设为首页 加入收藏

用户注册· 联系站长 · · ·

>> 您现在的位置: 文山苗族网 HMONGB BANGX DEUS DEB >> 苗文空间 >> 文章作品 >> 正文
 
 

Nchoub ris Hod Juat

文山苗族网 HMONGB BANGX DEUS DEB·[2018-4-15 16:47:17]

Nchoub ris Hod Juat

风中麻雀

翻译:熊玉有 王兴发

 

Zhud zhif nox nyaob touk zhif cuat yangf jax shad, yuad zhof yaos duax shab drout khaod shik pef tab dax dol let. Dex nongs bloub rongt ngoux fenf ndout zeuf pef muax lob shuab zhit chuat rongt, dex shuab rongt nongs zeuf pef drout dex nongs bloub zhit rongt shaib. Loux uab dex bloub zhit rongt, zeuf dout lob shuab rongt raos nyaob ndruab ndrangb, kod sif nil mex zhit zeux shid, kheb njoux zeuf yaos ib lobuaf, deub nenb nzob.

Nchoub ris dex bloub tab shuab dob zhit rongt, yaos zhud zhif nox zhit drout zhit uat duab rongt daf nil mex. Nchoub ris daf shik zhit gob shab, tlat bel tlat ndrangl, jid jid jaod jaod, ib hnob zhouk ndox luas nkhuak suk zhit muax shab nzhuk. Nil mex nyaf nyaob dlaos dlis, lenl zaikzhuas blil let yaos das.

Nchoub ris nchoub ris, lob blangb bleud nongs jaxnat yaos mex uat nenx rongt shab lob houd boul baf?

Nchoub ris ib nzend muas, dak: Cax zhit yaos, zhuas blil yaos muax ib khaod uat ndex let, khaod ndeuf zeuf yaos nyaob yeux shab.

Nchoub ris zeuf dak yout, dangb guas nil buab lob shab dous jout yeux shab yaos lox hend let. Nongs qed yit yat xof lol, bax gob lal jat duab nens muab nblais zad dluat. Loud kongx qox zhit zeux zangx muas nyaob ndeuf duab nens dex chaot zaix chaot lous daof ndex ntuad ncend nil jed bloub, dex dol lax nggof lal zeux muax ib fenf gouf jat nenb muab nil khat uat ib dol dob bangb del leud nghaix. Dex nongs nyaob hod jongx hot ngoux zeuf yif huab ndout lak: nongs zhib git, nongs rax, jongb dlangs, jub jub...

Zeuf yaos zhit dout bof dluat nchoub ris drous nenb khat zeux dluat. Dob ghongb dak: Nchoub ris pix qif lox", yos zhit jax.

Dex nchoub ris drous ndel geut fenf ndout ndeul ndas drousqif duas, dex pix qif rongt zhit naox zhit houk, ib aob hnob lal yongt chaib duas leuf. Yaos dak muab aob dol nchoub ris draod shout geut uat get, tlout leuf ib hmaot, nil buab lob blangb dob mangs njeuk daot dangl, duas dout yif huab langx shaib. Nil buab aob dol shik bangb njeuk lol nchangd, dex nat yaos yol duat yol duas muax ghoud zeud. Muab dex nchoub ris njoux dlangx geut jat, nil buab dex naf zid boub dak jeuf zhit dout leuf, nchait dol nyuas keuk duab nens khuab dout, zeuf nghangt dex gangb laof tab dex zid laof duax muab nil buab dex dob ncaik laof duas. Zhit yeux shab, yenf duas molyaos nil buab lob blangb bleud jax,  yaos zid nenx yeus das.

Nchoub ris dex lol ndrual nzhik shab nat dob yaos nongs lol let, god dob nzhens, wef god lal bof dluat jid zob bloub haik zos nchoub ris.

Touk yout, god yif nyaob ret ndeuf zhed zhaot ghongb, god lal ndros nchoub ris nyaf mol zhed zhaot ghongb njis uat shit. Ndeuf gat muax lob changd buaf dlangd, did hof dex nyuas dob lob shab. Ib ras, beb muax jid dol nyuas dob mol ndeuf lob zhed zhaot ghongb khaid nik uat rongt uat shit, muab ib dol nchoub ris dud drout hod ib qangt zhed kongb. Zhed zhaot ghongb shab tab lox, ndox lal yad zhouk, beb  uat zhit dout nchoub ris let jangl, beb zeuf muab khaod drongx geut ndof, yof dak hnob ghangb sheud nzod jaox dangf gongb duax shik dud duat buad. Hnob ghangb sheud nzod, nchoub ris dob duas drout ndeuf gouf cangx leuf. Zhed zhaot ghongb khaod drongx khaod draik dob yaos zas ndongt uat let, zhit muax ad bof ged deub nchoub ris mol nzhout, sangd lol yaos nchoub ris yangt zhit deuf mol qif duas drout hod zhouk ndit nat. Dol nchoub ris nat bloub chab kob, hnob nyongs shib, deud blangb dleub lal qaof ndaos, aob caik mid deut reuf jend uat ndris, shaib jat dol nchoub ris nat duas uat nbout deul dot shab ntraot.

Shout kut lob naf zhed ndenl shout drod zhed muax aob rangx khaod draik bof ged los, jaix nyongs nded leuf, ad khaod draik dob deus zhit rongt leuf, hod zhed ndenl shout liangx zeuf chenx lak ndout zheus nchoub ris lob qeut shot. Zhed ndenl zhit muax duab nens nyaob, dex nchoub ris dind nyaf dex lob khaod qeut dlangd tab ngouf dout nangs. Yaos dak zhed ndenl muax tlat zox lal shik zhaot dluab sob, dex nchoub ris zeuf zeux nyaob hod lob mid rongd ndeuf zhed ndenl ib pangb shot ib nzhik, zeuf suk dex khuat njis shot zhed khuat gus daol las kot qeut but. Lob rongd dex ndongt lox tab shab, lal yaos ib lob qeut druax dol.  Muax ib hmaot, zhed ndenl zhaot dluab sob, haik zos zhod draos, shuab duat ndraod ndrenl, dex nchoub ris zeuf gad renl zhid mol ngouf hod got rongd. Yaos jaix ndox shod, gob vul, ib blas lol lak ib gaob nangs sob, naf juat nzheux duax, dex nzhat nangs lox juas nzhat zid yangx meb. Dluab sob zhaot dangl, nangs juat ib blas dot leuf, dex khuat shaib dluab sob bof hod bes deb tab got koub muax ndout zheus "nchoub ris ndob nzhuad" bongb blis jaol. Duaf cix ghut dreud ndel nchoub ris, muax duab nens hlet chaot lol khud dout ib naf baob nchoub ris jax ndob nzhuad. Ndel uat ros reul ib blas, jid buat dol nchoub ris chaob dob mangs ndel dangl, zhit yaos drous ndes zeuf yaos drous zhox duas. God bof nzhongd ras nchoub ris drous ndel nat. Nchait god nongb nyongs shib ros yout, god dol muaf aob muab god duad dreud, zhit jat god mol ndel nchoub ris. Dex mid nongs ndob nzhuad shid ros nbuax dik yangt  drout cuat khaod, wef shaib zhit dout dleb, zhit bof ged yangt, npid npid npongd npongd nzhout duas drout ndeuf sob cangx lal shik got ndongt. Muax ib dol nchoub ris yangt lol nzhout god got deut, nil dol ros zhit yout das, god hnaod suk let drous duab nens shid shid ros ndouk ib ghuk hnyangd. Draod zos zhed ib nuaf, shout got deut muax ib gangb lut nchangd lab, sangd zhit deuf nat yaos drous ib dol mid nchoub ris nzhout deuf lol let. Wef zenb dout yeux shab, dex dol mid nongs uat jangl yuad shed doul shad dob zhit yuad nid!

Nyaob drout hod beb dex nyuas dob lob shab, nchoub ris yout hend, zhos yuad beb ib val del, ghut ib shuab, nil buab zeuf ghuax plik shuab, zeuf zeux zhid leuf. Dangb rangx, beb lob zhud yif nat zhos hof shid drout mid nchoub ris khaod nyik yos deuf drout xongt ndeuf, dex dol nchoub ris loul zhit nchait beb lob zhud yif nat, nil buab nyaf dous zhit dous let, lal shik uat ib dos dlangs nzhuad suk let muax nzhik nchait ntrut, ib nzhik zhit khaod suk let hef drous ntuad deuf lol. Nil buab boub dout duab nens dlangb zhit deut del let yaos khaod zouk nchait, nchait lal nzhual langs nyaos dout duab nens khaod shab rongt lal shik shab pef. Dex duab nens deub nil buab uat shit, nil buab boub dout, yaos dak lob blangb zhout dreud, nil buab zhenf nyaf ndros duab nens uat ib nzhik shit nix.

Nil buab ib nzhik zhit nyaf dex dol maox rens kit uat dlaos uat dlis, shaib bof zeuf ndual uat dox deul: Jat let lak, mex nblil beb xongt mid nyuas ax! Nil buab  dangb dreud dex nenb, yangt mol shot drout shout dol maox rens lob doub hout, nyaob shout nzhik bloub, nyaob shout uat shit zhit nzhex lenx dus, suk let ib nbaox mid nyuas deub nenb tluad shab.

Mid yif dex nyuas nbout deul deuf duax, muab nil buab leud zhid dleb dleb let, let nbuat maox rens paob sib, ndongt lob maof led ndluas, mol ndrel duab yus drout ndeuf lob ghob khaod qeut, sangd jat dex nchoub ris loul mangs nblis ib ras. Dangb shik nchoub ris loul zeuf yaos nchoub ris loul, ib muas zeuf shaib duef duab nens khaod hob nblil, ib shuab zhit ghuax nzhoub daof nenb ndrouk ghouf nghel lol, nyaob shout nenb lob doub hout njeuk ib blas, let luas nkhuak yangt ghaix lais drout hod dex koub bol leuf.

Hod dex lol ghangb deb haik letnchoub ris loulzeuf yaosyeuf nblas hout”“mid zaot ghetlob lol ndeud shik suk. Yaos dak yeuf nblas hout muax dex huaf uat tuax leuf, nenb ghangb deb zeuf zeux haik: Nongs loul yad bongb bloub lak, ndeuf nat haik let nongs loul zeuf yaos nchoub ris loul.

Ral nat yaos dol nenb nblil uat maox rens bongb bloub lak.

Nchoub ris yaos nbaox uat nenx ghangb shab, nyaf nyaob chenx nbaox, nyaf laof ref. Nil buab kend wef lak ib nzhik khoud naox zenb uat ntet juaf dlaos, dangb guas yaos nzhib drous dex khoud naox muax mzhik ndout, nil buab zhas zeux ghut luas duax ib cix naox. Nil buab sangd dak nyaob uat get naox yif huab  muax luas, lal druax dol raos, muax nbouf ndox mid doub hout dis mol dis lol, muax dlangb zhit ngouf nyaos tlout nil buab dex khaod muas ax.

Muax ib ras, god ut lak ib douk nzhab, duax shab mol nuaf nil buab uat get naox. Ib dol nchoub ris yangt lol leuf, blox blongs ib xaod huaf let uat duab rongt mol shif njeuk jid nzhatrongt naox hend ox! Khoud naox ndout uat luax, nil bleul nat yangt mol leuf, xaod huaf hot dout zhib drout dol luas duax. Nil buab jid jid jaod jaod naox uat rongt shab laos, laof ref hend. Muax jid dol blongs doul hend, zhit muax ghangb hout tlat mol tlat lol, suk let yaos buaf yif yuad res deuf ib nzhik ncod ndox nab. Naox ib xaod huaf, zhas draod yangt duax ib dol nchoub ris ndros nil buab uat get naox. Nil ib duax, muax ib dol nchoub ris suk let ib blas sangd zos dlangb zhit, yangt bleul leuf. Nil zhit dout yangt mol dleb, zeuf mol zheuk drout shout jes ndongt nyaob zhit dleb, got dud zhangt mol zhangt lol, doub hout dis mol dis lol nyaob ndeuf shaib bel shaib ndrangl. Tlout leuf ib xaof huaf, dol nchoub reis shout jes ndongt zhas yangt draod lol lak, nil ib draod lol, zhas muax ib dol nchoub ris njaif mol leuf, draod mol zheuk drout shout dol jes ndongtGod nuaf deuf lol lakNil buab uat nat yaos zaik dreud rod shaof nix.

Ndros ndout zheus nongs ib suk, nchoub ris nyaob hmaot ndox lal yaos caik dol dlis muas. Zhouk ndox, gaox bof rel nchoub ris, hmaot ndox jaox dinf tongx mol bok rel, ib bok dob dout. Nchoub ris ghuax ntaot, ghuax jid shuab zeuf zhit ghuax leuf, nil buab nbout deul tlout zenf uat nil buab ib jet jeuk dangl, jeuk uat nil buab shuab dob ghuax zhit deuf lol. Nzhab dout ib dol nchoub ris, gaox zeuf suk let duad dreud ib tox zhox nbuas, hnaod nzhongd muax ib lob bleud tlat nzhout njangx ndraif drout gaox sib del. Muax dex huaf, hod lol rel shod shaot hax muax ghet nongs, fenf ndout muax aob lob, shod shod let, nblas nblas let. Nyuas dob zhit duax shab ghet nongs, yout tlout, hnaod dex loul haik naox ghet nchoub ris shout plot zeux deuf ghuad hnangd. Muax dex huaf, hod res shod shaot muax nyuas nongs, bloub shib nblas nblas, dol goul njoux dlangx rab lox dout rongt luas. Yaos dak hod zhed zhit dout yos chuk, dol ghoud langx shaib nat nyuas dob lal shaib zhit drous.

Uat nat nzuad deuf lol muax nzhik truad shab, khaod das dex nyuas nyax shab ndrenl mol bok nongs zhit ndout. Nyuas dob zhos nyaf ndros nchoub ris laof uat shit, fenf ndout zhit zeux duax das. Nyaob hod deb nbot juab vangb chouk, nyaob qeut ndouk nblex duat dangf gongb, nyaob shout dex jes ndongt blend guat nblouf, dex nat haik lol dob yaos muax khaod uat shit, dout nyaos dex naf hlob zhaot njoux. Yaos dak nyaob ib hmaot mol bok rel nongs, uat let ndeuf zeuf zhit ib yangf lak, naf hlob zeux ntet ntaotJaod nyuas, mex uat gat yaos shab pef ax!

Muax duab nens nyaob hod vangx xongb lal shik hod rongd ndongt jangb zhaox juab nchoub ris, hot uat jangb nchoub ris, zhaox lox hend, ib lob zhaox juab nyaos dout buat ndout dol nchoub ris. Uat dex nat dob yaos wef ntrad zax, muab nchoub ris muas drout dex nenb uat luaf uat nghait naox.

Nenb “jangb nchoub riszhit drous las nyaf, vangx xongb dol zhud kend deuf lol dangd jat. Muax ib ras god zeuf hnaod dluat khuat gaob yif dol zhud loul ndros dex jangb nchoub ris haik lol.

Khuat gaob yif dol bos loul: God yif vangx xongb muax nzhuas ax, zhit dek nyaob ndeuf nat ndel nchoub ris.

Nenb ndel nchoub ris: Naf bos loul, nzhuas dob hlob uat xongb lak.

Dol bos loul: Nzhuas yaos duax drout shout dex jangs xongb, jangs xongb fouk drout hod angd, mex nuaf zhit bof.

Nenb ndel nchoub ris: Uat let beb zeux uat duab rongt.

Dol bos loul: Uat gat lal zhit dout, dex nchoub ris hmaot ndox duax hod vangx xongb yaos beb yif yos let.

Nenb ndel nchoub ris: Bos, nchoub ris khaod dus muax duab nens yos let ax?

Dol bos loul: Khaod dus zhit muax, god nax hnob nyaob hod vangx ut nzhab, gaox mol bel dex raol nos nos shaib

Khuat gaob yif dol bos loul haik lol minx minx zhit yuad ged, dangb guas hod raol dex nenb yuad zhof zeux bangb nil. Zhit boub uat jangl, nongs dol bos haik dex lol muax jait hend, suk let nil yaos dluat beb leuf zhenf maob shab ib nbaox nyuas dob hod raos.

Nchoub ris caox baob, gangx shab, nyaf nyaob uat ib beus laof uat shit, dol ghoud ndros dex nyuas hod raol shik zeud zhit ndout. Nchoub ris muax goux dik, dangb guas zhit zeux drout shab yangt, zhit yaos yangt uat blox uat blongs zeuf yaos yangt ghaix ghangb ris hout. Nil buab muax drout deut, dangb shik muab  mol ged hnaod ghangb leuf, zhos zeux tlat ib pleud pleud. Nil buab dlaos dlis, zhos yuad muax ib nchuak changd ndox, naox nyaos zhout, zeuf rongt shab zhit doul. Nil buab yangt mol yangt lol, bagnx beus ndrenl, laof dreud, uat drout rex raol tab mid kut bangt mongt nqot laos, uat drout lax ndrangl muax shad jax zhal.

Touk yout zhit dout uat duab rongt shaox shaib, sangd zos touk uat duab rongt shaox shaib nchoub ris, god dob nyaob hod ndrongs leuf. God nyaob tenf bloub, shangb dif lob chuab shod zal jex ghangb khaod draik zeuf yaos nchoub ris ib lob juab yis lob khaod qeut uat nax nyaob, ndeuf suk let zeuf yaos nil buab yif qangd zhed shot.

Dluat leuf ndox zhous, shout chuab shod zal zeux deuf muax mid nchoub ris dlous deuf zhit dot. Dex mid nongs nat lob jed ndros naf nongs chaob bek dob, khaod zeud lox bof los zeuf yaos ndeuf goul njoux muax ib gangb dlangx lil. Nil buab nyaf ndit dluat dex nongs lox, tlat bangx beus laos zhit muax nghet dlangb zhit, yol lal zhit boub yuad uat dlangb zhit. Nongs dex bloub dob yaos lus draod daof ghangb, uat let ndeuf nil buab nyaob hod dex juat dob yaos ndrel dis draod ghangb. Dex mid nongs zhenf zhit boub dex nat, juat muax dex huaf muab nil buab dex bloub chuab ncod ghak nyaot, uat drout nil buab ghuax ghut leulnad yaos uat jangl lak! Nad yaos uat jangl lak! Dluat leuf ndros naf nongs yuad naox, nil buab zhit muax nof uat, nil buab suk let touk dus dob chaib dreud blangb, ib bof naf nongs lol zos zeuf gad rens mol zenb naox, muax dex huaf zeux muab naf nongs nzhout ghous njis laos. Muax dex mid nongs zhit dout xof zeux nghaol khoud, khaod njoux sex druat zhit shot, shid ndout zheus ros let muab khoud naox shunf njangx, zhas ib xangb jangx dlangb muab khoud naox langf dout langf nghaol nghel mol.

Touk nat, nil naf nyaob ib pangb tlat dreud, dis mol dis lol shaib nil dol mid nyuas. Dex mid nongs zenb zhit dout khoud naox ghok dreud khaod njoux, goux dik buat luat, dol ghoud suk let dot shab ghak ntraot. Naf nongs got dud ib nak, yangt mol leuf. Yuad bob zhout beb lob njoux, nil zhit yongx yif.

Muax ib hnob, hnaod dex nchoub ris ghuax jenb dreud, gad rens mol ndeuf khaod draik nuaf. Yaos ib lob naf hnangb suf liaof dleub dlait shout nzhik ndongt hef drous dex mid nchoub ris. Dex mid nchoub ris buab jat shout lob chuab shod zal, deuf dreud lob  hnangb suf liaof ghuax duas sab: Dex nat yaos dlangb zhit yax! Dex nat yaos dlangb zhit ax! Nil buab dol naf draod lol leuf, yangt mol shout ndongt nuaf lak ib blas, hax muab njoux njeuk lob hnangb suf liaof, let jat jaod mid nongs nzhas dot nghel lol.

Jaod mid nongs hlob dout shait hend, zhit dout bes zheus lex zeuf hlob lox leuf. Nil buab nyaob hod dex juat yangt mol yangt lol, mol ntrad naox ntrad houk, mol uat lob nenx yeux shab, druax dol tab rongt shab leuf.

Nuaf jat nchoub ris lob nenx juab yis, zhas sangd zos duab nens lob nenx juab yis, hod shab sangd dak: Dex shad jax ndros shad jax, khaod das muax ndout  zheus shik suk ax!

Zhit haik duab nens lob shab rongt let jangl, nchoub ris lal nyaf ndros duab nens uat get uat nenx. Hod ndrongs nchoub ris zhit ndout, yaos ib khaot ib dos. Nil buab dol ghoud nyaf uat get laof ref zhit dout hlod, nax hnob zhouk ndox, nil buab hax shik shik shout uat get. Lob khaod qeut shik shout yaos duab khaod, beb njis ndos nat dex nchoub ris lob qeut shik shout yaos Haik Yix Kut Ghob Del ndrout aob rangx ndongt ndos ged. Touk yuad zhouk ndox, mol tlout ndeuf nat, ib nzhex dob yaos nchoub ris ghuax, nongs jat hax yaos lob shuab ghuax rongt shab. Lob kut ghob del chef leuf, nil buab zhas zhid mol hod nblangl got rongt ndeuf qeut ndrel cheb nyaob ghouf ndrongs shangb kut dif leuf. Aob lob khaod qeut nat dob yaos tangx qeut dex dob ndout ros shik shout, nchait dex nchoub ris mol drout hod ndrongs leuf, hod shab hax renf druax rex raol yaos nil buab lob vangx zhed? Zhit dout boub.

 
【 文章作者:熊玉有 王… 文章来源:熊玉有 王兴发 点击次数:97 文章录入:hmongheu    责任编辑:hmongheu 】 
 
 【发表评论】【加入收藏】【告诉好友】【打印此文】【关闭窗口
 网友评论:(评论内容只代表网友观点,与本站立场无关!)
 
 

 

点击申请点击申请点击申请
| 设为首页 | 加入收藏 | 联系站长 | 友情链接 | 版权申明 | 管理登录 | 
云南网警


主办:文山州苗学会
Copyright 2007-2015 © 文山苗族 All Rights Reserved 滇公网安备 53262102000271号

苗山新事:侯 健 七彩苗山:吴德华 苗学研究:李维金 苗山音视:陶志文
苗文空间:张元奇 文学园地:陶兴安 苗山风谣:杨朝山
站长信息:QQ 464402767 邮箱464402767@qq.com 手机 15308766544
 站  长:张 元 奇..技 术:杨 永 平、许 东

信息产业部备案
滇ICP备15005284号