout ib dos xongb bangb gik dak nil shab bes zheus, jat nil tab xongb shik dud shaib dus hlob dout shait, dud yenx xongb leuf muax naf dend khuak! Zid nzeuf khuat gaob said let dob yaos dex xongb maol xongt gat khaid nil hlob deuf lol, jaod xongb maol gus pangb ndrout buab muax ib cenx hmongd dleub daof ghangb zhenf zeux hlob dout shab nchuat, dex nyuas uat jangl dud nyaos dout yenx ax! Tlout leuf jid lob hlit draod nzhual, mid nyuas dob yaos shub leuf. Shaib jat dex nyuas shab jend zhuab doub hout, zid nzeuf khuat gaob rongt shab zhit doul dangs, luas ax, luas ax. Xongb nyaob Zhongb Gox muax zhib buat ndout zhangd, yeuf guk xongb Sangb Sib bof dak khuat gaob yif lob vangx xongb jaos let yaos "xongb minx zhuf". Minx zhuf "nghaix" duab, yangl xongb "nded", yongx yif puat njout. Ndox zhous vongb angd chab, ndox chab zhes nzhuas hof shif, khuat gaob yif lob vangx xongb angd draos tab det changd zouk, xongb huaf rongt, gangd rongt, guk njout dob nyaf muab lol hab "mid juab yenx ". Sangb Sib dak " njout puat xangt fenb hab beb fenb", haik hnyangd zos puat njout muax nghet. Xongb faib muax beb cenx, cenx ib hot njout nzhuab, cenx aob hot njout dlangx, cenx beb hot njout draod dlangx, nghel mol zeuf yaos bleud dlangx, ros njout zhit zouk, zhos rongt uat deul droud. Fenf ndout zhos deuf beb cenx njout, dex njout rongt nyaob ndeuf dex guk caik del, njout nzhuab zhit duab bes zheus hax faib nyaos dout aob bluax. Sangb Sib zeuf yaos dex guk deut del shab nat. Puat njout nzhuab zhos yuad shid dras xongb puat lob njoux, zaik nghel mol zeuf muab del lol dluat, ib huaf yuad ros del lol duad zhux. Sangb Sib dex ndid del yeuf ndos yeuf lot, zhenf muax buab del gad cangb, zhit gangd nzhens dak caik del ncib uat nat dluat nyaos dout dex bluax xongb nyal tab yenx jenf uat nat deuf lol, hab dout dex dlaif led xongb nblas maol jit los.

 Ndox zal, khuat gaob yif lob vangx xongb shout sob vangs zit dout ndout zheus zid. "Zid lus zid keub" suk let mid zid lus, sob nzhuab zhas dlangx, ghoub hend, zhit rongt naox, dangb guas deud kaod rongt, uat nyaos dout qeux deud uat shit, uat shit dluat leuf shout del ib hnob dob yaos zhut ghangb laos, hnat drous nkhek hend, naox nyaos ib naf ndif maod.

Ndros touk maos shad ib suk, zos lob jaix nblex shad, khuat gaob yif lob vangx xongb dex nchoub ris ib blas ndout sheud lol. Lob vangx lox, muax naf ndongt shab, las nyaob dit lax, jaod nchoub ris nzhet ndreuf zeuf muab khuat gaob yif lob vangx xongb uat “lob qeut daof ndex rongt nyas nblex naox.

Zid nzeuf khuat gaob zhit yaos guk xongb, dangb guas nil del ngal, zhit dangb zeux hab deub njuad maos, zhenf hab nyaos dout dex deub zhox muax ghoud muax rangf rongt ngoux. "Deub zhox" las hot "deub ndlaos", muax ghoud bloub pangb, hod deub zhaot ib cat nblex deub rel, dlait draot shout jes ndongt juab nchoub ris lol naox. Deub zhox pangb shout yaos ib shangf khaod drongx dis dout, dol got drongx ndruab drout khaod drongx ndruab ndrangb, uat nax dob yaos dax lal, ib muax nchoub ris lol zheuk, khaod drongx nzend hlaot, nchoub ris bongb hlaot hod khaod khaod juab. Shout khaod drongx muax ib dol mid nzhat, nzend draod lol kub ngouk, dol nongs zeuf yangt zhit dout deuf mol. Deub zhox qeut geut muax ghoud ndout yangf, zid nzeuf khuat gaob haik dak yangf nat yaos nil zhif deut lol let. Nchoub ris uat blax plot duab uat nenx drout ndeuf dex duab nens ib njis ndos, boub dout ndout zheus duab nens dex bloub ndos, maox rens hef zhit drous nil mex, zhos muax lob deub zhox gus geut dreud nchoub ris dex luas let lenl jat nil mex shout shab ib nzhik.

Lob jaix nblex shad nchoub ris naox dout zhout, dex bloub nblas longt suk let ndouk dluat jab, ndel drout hod del suk let duad dreud ib del zhox nbuas. Zhit dek sangd dak nchoub ris dlaos dlis, nil mex pix qif lox, shaib hnyangd yeux shab, yenf duas dob zhit uat khed, gaox duat nyaos nil mex, dangb guas geut zhit dout yos. 

Dex nchoub ris muab deub zhox ndel dout ib ndrangb yaos wef nongs hef, ib ndrangb yaos wef rongt uat shit, yaos dak yuad ndel das, yuad dout muab lob ngis nongs juab. Muab ib lob naf ngis dlangd let jid jouf pinx mik nghol sheud lol, zaik dreud ndouk ndrual leud nongs, nchoub ris jenb drous zhit said ged, yangt mol ngangs drout hod lob ngis, kuab hot lob ngis yangt zhit deuf, muax dex huaf ib lob ngis kuab dout jid jouf dol, chenx buat dol.

Nchoub ris nyaob uat get, ghuax uat duab nens ncod shab, zid nzeuf khuat gaob dlait deub zhox, zhenf guas beb shid dangf gongb, dangb shik yaos muax duab nens yuad duax hod vangx xongb nghol ngis juab nongs, zid nzeuf khuat gaob zhit jat hlaot. Zid nzeuf khuat gaob haik dak muax nbouf ndox nat nchoub ris duax ndeuf nat, haik minx ndeuf nat shoud daox rongt, rongt shaod daox yaos zhuax bual zhit dout let.

Nchoub ris shik shout uat nbaox ndul zhit zheus bof, khuat gaob yif lob vangx xongb rangf ruas zeud lox yaos ib dol vub gueb loul. Dol vub gueb loul gat yaos zid nzeuf khuat gaob nyaob hod lax ndel let. Nyaob hod lax ndel dout vub gueb, zhit muax dlangb nzhit xib qix, xib qix let yaos dol vub gueb nat yaos ib vub gueb hlob zeudzhit muax aob caik deut daof ndex. Uat rongt nuaf, aob caik deut daof ndex muax, zhos yaos duab lot hend, ngouf draod hod lob ploub shid zhit dout dlangb zhit, zhos yaos bad jat sub. Dol vub gueb nat sheud lol langx hend, dangb guas nil hax shik uat nad jax dout buat xongb leuf. Xangd zos khaod nat, zid nzeuf khuat gaob duef pef fux nzas dol vub gueb nat, zeuf muab nil yos drout hod vangx xongb, hax xangd zhud yif bangb nil ndruab "jes shab bleud"ib ngeuf mid laos. Mid laos yaos hlet shout ib lob chuab lol let, muax zhuangf zhub, njis dout ndreuf hend. Vub gueb loul shab ngas hend, zhit yuad bes zheus lex nil zeuf boub uat jangl shid aob lob laos nat lak. Ib dol vub gueb jaix dreud aob lob laos, mol uat guas nzas, uat drout duab nens jenb tab chuat shab. Touk gaox xangb drout hod lob vangx gus buat bod nblongx xongb, hnaod dex mid shuab "zhit zhit", zeuf yaos dol vub gueb loul zhit dlaos dlis deuf duax lak. Beb bangb dol vub gueb loul dik dout lob nbet: Mak Laok Sif. Yad boub dout Mak Laok Sif lob nzhab yaos dlangb zhik? Gaox zhos yuad boub dout Mak Laok Sangt yaos dlangb zhik. Mak Laok Sangt yaos dus? Mak Laok Sangt yaos dol yeuf kongd baob, nyaob shout kut ceub ib lob mid cheb pinx bangk muas jeud job. Mak Laok Sif bof ndout boub dlangd, ib nzhik zhit nchait nenb, yaos dak gaox muab nil zhaot drout shout sib del, nil lak ngenl muab doub hout got dud caik jes ngouf draod hod lob ploub. Nil dind nchait Mid Fongf muab maod rat drout shout nil lob ndrouk ghouf, nil shid ros xangb dangl got dlangb lal njangd zhit juas jaod maod shout ndrouk ghouf, zhenf zeux rel dout box ghaib loul duax zenb njeuk ib dangd shot. Njoux ghaib njeuk drout shout lob ploub juas nzhat nangs, zhens uat nil blangb nyod zaob ib rangs rangs.

Khuat gaob yif lob vangx xongb ndrout rangx sob vangs zeuf yaos lax deb. Dex hnob lol nbot bangx, nbot bangx zeuf muab dex rel lax dax lal nbos uat ib dlaif dlaif nbod dleub bous. Jaod nyuas dob caox baob tab dex nchoub ris senb zaob uat shit zhit zhes. Nyaob hod dex lax gus nbot nbos jat, muab ib dol dreus xongb cenf dreud ib lob naf vangb chouk. Ib zox sod mangx ib daos kit drout shout dol dreus, daos it qeuk tlout dex koub bol zid lul ndeuf rangx sob vangs lol duad drout hod beb del. 

Nchoub ris nax hnob yangt njis laos, zhit muax khoud  naox keuk jat, ib lol nbot zeuf bual lak, ib blangs dleub bous, yad mol khaod dus ntrad naox ax? Nyaob shout ndox yangt uat chouk shab ntrut, ib muas nuaf bof shout nbot dex nblex (khaod das fenf dout yaos ploub nblex), ntoub shab ghak laos, zheuk lol shout nbot keuk naox. Nil mex zhit zeux mol ged, zhos zeux jeuk pleud, nyaob shout nbot zhox deuf ghoud nblongx xongb bof los. Nuaf ib njis ndos, zhit muax nenb, zhos muax nblex, zhos muax blangb chaibnchoub ris zeuf uat nat ib pleud ib pleud mangs jaod ploub blex deub mol jex ghangb lob vangb chouk. Touk nat, yuad dout nak nyaos doul bangt, nchoub ris zhenf shif shaibtlat mol hod vangb chouk, zhas ib blas tlat deuf lol, nil mex zhenf zhouk shab nchik, sangd nbangx jat zhid dangt. Daol zos nil mex zhaot shab nghel lol nyaob jex vangb chouk ntrad nblex naox, muax nchoub ris ndout ngangs lol hod khaod juab, gaox zeuf nghol nyaos sod lak. Zhit caob sangd dak nchoub ris kub drout hod vangb chouk zeuf yaos gaox let lak, nil mex muax dex uak zeux chenf touk gaox xangb del mol ndel zhid dlif leuf. Zhid zeuf zhid lak, dex nchoub ris zhid zhit dlif zhos zeux jat dex nyuas dob jaox mol uat shit uat duas leuf.

Zhuab ib del nbot shid ros nyif, muax dex uat dout ib tox dlouk, muax dex zat uat ib del dlex. Zat uat dlouk let yaos nbot khuad, zat uat dlex let yaos nbot lux. Ghangb deb dex nbot fenf ndout yaos nbot lux. Nbot lux rat drout shout dex jes xongt, rat ndout leuf zeuf zeux muab jes xongb nak lod leuf, yuad dout ndeul ndas muab nbot jot nghel lol. Nat yaos jel nof beb zuef nyaf bangb zid nzeuf khuat gaob uat. Jot ax, jot ax, vangx xongb bes deb lal ib blangs dob dleub dangl leuf. Dex jangs xongb buat luat jex bes deb muax nbot ndob nzhuad, rongt let shod shaot, zhaot shab laos xangb xangb dluad, suk let jex got deut muax ib zox zox shad zhenf ndit laos, ngangs lox leul. Jangs xongb zhit yaos xongb dex jangs, yaos goul hlangd, nil mex nyaob lob ndox chab zeux hlangd deuf dex uat goul chabdex nat zeuf yaos nzhuas lak.

Zos lob ndox chab, zid nzeuf khuat gaob zeuf muab rangx sob vangs lob khaod fongb duas, zhenf muab lob khaod qeut jaod hluak ncaik uat bangx ndoub dex zas angd chef leuf, jat jaod jangs xongb hlob mol cuat khaod, duax  nzhuas ros reul.

Zox shad dlangl ros luax dus, jangs xongb lob dlangl ros lal luax dus. Muax dex huaf nil mex zeux zenf deuf deut cangx ngangs lol hod zhed, nzhuas duax drout hod zhed. Nzhuas chab chab kob, ndos rongt, maol nyongk, "Ib hnob beb cunf, ib hmaot ib chif", ndeul ndas zeuf hlob dout shab zix dex xongb loul. Touk nat, nzhuas zeuf muab dex ploub lab ploub chuak hlet leuf. Zhos yuad dex hnob muax juat, dlout deub zeux ib dlaif dlaif hlet shout dol xongb nghel lol, ndraod uat chix chuax. Nongs dreud dex shuab nat, sangd dak nchait nzhuas xongt muax nzhik zaob, muax nzhik maob. Dex nzhuas chab dlout deub hlet leuf nzhuab maol nyongk, sangt deuf ib bangt ncab sef zhuas zhuas, shout deud muax ib cenx hmongd dleub maol maol, xangb del suak suak, ndid del zeux nblas haod lex. Dex nat yaos nzhuas lob ndenl hlob dad baf? Nzhuas zat uat xongb leuf, zix nat mol zhit hlob shab, zhit hlob ndos, zhos hlob kaod. Dex nzhuas ndox chab, uat jangl yad suk dex nyuas rex raol uat luax ax!

Jaix naot zhit dout tlout, vub gueb Mak Laok Sif hax ngouf zhoux. Yaos dax dol vub gueb loul muax buat xongt shub rox rol deuf drout ndeuf dex nzhuas xongb ib njis, uat let yuad zhof yaos ib dlaif dluab ndout zheus muax nzhab lol ax.

Dex mid nyuas daol nzhongd khuat gaob yif lob vangx xongb zhaob qangx wex deus bangx, ntuad luas rongt shab laos shout sob vangx dex koub boul zid lul nghel lol.

Bangx qangx web deus uat ib doud doud, khuat gaob yif lob vangx xongb zhas draod khet drout dex mid nyuas leuf. Jaod bangx deus uat ib doud doud nat hax muax ib lob nbet cenb ret hot uatgouf gud ved.

 
【 文章作者:熊玉有 王… 文章来源:熊玉有 王兴发 点击次数:120 文章录入:hmongheu    责任编辑:hmongheu 】 
 
 【发表评论】【加入收藏】【告诉好友】【打印此文】【关闭窗口
 网友评论:(评论内容只代表网友观点,与本站立场无关!)
 
 

 

点击申请点击申请点击申请
| 设为首页 | 加入收藏 | 联系站长 | 友情链接 | 版权申明 | 管理登录 | 
云南网警


主办:文山州苗学会
Copyright 2007-2015 © 文山苗族 All Rights Reserved 滇公网安备 53262102000271号

苗山新事:侯 健 七彩苗山:吴德华 苗学研究:李维金 苗山音视:陶志文
苗文空间:张元奇 文学园地:陶兴安 苗山风谣:杨朝山
站长信息:QQ 464402767 邮箱464402767@qq.com 手机 15308766544
 站  长:张 元 奇..技 术:杨 永 平、许 东

信息产业部备案
滇ICP备15005284号