设为首页 加入收藏

用户注册· 联系站长 · · ·

>> 您现在的位置: 文山苗族网 HMONGB BANGX DEUS DEB >> 苗文空间 >> 文章作品 >> 正文
 
 

JEUF KOT BOX ZHOD LANGX LANGX 拯救雌虎蓝蓝

文山苗族网 HMONGB BANGX DEUS DEB·[2018-2-13 23:10:25]

JEUF KOT BOX ZHOD LANGX LANGX

拯救雌虎蓝蓝

                Dol shout:Shenk Shix Xib(沈石溪)

                    Dol caik: Lox Yif Yenb(罗玉英)

                    Dol kot: Zhud Yaob Hmaob(熊玉有)

 

IB

Lat Lat drous nil dol zhud hot Daf Mangf jangb dreud, hlangt mol drout hod Changd Ndox Zhax Ghot Uat Yenb Yangf lob naf drongx, duax zos ndeuf lob vangx zhed yos zhod daol ndex. Hod langx gangb hlout zhut duax ib ndus ncab zhod nyongl zhal, Lat Lat nzob uat cangf tlet ib shuab. Nil zeuf dak yaos dled jend suf muax juab gangd, dangb shik zhod yaos dol wangx hod cuat zhangd zhax cot, duab nens haik zos zhod dob uat nchait ntrut, dled bof zhod lal yaos nchait hend let.

Daf Mangf denb nghel lol, muab Lat Lat buas drout hod sob ndas, caik sib del ncib ncib uat shab hmaod laos plut nil lob jangx dlangb tab baob nzhes, muab lob ghangb zhais fux zid ncab kuad cuaf nil lob zid nzhus shib shib. Lat Lat zaox Daf Mangf ndout xongt, nil boub dout, dol zhud muax nzhik zangx muas, zhit yaos touk dus dob zeux buas nil nux nil muax shab dreud. Zhos muax aob khaod, Daf Mangf let zeux uat deuf khaod muax shab dob laos hnyangd suk let nat: Ib yaos nil uat dad lob ndrangt nof did ndouk hnyangd, Daf Mangf zeux plut tab nux nil khuak ncak; Aob yaos touk nil yuad mol dous uat  lob ndrangt zouk nchait zeud hend, Daf Mangf zeux shid lob ghoud nat lol khat nil jax duas shik njaif. Aob beb hnob nat, nil zhit dout dous deuf dlangb zhit bloub ndos raik hnyangd, chef deuf khaod dol zhud khuak ncak nil, uat let zhos chuad ib khaod, ib blas zeuf yuad jat nil mol dous uat lob ndrangt nof zouk nchait!

Lat Lat nyax zhit zhuf chent hlaot ib huaf. Nil yaos dol dled jenk sif shab ngas, dol zhud muab nil jaox mol zos ndeuf vangx zhed zhod nyaob daof ndex, plut tab nux nil dreuk let jax duas shik njaif, nil ib blas zeuf caik deuf, dol zhud yuad jat nil qeuk mol hod zhod langd ndros zhod shik nzhual.

Dangf zhenb, Daf Mangf xangb deuf ib dol ndid del, nyaob ndeuf nil khaod muas jot jot, zaik dreud muab ndid del deut mol drout ndeuf lob vangx zhod zhut ncab. Nat yaos nenb khuab dled jend suf uat nax shid let zhud yif deut gangb muas, khat minx dlex jend suf boub dout yuad mol ndeuf dus tab uat dlangb zhit.

Dof! Ox, zhit yaos hot gaox mol dof zhod, yaos hot gaox sangd zhud yif mol jeuf dol zhod gus deuf bloub ndos. Aix, god uat jangl dob sangd zhit deuf uat jangl let jat gaox boub rongt god lob shab sangd. Daf Mangf aob gangb bloub muas nzhux uat jaok ruad, muab del shid rol nbuax yol lob loux hout, uat plot bual nyangl dak: Nenb dob uat zhit dout let nof,  yuad jat ib dol dled mol uat dad, zhit boub yaos dol ghet ghoux dus sangd deuf let pef zhud yif. Lat Lat, nongs rongt lak, dol zhod hod lob nbet hot uat Langx Langx nil hod shab dout ib zhangd maob zeud zangd lox, gaox yuad sangd zhud yif jat nil rongt sheud lol. Dof, dof zeuf yaos jeuf nil, gaox nongs boub leuf zhit dout?

Lat Lat zeuf dak zhangt dreud nzhex nongs, aob lob khaod muas nzhat nzhongd Daf Mangf lob plot zeud zangd, dangb shik hax shik boub zhit cuat dol zhud sangd dlangb zhit. Duab nens ndax deb ncod hend, dled lob hlub hout dis zhit lol. Daf Mangf hod njoux shend deuf ib rangx yangl shuab, Lat Lat nongs dout let zhos muax ib lob muas ndeud, ndeuf jeuf yaos Dof. Uat nax xunf linf, dol zhud zeux muab ib ndrut youf shix lak shik ib lob qeux deud baod dleb dleb mol drout hod dex got ndraox, ghut deuf lob shuab “Dof, nil zeuf suk dol sob yangt drangs ndul mol muab youf shix lal shik qeux deud gud lol drout hod dol zhud caik del. Nil sangd, huaf nat dol zhud hod njoux haik deuf lob shuab “Dof, nchait yaos guas nil mol hod zhod langd gud ib yangf dlangb zhit. Touk deuf muax nchait jend, duab nens deut dled mol gud cuat yangf, dex nat yaos uat nax kend bof let. Nil dous uat dluat lob ndrangt nof Dof ndout ral. Muax ib ras muax lob zhed gob nyab, Daf Mangf ghut leul ib shuab: Dof! Nil tlat mol hod hluad deul muab dol nyuas maol ghuax leul drous kuab drout hod zhed gud deuf lol; Muax ib ras dreuk ib dol nenb pef duat nenb, nenb pef muab yangf juab yenx duat nenb laif drout ndeuf ndos ged lob khaod qid, Daf Mangf ghut deuf lot Dof hod khaod nat lol, Lat Lat zhit nchait zhut leul tlat pleud hod khaod qid, gud dreud drangb dras muax nchangd lol drout ndeuf dol zhud ib pangb; Zhenf muax ib ras, nyaob shout gongb gongf cheb seub deuf nenb zhuak bual zhaot let ib lob dinf shix zhuaf dangf, Daf Mangf sob deut deut lob dinf shix zhuaf dangf ndraod uat dib dab dib dab, daof ghangb muab zangd mol drout daof qeut kongb los dleb, ghut hlaot ib shuab dak: Dof! Nil jat let tlat hlaot mol, gud ngouk lob zhuaf dangf touk dus dob zeux muab nil zhuaf uat hmongd, yangt nzas mol drout daof deb kongf, zhaot pluad lob zhuaf  dangf zhas draod longt draod ghangb, zouk nchait das, drangs mol gouf ndout druaf dleb, lob zhuaf dangf zeuf deus lak, jaod bangt nzheux uat nil ndouk leuf aob lob lix gob zhuangb

Nil zhit nyaf mol hod zhod langd dof cuat yangf, yaos dak jat nil said, nil yenf mol hod hluad deul nghangt mid nyuas, lal shik yenf mol hod khaod qid zhut keuk buad pinx bual jait. Dangb shik, nil yaos dled jend suf, nil zhit muax ndas dos said.

Dob jend suff Daf Mangf kheb dout lob drongx hlout hnyangd ghenl, ghut hlaot ib shuab “qeuk.

Nil yaos dled jend suf, dled jend suf senb zeuf nongs hot, zhit haik drongb dras nzhet lal shik hluad deul ndaid, dol zhud haik qeuk , nil lal zeux qeuk uat zhit nchait dlangb zhit.

 

AOB

Box zhod Langx Langx zhit yaos ib dos zhod dlaos dlis, nil yaos Changd Ndox Zhax Cot Uat Yenb Yangf dol zhax ndaot nbet, yaos zhod Mongf Jat Lat muax nghet hend, jed shab ros lox, dlaif deud zaix ndrous jit nblangl juas gob, shout plot ndrangx muax dend dleub, fux zid nzhaik zhat suk nyax, hlob muax ib ngeuf khaod muas sad lal zheus bof, sad suk bangl dlex daox shab, dol dut zhod nblas lenl suk let muab ndoub nbuas ndot deuf lol. Langx Langx zhit dangb yaos rangf ruas rongt ngoux, uat yenb yangf lal hend dluat luf dol, haik nyaos dak shout jed muax yangf deut del zeud. Suk let touk qeuk goux hluad deul, dex zhod dlaos dlis did taid nyaos dout khaod nchait hluad deul, hlangt tlout hod goux hlout hluad deul mol zeuf yaos rongt hend lak. Langx Langx uat nyaos dout hlangt aob lob goux hlout hluad deul, nil sob jeuk pleud shib shib, hlangt lob goux hlout jis deul ndaid vol hod ghangb mol, nyaob touk yuad bongb bes deb, nil ib blas sheud hlaot tlat muax 3 mik shab, lob jed nyaob shout ndox uat dangl ib ndrangb goux, Shuax nat duax lob goux shout daox qeuk hlaot draod lol.

Lob deut del qeuk aob lob goux shik zuak uat get, jok jad rongt ngoux, ib ros uat dad.

Langx Langx lob nenx muax nbet laos, nil yos drout Zhongb Gox lob deb qeut gud luas Bat Jit Sit Tangk, touk bod ib xongt uat ib dol dob kaid duax hod Changd Ndox Zhax Cot Uat Yenb Yangf, yaos Zhongb Gox tab Bat Jit Sit Tangk dol ghoud khat  uat gud luas.

Ib lob hlit daof ndex, Langx Langx muax 5 xongt dout uat lenx naf. Langx Langx ib blangb yos dout aob dol mid nyuas zhod, khaod bongb shab yaos, muax ib dol nyuas zhod zeud hend, yos lol zeuf zhit muax khaod njoux, tlout leuf aob hnob drous chaib duas leuf. Dangb shik dol nyuas zhod it uat jok jeud, ib jed bloub dlangb rab, suk let dred bangx gax ab deus nyaob jex lob hnob chab kod, aob lob khaod muas jit nchab ghak shit, suk let aob lob reb baod sad. Dex nenb muab nil dik nbet hot uat Qent Qent. Langx Langx teux ras uat naf, ntuad deuf ged hlob shod shaot, uat nax yaif nux dol nyuas muax shab ghak laos.

Dol dus dob sangd zhit zos, Langx Langx ged rongt shab uat jangl lod uat luax. Hnob gat sheud nzod, Langx Langx zhenf yuad but ndangd lenl nghel lol bob Qent Qent naox mis, muax ib dol dlaid dlangx yangt bleul qeuk lol hod zhod langd, nyaob shout Qent Qent doub hout yangt uat Vis vis vongs vongs. Langx Langx yuad zhof yaos ceux shab dlaid dlangx lol bled dol mid nyuas, zeuf sheud lol val del leud dol dlaid dlangx nzob shab. Zhit boub uat jangl uat, dol dlaid dlangx hax shik nyaob shout Qent Qent doub hout jangf dreud yangt mol yangt lol. Langx Langx ras ras dob ndouk zhit drous, qif uat nil chuab fux zid nzend muas lenl, jat let duaf laos aob caik deut daof ghangb, lob jed xangb yas, muab aob caik del daof ndex lol nbleuf dol dlaid dlangx nzob shab. Touk nat, dol mid nyuas zhod khaod muas zhenf zhit dout kheb, nchait yaos chaib blangb ghox ghongf, hnat drous Langx Langx dol bangt ncab mis zhut ghangb, zangd uat ghes ros ghenl, nbuab dreud Langx Langx daof ghangb ngangs. Langx Langx drout shab nchik ndouk dol dlaid dlangx, dol naf dlaid dlangx dangd nzid lox tab dol blet nded, nchait yaos caob zuf rel zhod nbout deul, zeuf nyaob ndeuf Langx Langx khaod nzhex njis mol njis lol. Langx Langx yaos dol zhod uat zid ncak, uat jangl nyax doul jat nil rel, nyongx ghenl ib shuab tlat pleud sheud lol, aob caik del daof ndex nbuax del lal ndouk dlaid dlangx. Dlaid dlangx nzuax dik dreud jok jad zhid hod zhod sib del leuf. Langx Langx tlat uat jed ndres ndrenl, touk bongb ghel lol, aob caik deut daof ghangb sob bongb bes deb, nyaob drout touk nat, dol nyuas zhod zhit boub dlangb zhit ngangs zos Langx Langx jex ghangb, zhit zeud zhit ghaix, caik deut lous daof ghangb jat let zhox drout shout Qent Qent jangx dlangb, zhos hnaod ghuax uat “it ax ib shuab mid mid, Langx Langx duab blas suk let zhox drous hluad deul ngouf hlaot sib deut, dangb shik dob lis leuf, Qent Qent loux hout ndlul nchangd laos, hnyangt ghenl chent leuf ib blas, zeuf jat let njaif leuf lob ndax deb nat.

Zhod Mongf Jat Lat hlob dad hnyangd muax 500 ndout gid, mid nyuas zhod khaid nyik yos dout jid hnob muas juas let ib dol chuk Bot Sit, jed hnyangd muax 500 ndout gid nak drout shout nyuas zhod jangx dlangb, nyuas zhod uat jangl haik dob zhid zhit dlif zox ged duas.

Langx Langx kheb houd muab nblais yaif Qent Qent zhit dot, yaif leuf jid lob xaod shix, jat shab muab mid nyuas zox shad cangd hod dlangb duas caik del draod lol, dangb shik nblais zhod zhit muax lob ros jeuf duas draod jax,uat zhit dout let jangl, jat zhit dout Qent Qent droud ghangb kheb khaod muas. Daof ghangb, Langx Langx denb rouf drout ndeuf nyuas zhod dol ghoud ib pangb, ghuax uat maob shab laos, suk let yuad muab dol nzhox blis gus yangt mol luf lob ndax deb hot draod lol, lob shuab ghuax uat drout nenb maob shab ndraod leuf ib hmaot zhit dot...

Dangs gil daof ghangb sheud nzod, nenb yos zhax jenb dreud shaib bof, Langx Langx caik sib deut lous daof ghangb, zeuf yaos caik got deut gus zhox Qent Qent jangx dlangb, suk let drous maob hnyangd hend, nkouk jenl dlait dreud, uat jangl dob zhaot zhit dout drout hod bes deb leuf. Nil nzhangx uat maob shab laos, zhos shid nyaos dout beb caik got deut mol ged, nqaik del nqaik deut, ghous mol ghous lol, zat uat ib dol zhod muax maob.

Qid teux, dex duab nens sangd dak yaos nil maob shab tlout let rongt let nat, dreuk jaix nyongs nded duax, caik deut lous daof ghangb gus dlait njod zeux draod rongt suk ghob. Nenb yos zhax shid leuf nyox dlangl zhod ros, muab Langx Langx zangd hod zhed yos nyuas mol drout lob vangx zhed gus caob zuf keuk drout zhod ntuad zox jit, jat shab muab lob zhud yif hlod qeut nyaob tab ghuak njaif nyuas zhod dol ghoud, jat Langx Langx zhid dlif hod ged qif shab nyuas duas deuf lol. Dangb shik sangd zhit zos let yaos, tlout leuf jid hnob, Langx Langx caik deut lous lal sex dlait dreud drout hod ghangb blangb, nyax ghenl muab beb caik deut mol ged, shaib zhit bof khaod rongt sheud lol.

 

BEB

Lat Lat hlangt mol hod zhod langd, nil let bof, dol zhod but dreud ndeuf dlaif reb Taif Fux gus nyaob hod vangx zhed ndruab ndrangb, zeuf yaos dol Langx Langx gus ndros nil uat get ntuad dluat dluab muas!

Lat Lat hlot leul ib bangt nded nded, lob shab jend ndrenl let zhaot songb nghel lol.

Ndeuf yaos lob bloub caik xongt daof ndex, send qeut dluab muas geut ibdluab muas hot 《Hmongb Drongb Dob Hluak》, hod muax ib ndot uat let nat, zhud nenb jaox dreud dled mol hod drongb ntrad baod, nzhib drous dol zhod nggof  zaix ndrous, dol dled leud nghaix ndros dol zhod nggof nzhus uat nyox duas kaik nzhongs, drongl jat dol zhud nenb zhid dlif leuf. Lat Lat uat dol dled leud nghaix nggof, Langx Langx uat dol zhod nggof. Nil mex ndros pub nenb geut dluab nyaob shout Hmongb drongb dluat leuf 18 hnob. Touk khaid nyik kheb houd, Lat Lat muax nzhik nchait ntrut Langx Langx, zhit gangd zangd dit Langx Langx, Langx Langx ib druat lot, nil dob zeux shab tlat bil bongl, Langx Langx zhangt hout dous duax ndeuf nil, nil zeuf zeux nchait uat bloub dled sob vaos uat zhit doul bangt. Dangb shik uat get dout ib ndot jaix, Lat Lat mangx mangf boub dout, Langx Langx zeuf dak shaib lol nggof hend, khaod das lob shab muas laos, zhit dout ntuad dluat khaod nggof zouk nchait. Muax ib ras, geut ib ndot dluab suk let nat: Dol zhod nggof tlat shab shab hod got zhuas deuf lol, nyas dof dol hluak Hmongb zhenf bout hout keub baod, zeuf yaob touk lob jaix yuad jend nat, dled leud nghaix duax daof ghangb tlat deuf lol dof druax zhod dol dut. Nyaob jex nenb deut khat cueb mol cueb lol, Lat Lat uat dangd nzid lox muab zhod dut nbuad drout hod khaod njoux, zhit gangd nzaot hlaot, nchait muab zhod dof maob leuf, zhod nzend plot zhit renf dled, jat nil naox zhit dangl khud dreud mol. Daof ghangb geut lak gouf ndout ral dol nenb deut khat dob zhit zouk shab, nenb deut khat uat plot bual nyangl ghut leul  drout Daf Mangf nyaob ib pangb dak: Khaod nat uat jangl yaos dof zhod dut ak? Zeuf yaos nbuad jux dlouk mak! Shaib lol juad tlout hend leuf, ib shaib zeuf boub dout yaos uat shit. Zhit dout, yuad draod geut dluat. Taod khat gaox dol dled, yuad tlat deuf dled leud nghaix dol ghoud, nzaot deuf dled leud nghaix khaod ros nchait. Druat njoux lox dof, dof uat nggof laos, jat dluab ntuad deuf khaod shab chent! Uat nat, Daf Mangf zuak dreud ghut deuf Dof! Dof! Dof! drout nil. Nil hax shik muax nzhik shab nchait, touk nat, lob bloub ndos nil sangd zhit zos deuf lak, Langx Langx duax drout ndeuf nil houd ndex, ib dis jed, muab dol dut fad drout daof nil ndex, dol dut zhod dlangx dlob shik xeut rongt suk dol nangb zaix, val laos jot lenl, zhod plot hax dis draod lol cangf hlaot ib shuab shaib raos drout nil dol dut. Shab ngal ib haik zeuf boub, nil geuf boub Langx Langx deut del lob nzhab leuf, yaos yuad nil zhaot shab laos druat njoux nzaot suk khaod das, zeuf dak dof maob leuf lal zhit zeux guaf nil. Nil drous khuak ceub, ghuax leul ib shuab tlat sheud lol, suk dol dled vuf puab mol drout shout Langx Langx baob dut, nzaot ngouk zhod dut. Dangb rangx zhit yaos dof das, dangb shik  sangd dout rongt let khaod das, zhas bout zhit rongt uat jangl uat khaod dlangs, ib gous nghel mol, nil lob khaod nzhex hnaod dout das, shuab goul hnad qaob uat deud nghaix ndraod shib shib. Langx Langx drous ndas bongb shout ndox nghel lol, nznend aob nzent drout bes deb ntuad deuf dol ghoud langx shaib, ghuax uat shuab nzhangx leul. Nenb deut khat rongt shab  uat bad del bad deut, zuak dreud ghut rongt. Lat Lat hnaod  hod nil khaod njoux lot muax houd ndout bloub zhod, ndeuf goul hnad hax shangx drous zhod nchangd ghangb nzhed ghangb nzhed zhad. Nil nchait raos ib rangx, muab dlangs uat das dof dout hnyangd hend leuf, zhod buak zeux drous rel nbout deul? Nil ceux shab yaos ndout leuf, dluab geut dangl, Langx Langx zhit dout uat dlangb zhit del deut ncod, zhos muab khaod muas langx muas drout nil ib blas, zeuf denb rouf drout shout bes deb muab nblais yaif dol dot gus drous dof shangb.

Let nat dangl, Lat Lat laif zhes khaod nchait Langx Langx, aob dol uat leuf rongt gud luas nyaob uat get. Hod pub geut dluab ib huaf zhos muax Lat Lat tab Langx Langx aob dol zhax bad deut del, zeuf dak ib dol yaos nbaox dled ib dol yaos nbaox chuk, dangb shik zhax cot tab zhax cot rongt let yongx yif shik boub dluat, nil mex uat nax nyaob uat get uat shit, dex ral nyaob shout dlaif deb ndraox dlangt luaf, lal shik dous nyaob touk sheud nzod dous ged hod got rongd, tlout leuf ndot jaix langx hnaod ghangb.

Nggongx! Nggongx nggongx! Lat Lat uat druaf shib shib, tlat mol zos ndeuf ghuak Langx Langx muax 5 mik dleb, shid ros jot dut, uat deuf shuab ghuax ngongd laos. Nat yaos dled dol ghoud uat nax nos mongt rongt, suk let haik dak:“Ghob gud luas, bof gaox rongt shab hend, gaox buak zhenf nyaob rongt?

Lat Lat shaib bof, Langx Langx nzit muas blid ib blas lob khaod muas kunx duax leuf, lob khaod muas zhouk nchit jat let jit los duax, lob nzhex beb jes gouf chent ghak nyaot, ndrel uat ghaix lais chent nyaot sheud lol, muab lob shuab ceuk ghangt ghuax ib shuab muas laos drout Lat Lat. Shaib deuf, Langx Langx renf deuf nil leuf, zhenf dreuk let zhod dol ghoud haik lol shik nzib drout nil.

Lat Lat nil nat let bof, caik xongt zhit nzhib, Langx Langx zeud uat chuad nzhik renf zhit deuf lol. Touk ndex lob jed muax ros bod bod, nil nat nzous kongf chuad baob cangt; Touk ndex ngeuf khaod muas jok jad nzhuab sab, nil nat ndrot nblit zhouk nchik, gouf muas blongx lil; Touk ndex dlaif deud zhod zaix ndrous jit nblangl, nil nat zhouk nchik zhit muax dlangb zhit sef leuf, zhit muax touk ndex khaod rongt rangf ruas. Dind jat Lat Lat jenb zeud let yaos, Langx Langx caik deut lous dlait dreuk ndeuf nghangt blangb, suk let deuf muax bloub ndos hnyangd, zhos shid dout beb caik deut sheud ndrel leuf.

Langx Langx muab beb caik deut mol leuf aob druaf hnyangd ghenl, zhas draod ghangb but uat bongb shab ntangd nghel lol, ghet dreud khaod muas ngenl ngenl.

Lat Lat zhit boub Langx Langx deuf muax dlangb zhit bloub ndos, dangb shik nil boub, Langx Langx yuad zhof yaos nzhib drous bloub ndos lox leuf, let zeux nzous kongf ndous ros bongb blis jaol uat let nat. Nil hod shab langx nyaob hend, zhos jat shab gad rens uat dad dol zhud dex dlex nof guas uat, mol gud ib yangf cuat yangf Daf Mangf duax shab, jat let ndeul ndas njaif leuf lob khaod qeut nat.

 

BLOUB

Langx Langx caik deut lous daof ghangb dlait njod , Changd Ndox Zhax Cot Uat Yenb Yangf dol Yenk tuangx zhangd lob shab lak ndros dlait dreud tab. Langx Langx yaos Zhax Cot Uat Yenb Yangf dol zhax cot ndaot nbet, khat dout ib dol zhax cot ntuad zox lak yaos zhit rongx yif hend, jat dol zhax cot ndaot nbet yif huab langx, dangb rangx jat zhit dout shaib nzhongd Langx Langx zat uat ib dol zhod shef jed draod zhit dout shout tax ntuad zox.

Sob teux, duaf cix sangd dak Langx Langx caik deut lous daof ghangb nchait yaos dout maob ghoud zeud, lal shik  cangt jes lod leuf, lal shik nghaix dluat ndluas leuf, lal shik yangl cangt tlangk leuf, lal shik nzhux drous,zeuf mol ndlad dout ib dol guk kot maob zhax cot muax nbet duax, shid sob deus longs  muab Langx Langx duat ghous, sangt mol zhed kot maob chuax shaib, geut let geuf dluab, uat let uat B chaot, zhenf muab X guangb zhaof shaib, daof ghangb jat nenb sangd zhit zos, Langx Langx caik deut lous daof ghangb zhit muax dlangb zhit maob, haik nyaos dout dak ib huaf rongt laos. Nyaob touk Langx Langx longs jat, guk kot maob zhax cot nyif dreud nil caik deut lous daof ghangb shif mol shif lol, yangs cangt nkouk dout rongt laos, nghaix bod kaod kaot, ndros beb caik deut it zhit muax dlangb zhik zeud zangd. Dangb shik longs dangl hlaot, Langx Langx sheud uat zhouk nchik, sob sob yaos bloub caik deut sheud nzhos, tlout leuf aob beb fenb zhongb, caik deut lous daof ghangb draod dlait sheud lol leuf...

Nil lob jed zhit muax maob, guk kot maob zhax cot haik njangx ndraik, Nil yaos maob lob shab. Nil caik deut lous daof ghangb zhox duas mid zhod, maob nil shab hend, uat drout nil  ndual nil dob hend, nzob yol caik jes deuf bloub, zhif deuf maob shab hnyangd hend, zhit gangd draod muab caik deut zhox nghel mol hlaot. Haik dout yongx yif ib nzhik, suk let lob hlub hout dout maob, lal shik dout maob shab ndlaik.

Uat let buak kot nyaos rongt? Yenk tuangx zhangd uat shab jend haik nos.

Maob shab yuad muab chuax shab kot. God …… god xof let yaos zox kot maob zhax cot, zhit dout xof dluat zox kot shab, duef zhit zhuf das. Dol guk kot maob zhax cot haik uat bongb shab laos.

Shout shef huef muax houd ndout zhed kot maob shab, haik dak jaod dob nof dob yaos dex dob zeux geuf dad ndox ndrout daod lol. Dangb shik jat let gud ib dol zhod mol guk kot shab shaib, nchait guk kot shab dob zeux drous hef bongb blis hunb duas leuf.

Langx Langx yaos Changd Ndox Zhax Cot Uat Yenb Yangf dol ndongt rens zax, dangb rangx zhit sangd jat nil ghous nghel mol. Khaod hnyangd tlout yaos, zos lob hlit daof ghangb Changd Ndox Zhax Cot Uat Yenb Yangf zeuf yuad mol ndox ndrout Bat Jit Sit Tangk ntuad zox jit, Langx Langx yaos touk bod ib xongt Bat Jit Sit Tangk sangt drout Zhongb Gox uat dol ghoud gus aob lob gox juab duaf gud luas, bloub xongt daof ghangb droud ghob deb qeut ntuad zox jit, nox nghet lox hend, Bat Jit Sit Tangk ndout lob qeut zheb mongt nzod dob muab lob bloub nat haik cuat ntraot, Langx Langx dlaif rongt dluab luaf deuf cuat yangf ndeud sod mongt, haik khaod zhit muax lol yangt, Langx Langx dob dout uat Bat Jit Sit Tangk "dol nenb" sod mongt gus yif dus dob boub leuf, Bat Jit Sit Tangk dex nenb zhenf zhangt hout daol nzhongd Langx Langx njaif leuf bloub xongt draod lol ghob deb qeut ntuad zox jit rongt shaib nix. Yaos dak Langx Langx dreuk zhit dout jaix uat dol dob zib duaf qaox mol njis Bat Jit Sit Tangk, zhit yuad haik uat nad zeux jat Changd Ndox Zhax Cot Uat Yenb Yangf lob nbet bongb bual dangl, nyaob shout ged mol lol ndox ndrout lal zeux bongb leuf lob nox nghet lox hnyangd nzid zhit dout.

Zhit haik uat jangl, shid leuf cuat yangf dangl ntraot, lal yuad jat Langx Langx draod rongt suk let ghob!

Muax nenb chux zhud yif dak, ged hlob yaos dol rongt chuax kot maob shab, ntrad ib dol zid zhod lol ndros uat zix ngeuf, ged hlob ghangb shab nchait jat nyaos dout Langx Langx hnaod ghangb khaod maob shab nil nblangf leuf dol nyuas. Uat nat, Zhax Cot Uat Yenb Yangf shid leuf ib del naf zax mol Yenx Tongb Shangb vangx zhax cot drout dout ib dol zid zhod rongt ndrous lot nbet hot Shangt Shangt muax xangt xongt, dik zix dik ngeuf, sangt mol hod Langx Langx lob zhed ngoux nyangb. Daof ghangb rongt shab zhit dout rongt boux, Langx Langx ib bof Shangt Shangt zeuf nbout deul nyongx ghenl, Shangt Shangt uat plot duab dreud khaid nyik mol zos Langx Langx ib pangb, Langx Langx druat hlaot khaod njoux yuad dof, zhit yaos yenb njuab zhit shik nzhib, shik nzhib yif huab yaos naf yenb njuab, yaos dak zhenf uat dreuk shab sangd, nax ndrenl Langx Langx tab Shangt Shangt uat zix ngeuf, yuad zhof zeux npout deuf ib ras zhod draos gaox duas god jax. Zhit doul del, Zhax Cot Uat Yenb Yangf zhos rongt nyax ndrenl muab Shangt Shangt chef deuf khaod daol zaik uat zix ngeuf.

Draod muax nenb chuf zhud yif dak, dlangb zhik youf shix kheb dlangb zhik nzhol, Langx Langx yaos wef nyuas zhod duas leuf let deuf muax dol ghoud suk let nat, yaos dak ntrad nyaos dout ib dol nyuas zhod zhenf naox mil, did dol Qent Qent duas leuf, jat Langx Langx zox ged uat naf muax khaod dis zangd, lob shab maob zeuf zeux draod dout rongt. Uat nat, Zhax Cot Uat Yenb Yangf nyaob ndrout send ib lob Zhax Cot Uat Yenb Yangf ghed ib dol nyuas zhod lox muax aob lob hlit, rouf dlangd hlout yangt lol. Wef fangx deuf bloub ndos zeud, muab nyuas zhod ndruab drout hod ib lob mid nguax hlout, sangt zos Langx Langx ib pangb, shif shaib Langx Langx zeux uat jangl. Jat nenb bongb shab let yaos, Langx Langx nyongx ghenl nzhat shaib lob mid nguax hlout, zhenf muab goul hnadkax cax kax caxgeuk nguax hlout, hef uat nyuas zhod nchait uat ib jet chent dangl. Yaos zhit muax mid nguax hlout buad taid, nyuas zhod zox mid shad yuad zeux dangl leuf. Zhit doul del, zhos rongt zhaot zhes lob zhud yif jeuf jend nat.

Zhax Cut Uat Yenb Yangf muax ib zox ged jaid yuad dout zaox dous, ndeuf zeuf yaos zhit duat shad. Hlod lot lol haik, hod Zhax Cot Uat Yenb Yangf jaod zhax cot gus naox nghaix, zhos bob nghaix congd, zud zhit laif bob zhax jax. Guk zhax cot dous ntrad khat dout: Hod Zhax Cot Uat Yenb Yangf dex zhax nggof naox nghaix ib jat nil dof drous zhax jax, zeuf zeux rel deuf nil lob shab ghok nak jat, zeuf langx des nongs khuab nongs khat, uat zhit rongt zhenf zeux npout deuf dex bloub ndos haf drous nenb khuab zhax. Dangb shik wef lak jeuf nyaos dout Langx Langx, Yenk tuangx zhangd dof hnad ghenl, haik guas muab ib dol box ghaib draos baod mol hod zhod langd, zhenf zud zhit laif nghaix bob leuf. Yenk tuangx zhangd lob shab sangd yaos, Langx Langx chaib blangb leuf, yuad zhof zeux lol ghob njous drout dol box ghaib, beb caik deut yaos ndel zhit dout box ghaib let, wef lak naox nyaos dout dol box ghaib draos, zhos muax muab caik deut lous daof ghangb dlait dreud zhaot nghel lol tlat ndel. Sangd zhit zos let yaos lob zhud yif nat ib yangf zhit muax luf, chaib dout aob hnob, Langx Langx hax shik zhit dout muab bloub caik deut zhaot nghel lol dof dol box ghaib nyaob ndeuf yol sob ndas. Jat nenb langx des ghuax luas let yaos, dol box ghaib gus drous muab uat khoud naox, zhenf nyaob ndeuf got zhuas ghuak Langx Langx 5 mik dleb ndes dout ib lob ghet!

Dex zhud yif shid nyaos dob shid dluat leuf, dex deut del shid nyaos dob shid cuat leuf, Langx Langx hax shik yaos dol zhod jes deud.

 

ZHIb

Lat Lat nyaob hod zhod langd mangf tlat leuf ib njis , vangx zhed chaob dob muax lob changd langx qeux lox, yaos dangb wef yos zhod uat let, muax ib lob drongb baob reb shab muax aob mik, jat zhod rongt tlat njet, muax ib zhaob ndongt Mink Guef nblongx hlangd duab duab, jat zhod dout ngouf nzongt, muax ib lob dlangb reb nded 2 mik ndout, zhaot khoud tab dlex houk, ndeuf sob cangx taid shab muax mik ndout, zhenf muax ib lob daos ndongt nded, jat zhod dout hod drout. Lat Lat zangd zhit nyaos drongb reb, zangd zhit nyaos ndongt Mink Guef, lal nghangt zhit doul naf dlangb reb hnyangd cab gid, hod jaod cuat yangf nat, nil nghangt nyaos dout let zeuf yaos lob daos ndongt. Nil gud dreud lob daos ndongt gus drous zhod drout zhuab lux zhuab laf, ghes ros hait ghenl mol drout ndeuf lob drongx hlout. Dangb shik khaid nyik hait leuf 2 mik dleb, dol Daf Mangf sheud ndrout drongx hlout zeuf ghut leul:

Zhit yaos! Zhit yaos!

Ib blas dled jend suf dob boubzhit yaos lob nzhab lol leuf, zeuf gangd rens ndrel hlaot dex drox druaf zhenf uat.

Lat Lat zeuf zhaot hlaot lob daos, dunb rouf drout bes deb, zhangt dreud aob lob khaod nzhex, nbangx zaik dol zhud luf lob shuab deut khat. Dof! Dof! Daf Mangf deut dreud Langx Langx juab shuab ghut. Lat Lat zhit boub yuad uat jangl uat, hod zhod langd zhit muax dex yangf nil gud dout leuf ax! Dof! Dof! Daf Mangf sex ghut, zhenf xof dreud zhax cot dol ghoud dous ged, bloub caik del deut cenf bes deb, zhas muab caik deut lous daof ghangb dlait sheud lol, val dreud rel guas Lat Lat shaib bof.

Lat Lat ndrox muas lenl, dol zhud yuad jat nil mol gud Langx Langx caik deut lous daof ghangb gus dlait val! Shout zhod doub hout nbuax yongd, nenb dex lol bangx nat, yaos haik dex deut del zhit boub shab nghel. Mol gud nzaot zhod deut, langx ndout dluat nyaob shout zhod doub hout nbuax yongd, khaod nat buak uat nyaob dout? Nil mok ghok hend, zhit boub yuad uat jangl let rongt.

Nchait dol zhud dangf zhenb shed nyaos jat nil mol uat nboux nbaif nbuax hluad deul?

Sangt, Sangt, ox; Sangt, Sangt, ox Daf Mangf hod khaod njoux haik deuf ib nghait shuab lol zeud hend.

Zeuf suk hod zhot shod yus hlaot ib pab dlex zal, Lat Lat lob hlub hout mok ghok jat let send hlaot. Sangt Sangt lob nbet boub nat, jat nil sangd ib ndot bloub langx hnaod ghangb.

Sangt Sangt yaos pub jend suf xenx jenk dol dled muax aob xongt, ghoud shab duf nggof, uat nax muax nzhik uat zid ncak, got dud touk dus dob zhangt nchak. Muax ib ras jout ib dol nenb muas dux, zhit boub yaos drous juat khaod nzhus zhit hnaod said hax shik yaos uat jangl, jat dol nenb muas dux nblas del zhid jex nil khaod muas mol leuf. Sangt Sangt dol nenb deut  jaox Xaod Jenb wef ndel zhit dout nenb muas dux drous Yaox jenk guangb ntet ndual, zeuf jat let dis lol nbout deul nab drout Sangt Sangt, dangb dreud gouf ndout dol dled jend suf sob ndas, deut dreud Sangt Sangt jangx nzhus ntet paik dak:“Gaox dol druas baob zhit dout ros nat, zhenf muax plot zhangt got dud, god dob gaox zangx muas; Gaox muab nenb muas dux zhaot zhid leuf, dob zhit juas let dled rex raol, zeuf yaos ib lob tongb ndif maod, zhenf muax dlangb zhik zhif nyaos muax plot let! dob jend suf Xaod Jenb yif haik yif qif, fad hlaot hluat deud nbleuf aob nbleus drout shout Sangt Sangt dol got dut zhangt dreud. Juas let mid nongs lod dik nangb plik deud lus rangx lod dluad, Sangt Sangt dol dut gus zhangt nchak bongb ntangd nghel lol. Sangd zhit zos let yaos, zix nat dluat leuf, Sangt Sangt dol dut zhit zeux draod zhangt leuf, lal zhit uat zid ncak leuf.

Dled jend suf uat zid ncak, zat uat ib dol dled rod zhed jeuk dut.

Guk kot maob zhax cot shaib dangl, Sangt Sangt dol dut zhit dout zeud lal shik lod, nil yaos ib khaod zhit muax plot bof nenb, yaos zox ged maob shab hnyangd tlout, uat drout nil dol dut zat uat koub hluat nangb duas.

Yif huab zal shab let yaos, Sangt Sangt uat ib dol bongb shab nchuak, deuf mol uat nof, ghut shuab deut khat Dof drout nil, nil zeuf jeuk dreud loux hout ghuax uat maob shab dreud, dol ghoud rangf rongt let uat yuaf nchait drous las nbluat lil.

Dob jend suf Xaod Jenb nchouk shab hend, haik rongt lol qenf, jaox dreud Sangt Sangt mol njis dous shout kut, yol tef zax  mual rongt nghaix toud drout nil, zhenf ib ras draod ib ras  zhaot Bef Dob Fenb rangx ngoux《Yenb Xongx》drout nil nongs. Dangb shik, cuat yangf shid ros dob yaos dleub uat.

Uat nad, Daf Mangf zeuf muab Sangt Sangt jangb ngangs hod Lat Lat lob qeut, jat nil bangb Sangt Sangt kot rongt suk ghob.

Jik hnob daof ghangb ib dangd shot, Daf Mangf jaox nil tab Sangt Sangt mol zos Xib Shangb Drongb Daox Nzangt dreuk ib dol nenb duat nens. Nil nzod zeuf hnat drous dex ncab nchangd nyongl, dangb shik nil zhit dout nyongx dof khat mongt, nil yuad muab lob hmongd boub bloub ndos jat drout Sangt Sangt, nil nzhens dak khaod nat bangb dout Sangt Sangt laif zhes ged bongb shab. Touk draod ghangb mol ret, Sangt Sangt lak hnat drous nenb duat nens shout jed dol ncab nchangd nyongl zhuas blis, zeuf nggongx nggongx dof sheud lol. Daf Mangf pluk plut Sangt Sangt lob doub hout haik dak:“Rongt hend! Zeuf dongf del dleuk nil tab Sangt Sangt shout jangx dlangb lob goux hluat, ghut ib nyuas shuab:Dof! Nil tab Sangt Sangt suk aob dol sob dlif hnend, duat mol drout dif Drongb Daox Nzangt. Dol nenb bual jait gus ngouf daof ghangb pax reb nzangt zhid uat chent nyaot. Nil pux njet mol, dof ngouk nenb bual jait caik nbangb gus duad dreud drangb douk nzhet, nenb bual jait muab baob ndris shid ros ndouk nil lob doub hout, caik got deut shid ros njeuk nil lob ghangb blangb, dangb shik nil dof jend jend nenb bual jait caik nbangb dis mol dis lol, Kuangb langb ib shuab, drangb douk nzhet bongb drout bes deb, nenb bual jait yangf juab yenx bongb leuf. Nil draod drous nenb bual jait njeuk ib deut hnyangd hnyangd, jat let zhaot njoux, dunb ndeuf bes deb ghuax uat maob shab laos, suk zhit muax ros draod ghangb dof nenb bual jait nzid leuf. Nenb bual jait deut shab deut ghel zhid uat nchait ntrut shout Drongt Daox Nzangt. Khaod das, nil zhit dout drous dlangb zhik shangb, nil yaos dled jend suf zaik dluat khuab khat zeud, muax ros did ndouk kaod kaot, aob beb ndris deut uat jangl muab nil ndouk nyaos ghous? Nil ghous drout bes deb zhit sheud, yaos sangd muab hmongd ndel nenb bual jait bob drout Sangt Sangt. Rongt nbet yaos yangf rongt chuax dleuk kot khaod bongb shab. Sangt Sangt dreuk njet mol leuf, nenb bual jait hod del zhit muax dlangb zhik, khaod dus yaos dled jend suf dol did deuf. Nzhual ros aob nyuas ral, Sangt Sangt zeuf muab nenb bual jait maok ghous drout bes deb. Touk nat, Daf Mangf tab jid dol dob jend suf dreuk njet lol, muab nzhol hlout tlaok hlaot drout shout nenb bual jait caik del. Daf Mangf muab Sangt Sangt buas drout hod sob ndas, pluk plut Sangt Sangt houd blax tab jangx dlangb, zuak dreud khuak ncak dak:Rongt geus ngouk! Hex, rongt leuf! Dangb shik Lat Lat ua khaod muas ghoub shab shaib dreud Sangt Sangt, ghuax  hnyaok nchik. Drous las ghoub shab yaos lob zhud yif ceub yol draod muax shab. Dangf zhenb, nyaob jex Daf Mangf shod shab buas dreud, nyaob hod lob shuab ghoub shab, Sangt Sangt dol dut gus juaf dreud shout baob dut juas koub hluat nangb duas, zeuf suk but zhif hod ndox zal sheud lol, jok jad val sheud lol, muax plot ncak sheud lol ...

Muab haik drout dled, got dud zeuf yaos lob shab dol qix. Qix dout yenx nzuax nzas shab shab. 

Lat Lat yaos ib dol dled jend suf nzhet ngal, ib jat dol nenb zhud deut khat, nil zeuf boub dout shait hend, khaod muas daof ndex dol zhod hot uat Langx Langx nat, caik deut lous daof ghangb dlait val, ndros Sangt Sangt ib yangf, dob yaos khaod maob shab rel sheud lol let. nil let ndrangt nof, zeuf yaos bangb ceub Langx Langx draod rongt suk ghob.

Khaod nat yaos lob ndrangt nof lox hnyangd tab zeud zangd, nil yuad uat jangl uat nid?

 

DROUT

Box ntuad zox Liuk Xax sob tix deuf jat Lat Lat lol bangb Langx Langx draod rongt suk ghob. Nil haik uat ros dleul dak:Lat Lat yaos dol dled jend suf boub nenb shab, dlangb zhit sif dob langx zhit ghous nil. Mex buak zhenf njot dout, ib xongt daof ndex dol zid ncut At Wak Longx jat let drangs mol shout kut ntuad vuf, dob yaos kaof Lat Lat muax dangd nzil mol taid, zhenf uat nzhet ngal muab At Wak Longx nblil ngangs hod nguax hlout, yaos zhit let god dol At Wak Longx nzod zeuf drous nzux nyongs loul jangb mol leuf.

Dol nenb dot yos ndangt ndrangt zhaof guf box zhod Langx Langx lal dak:Jat dled jend suf Lat Lat duax bangb mangx, nat yaos lob rongt zhud yif. Caik xongt daof ndex geut rangx dluab muas《Hmongb Drongb Dob Hluak》, Lat Lat tab Langx Langx uat get ntuad zox dluat, aob dol mol lol rongt, nyaob uat get naox khoud, nyaob uat get uat shit, shik hof hend. Zhif nyaos ndlad Lat Lat duax shif shaib.

Yenk tuangx zhangd langx fangb zhud yif dangl hlaot, shab jend juas hluad deul hleud bloub muas, ndeul ndas mol pub jend suf xenx jend ntrad dout Youx jenk guangb, taod nil bangb mangx .

Gaox yaos maob hnyangd langf teux guk. Youx jenk guangb duab lot dangd jat, Jat ib dol dled jend suf mol uat zhod jel dlex nof blangb bleud, kueb gaox sangd dout deuf lol! Nongs dreud zeuf suk yaos ib rangx lol ndrual mid nyuas, gaox bangx hlub buak yaos muax maob ak? God khat gaox ib lob zhud yif baf, ntrad ib dol bangk sob jend suf, dangb ndouk dol zhod caik deut lous daof ghangb, jat nil boub dout drous dinf zuf rongt let jangl, shaib nil buak zhenf gangd muab caik jes  dlait sheud lol!

 “Nil yaos Zhax Cot Uat Yenb Yangf dol zhax ntuad zox, nil zhit yaos nenb bual jait. Yenk tuangx zhangd haik dak.

Uat let gaox ntrad yuaf khaod drongx bet yuaf naos leuf, khaod nat yaos pub jend suf xenx jenk, dangb yaos did deuf nenb bual jait let.

Yenk tuangd zhangd zhit muax zhud yif, zhos dous ged bel shuab, wef khaod bloub nat zhuangb mex shout ib rangx ndeud khat, qeut zox jit, qeut ntuad khat, zhenf fud ndrongs, cenx cenx zhaot jait. Daof ghangb dol hout ndrongs nyaob shout rangx ndeud shout dak: Dlex nof ndox ndrout, nox nghet lox hnyangd, taod pub jend suf xinx jenk shid ros bangb ceub, buad dout Changd Ndox Zhax Cot Uat Yenb Yangf mol Bat Jit Sit Tangk ntuad zox uat rongt uat dad!

Muax lol haik dak nof lox ib gheb nak duas nenb, Yaox jenk guangb hout nof ghel dluat hout ndrongs haod jid gheb, ib nzhik zhit muax nghet taod haik dlangb zhit, zhos muax nongs lol tab zaox dreud dous uat. Yaox jenk guangb haik uat nzob leul drout Yenk tuangx zhangd dak:God sangd nzheuk gaox ib khaod njoux ghuad dled das. Zhit dek nchait. God yaos dol jend sif lil ndoub ndeud, zhos yaos sangd sangd sub. God khuab khat  gaox, Lat Lat yaos dol dled jend suf muax nghet, yaos nil drous gaox dol zhod dof leuf, god ndros gaox zhit muax dangl!

Zeuf uat nat, Lat Lat drous jangb mol hod Zhax Cot Uat Yenb Yangf, duax zos ndeuf lob zhod langd muax nchait zouk ngouk.

 

XANGT

Lat Lat uat duab rongt nzhat shaib Langx Langx, shout zhod plot dob yaos ab dleut nchouk shab, hod ghangb blangb jid lob mis zhangf ndaos, ib shaib zeuf boub yaos dol naf zhax lob jaix bob mis. Hod zhod langd zhit muax nyuas zhod, zhit langx caik deuf, Langx Langx lob shab drous maob, ndros nyuas zhod muax mol lol.

Lat Lat sob sob nyongx ghenl ib shuab muas laos, daof ghangb nyaob ndeuf Langx Langx daof ndex tlat tab dlangt luaf. Caik xongt daof ndex nyaob hod pub geut dluab muas, nil ndros Langx Langx uat nax leud jout uat shit, gaox muab god ceub nzend, god muab gaox khout ndlaos, gaox dreuk lol, god leud mol, shid dangl dex jaix nyongs dout gus tab dex dlangl ros ndout dluat. Nil jeut Langx langx draod lol uat dex shit nat, yaos dak Langx Langx yenf uat shit, caik deut lous daof ghangb dlait dreud zhit yuad haik dlangb zhik zeuf yuad zhox bes deb. Bongb shab let yaos, Langx Langx but ndaos hod bes deb, khaod muas zhuas blil nzhat nzhat nil, zeuf muab plot dis mol leuf. Caik dout haik dak: God hod shab langx nyaob, khaod dus muax shab ndros gaox uat shit.

Zos jaix bob khoud leuf, dob yos zhax muab ib dlaif dangd nyox laif drout hod dlangb reb, Langx Langx muab beb caik jes hait dreud zangd mol. Lat Lat sangd hlaot, ndeul ndas pux njet mol, ib gous dof druax dangd nyox, hait drout ndeuf vangx zhed ib pangb, uat deut del muab lob jed nbos dlaif dangd nyox, nyongx ghak ghenl drout Langx Langx. Zhax naox nghaix dob boub nyaos dout dex deut del nzhab lol nat, nat yaos khuab khat luf dol: Jaod khoud naox nat yaos god let, yaos gaox sangd duax drouk del, god yuad ndros gaox shik nzhual jax duas! Nat yaos cangd naox cangd houk bof los, nil jat shab yol dex deut del quab cangd rel deuf Langx Langx nbout deul, pux lol ndros nil zenb dlaif dangd nyox, uat let nat, caik deut jes deud lal zeuf  zeux rong suk ghob leuf. Sangd zhit zos let yaos, Langx Langx ntuad zhit deuf ib khaod dlangb zhik nbout deul, bout hout ib jes ib jes mol drout ndeuf dlaif baob reb Taif Hux ghoud zeud nyaob hod vangx zhed ndruab drangb, shab guas zhous nchik but ndaos nghel lol.

Zhod njoux zenb khoud, lal zhit muax zhud yif jat Langx Langx ntoub shab muax ros sheud lol.

Shaib lol, zhos muax shid dex deut del zeud zangd mol rel Langx Langx lak, Lat Lat sangd. Deut del zeud zangd, zeuf yaos zhuab dof. Nil njet drout shout lob juad drongb gus muab reb Taif Hux lof sheud lol, dis duax daof Langx Langx ndrouk ghouf, uat deuf dol ghoud yuad tlat mol dof. Ib blas, nil hod shab ib chent, jat let sangd lox sangd langl. Ndeuf zhit yaos zhod ndeud, yaos dol zhod das ax; Lal zhit yaos ntuad zox dluab muas, yaos rel zhod das das; Langx Langx zeud dak yaos dol ntuad zox zhit dout kheb dluat njoux dof shad, dangb shik nil hax shik yaos ib dol zhod Mongf Jat Lat jed lox shab ghok, ib gous zeuf dof nyaos dot dled jangx dlangbged nchait lox hend lox hend, zhend zhit rongt zeuf zeux zat uat dol druas baob muab jed bob zhod. Nil dis doub hout mol nzhat zhud nenb, Daf Mangf zhenf dunb drout ndrout khaod drongx hlout, muab gangb muas khuak ceub nzhat nzhongd nil.

Muab haik drout dled jend suf nzhens shab muax juab gangd, zhud nenb dex gangb muas khuak ceub, zeuf yaos khaod bangb ceub zhit muax shuab lol.

Nil zhit draod sangd lox sangd langl, nzit nzit hnad, pux nghel mol, nyaob touk bloub caik deut bongb drout shout zhod ndrouk ghouf, dreuk njangx Langx Langx caik got deut lous daof ghangb dof hlaot ib gous hof shif. Duab blas, nil suk lob qeux deud ndlid hlaot mol leuf, duab blas nchik zhid longt drout ndeuf khaod drongx hlout.

Nat yaos ib yangf zhud yif zeud rongt, yaos dak Langx Langx drous rel nbout deul leuf, zhaot hlaot caik got deut lous dlait dreud, sangd zhaot hlaot bloub caik deut lol dreuk dof nil, nil zhos yuad zhid zos khaod drongx daof ndex, Daf Mangf kend dinf zeux suk nil sangd dreuk jaix pef dreud kheb lob drongx hlout, zhaot nil deuf mol, let gad rens geut hlaot khaod drongx hlout, muab ged nchait geut drout hod khaod drongx hlout jat.

Langx Langx sangd zhit zos Lat Lat zeux tlat lol shout nil ndrouk ghouf dof nzaot, nyaob hod yol senb zeuf muax, nil pleud ncak tlat sheud lol, ib blas, caik deut lous daof ghangb dlait dreud xangb yas hlaot, ndros beb caik deut it ib cix, ndrel drout bes deb druax ndrenl.

Nat yif huab khat dout, haik drout shout lob ros jed, Langx Langx caik deut lous daof ghangb ib huaf yaos rongt let .

Langx Langx ngeuf khaod muas sad nzhaik zhat dex gangb jit nbout deul, aob pangb gouf njoux dex fux zid dleub bous nbout deul chent nyaot, druat hlaot lob njoux lox dof nghaix, nzit les goul hnad suk drangb dras, nyongx ghenl uat drout nenb shab nchait ntrut. Haik khaod das, Lat Lat gous nat dof dout zhit hnyangd, zhos yaos nzaot bongb ib xod bloub zhod sub. Dangb shik Langx Langx yaos dol zhod nbet ndraod hod drongb rongd tab zhos muax nil lox, zhit boub uat jangl drous dled dof ib gous, yol lob shab drous rel qaob nguad. Zhod njaif drongb hangd drous dled qib, khaod lux shab nat zhit rongt nyax das. Langx Langx nyongx ghak ghenl, shaib nzhongd zeuf yuad traik druaf tlat sheud lol, duab blas, suk let muax ib lob ros raik dis kot nil lob jed dex deut del, caik deut lous daof ghangb draod ndrox ndrenl val laos mangx mangf dlait sheud lol, ib nzhaik muas zhas zat uat dol jes deud zhos muab nyaos beb caik deut ndrel jat leuf.

Lat Lat yaos sangd zhid deuf ndrout khaod drongx hlout let, dangb shik shaib bof Langx Langx caik got deut lous daof ghangb draod dlait sheud lol, renf muas zhit dout uat zos, ndrangt nof zhit dout uat dad, zeuf boud hlod zhud yif, tlat njis laos ndeuf vangx zhed deut cangx.

Zhod muax beb caik deut, mol ged dob ghous bel ghous ndrangl, dangb rangx zhit muax zhud yif dreuk dout dol dled jend suf nzhet ngal.

Njis dluat aob njis, Langx Langx uat bangt lox lox ndrel dreud, nyongx ghenl aob shuab drout Lat Lat, but ndaos ndeuf bes deb. Lat Lat lal dof ghenl shuab ndraod drout Langx Langx, dex bloub zhod sef gob lot dreud ndeuf goul hnad yangt laos ndruab ndos, sangd muab yangf dlis rel gus zhit nchait dlangb zhit, jat Langx Langx nbout deul tlat pleud, hnaod ghangb cuat yangf pleud ncak duax.

Dangb shik, khaod uat dout zheus tlout, Lat Lat dof uat shuab dob ceuk dangl, Langx Langx hax shik ngenl laos but ndaos drout bes deb.

Xix! Xix! Ndrout khaod drongx hlout, ndraod muax Daf Mangf lob shuab zaob shab.

Lat Lat draod njis mol Langx Langx daof ghangb, nbangx tlat mol dof ral aob.

 

YIF

Langx Langx shab ngal tab jok ndreuf, dleb dluat ndait khaod Lat Lat sangd zos.

Touk Lat Lat duax shout juad drongb pux mol drout shout Langx Langx ndrout ghouf ral aob, lob jed khaid nyik yangt zos  shout ndox, suk let Langx Langx ndrouk ghouf daof ghangb muax khaod muas, dol dut shuax nat zhangt nchak, suk let ib dol hluat jux hlout, pax nat ndouk drout shout Lat Lat jed. Lat Lat drous ndouk bongb drout hod bes deb, zeuf bongb drout ndeuf ghuak Langx Langx ib caik mik dleb, zhit daol nil sheud lol, Langx Langx muab ib caik deut daof ghangb cenf, yangd jed shout daox sheud shab hlaot, uat deuf ib dol ghoud zhod chaib huak naox, muab deuf deut del duab blas, muab nil maok ghous drout bes deb, nil sangd ndit zenf did taid, dangb shik Langx Langx aob caik del daof ndex ros lox hend, ib caik zhod sib nak dreud nil doub hout, caik zhod sib it nak dreud nil doub ghangb, nil ib nzhik dob ndit zhit dout, zaik dreud, nil hnaod nil dol cangt jangx ghub drous zhod hnad dof drous leuf, lob njoux lox muab nil ib lob jangb dlangb dob nbuad dangl leuf. Nil boub dout, nad yaos zhod dex deut del duat nghaix, drous zhod duax daof ghangb dof drous jangx dlangb, zhit haik ib dol dled, zeuf yaos dol zid nduat deb hlet goul nyangl, dol dlaik dlob draos nbeud tab dol nyox ghok ndos shab, lal zhit zeux muax khaod jax leuf, lob zhod njoux muax ros shid ros ib reuf, zeuf zeux muab zhax duat duas. Jaod zhod goul nzhet nzhet suk let dol juaf daik jend, nil aob lob caik muas dled nzob ghenl, suk let yuad duax hod gouf khaod muas bongb deuf lol, draox bangt lal juas kuab drous leuf, ghuax zhit deuf shuab, lal uat zhit dout bangt.

Lat Lat shot zhes khaod ndit dleub, daol nzhongd lob shuab baob cangt jangx dlangb lod ndraod.

Zeuf yaob touk nat, ib blas nchik, nil hnaod lob zhod njoux dof nil shot zhes shid ros, hnad zhod juas dol juaf songb rox rol, khaod bok bangt yuad duas ndous lox laos, nil draod uat dout bangt leuf! Zhit daol nil boub yaos uat jangl, ib blas, Langx Langx jat let muab nil nduad deuf hod khaod njoux lol, aob caik del daof ndex gus ndel nil lal zhaot songb raos. Nil chent nyaot sheud lol, dangb shik zhit daol nil sheud dol, zhod del val hlaot lol, muab nil qeb deuf mol haod jik zhangf dleb suk qeb lob qeux deud.

 Eux——Eux—— Langx Langx nyongx deuf lob shuab jat nenb tab dled uat shab nchait ntrut, zhenf nzit goul nyangl bad deuf dol ghoud yuad pux njet mol. Zhit langx geuf boub Langx Langx deut del nzhab lol nat, yaos hef khat hnyangd drout Lat Lat dak: God zhaot gaox ib zox ged jax, god zhit chuad gaox let, ub aob lens boux cuat leuf. Yaos dak gaox zhenf zhit boub dangb, zhenf gangd duax rel god ncod god, god blas nchik jat gaox lob jed maol dangl!

Lat Lat hod shab suk dlaif ad jit, nil boub cuat hend, Langx Langx nyaob lob jaix souk daof ghangb shot zhes zhit dof nil zox shad, muab nil duax hod khaod njoux nduad deuf lol, wef yaos touk ndex nil jeuf dluat Langx Langx zox shad.

Lal yaos caik xongt daof ndex nyaob hod pub uat dluab muas《Hmongb Drongb Dob Hluak》, hnob ndeuf sheud nzod, nil tab Langx Langx mol hod got rongd njis. Tlout ib blangs got zhuas, ib blas, daof ndex hod got zhuas deuf muax ib dol naf loud ghaib zaix ndrous yenl. Wef khaod senb zeuf muax, Langx Langx zeuf duax shab laos uat shangk mol drout daof dol zid loud ghaib. Lat Lat yaos dled jend suf, dreuk nil lob ndrangt nof ib zuf, nil lal nzhat nzhongd dol zid loud ghaib. Daox fangb deb ghok, njis ndos zhit muax rex raol, khaod dus zeux muax dol zid loud ghaib nat nid? Khaod uat nil shab sangd zeud lox yaos, dol zid loud ghaib nat dob bof ib dol zhod zaix ros lox tab ib dol dled hmangt ndos laos tlat duax leuf, hef uat nil nzuax dik ncak ghuax uat ghob ghob ghob ghob, dangb shik zhenf daol drout ndeuf ghob qeut zhit dout zhid mol. Khaod nat zeud tlout, dled jend suf dob boub, zeud tlout caik dout dak muax ghangb hout. Mol ret dol loud ghaib ib nzhik, nil xangb zid nzhus hnat hnat, hnat drous ib bangt nenb fuk ghoub. Nil hod shab jend laos sheud lol, ghuax deuf lob shuab khat bloubwangx wangx,  khat drout Langx Langx zhit dek duaf yif mol dit zid loud ghaib. Bongb shab let yaos, Langx Langx zhit dous nil khaod khat bloub, zhenf tlat mol ndeuf zid loud ghaib. Langx Langx nchait sangd dak yol yaos hout zhax hod dex zhax cot, zhit muax dlangb zhik rongt nchait let; Lal shik nchait yaos Langx Langx touk yout nyaob drout hod zhax cot Uat Yenb Yangf, zhit muax blangb bleud fangx taid ged nchait, lal zheus dex ged boub dangb uat nenx nyaob hod got rongd, uat nax sangd zhit zos zeux muax dlangb zhik ged nchait. Nzhat nzhongd zhos ghuak zid loud ghaib gouf ndout druaf dleb leuf, Lat Lat shout shab sangd zhud yif, tlat mol shout Langx Langx baob dut geuk ib gous, Langx Langx nbout deul nab, hlod ged lol dreuk nil, nil ris mol ris lol muab Langx Langx jaox deuf ndeuf zid loud ghaib ib pangb. Zeuf nyaob touk nat, ib dol dlaik dlob deuf nyaot hod got zhuas lol, nchait yaos chaib tlout leuf jat shab shait ib nzhik ntrad nyaos dout naox, lal shik nchait yaos senb zeuf khaod muas shaib zhit dout dleb zhit bof ndeuf zid loud ghaib ib pangb muax ged nchait, njangx ndraif pux mol drout zid loud ghaib. Zhos hnaod ndraod ib shuabHongx longx, shout luax deb nqot laos ib dud bangt choud, dlaik dlob tab zid loud ghaib dob blox shout bes deb leuf. Lat Lat tab Langx Langx drous hef uat ib dos shaib ib dos, uat duab rongt tlout mol shaib, hod sob zhuas muax lob khaod juab dob ib zhangf ndout, dlaik dlob bongb mol hod leuf, yif huab nchait let yaos, hod ghangb khaod cok dreud ib dol dol hmod xongb muab guab dot bangt zhout dluat, muax aob dol dux hmod xongb qaob bleul dlaik dlob lob blangb, dlaik dlob ghuax uat nzhangx leul, dangb shik zhit dout ghuax zheus shuab zeuf duas uat ndlul nchangd nzhuad. Dol zid loud ghaib it, lal mangs dux mod xongb qaob drous, nbuax dik blongs shad, shout got deut kit dreud hluat mangx uat zhit dout let jangl, ib nzhik yangt zhit dout sheud lol, zhit dout ndit bes zheus, zeuf zaox dlaik dlob dous leuf zox ged zhit draod ghangb.

Khaod das ndeuf nat yaos ib lob khaod juab zhax ghok, zid loud ghaib yaos dol nghaix juab, jaox lol deub rel dex zhax naox nghaix hot laox bongb drout hod khaod duas dob dob!

Yaos dak zhit yaos Lat Lat shid zhud yif muab Langx Langx rel mol luf khaod, huaf nat dol gus bongb drout hod khaod juab duas uat ndlul nchangd nzhuad zhit yaos dlaik dlob zeuf yaos dol zhod Mongf Jat Lat leuf!

Langx Langx drous hef uat nyongx ghenl aob shuab, bongb blis jaol dis jed qeuk ged zhid, zhid draod lol ndeuf pub nenb geut dluab muas dex zhed chot ib pangb, let shot nghel lol uat bangt dol rox rol. Ib blas, Langx Langx mol ndeuf Lat Lat ib pangb, xangb deuf dol zhod nblais nded nded, yaif yaif nil lob houd blax. Ndros pub nenb geut dluab muas nyaob dout 10 ndout hnob, Langx Langx yaos teux ib ras ntuad deuf khaod  hlob chuat drout nil. Lat Lat boub dout, zhod lal yaos jaod zhax ghok shab ngal, Langx Langx yaos uat zhous nil jeuf Langx Langx zox shad.

Zhit muax dlangb zhik rongt nos, Langx Langx shaib drout shout ndot ghob ged hlob chuat, keuk nil ib zox ged jax.

Lat Lat sheud ndeuf vangx zhed ndruab ndrangb, nqok nqok jed, zhod hnad nzaot bongb leuf jik xod bloub, zhod drout nyaob ndeuf nil baob dut tab shout khaod ghub zhuab deuf jid gangb lut nchangd, dangb shik maob zhit hnyangd. Nil boub, Langx Langx khaod nat yaos shed zhit doul nghel del hnyangd, zhit let, dex zhod drout nzhet nzod zeuf muab nil dluat ndluas leuf. Zhid dlif zhod njoux, sangd sheud lol zhenf nchait ntrut. Nil hod shab kongb los, dut buat luas bes deb, zhit gangd draod zangd ret Langx Langx leuf. Zhod nbout deul, zeuf yaos lob nbet duas uat dlangb. Zeuf dak jat Lat Lat naox zhib baok, nchait lal zhit muax dangd nzid draod pux mol shout Langx Langx lob jed deub rel leuf. Langx Langx dob raox dluat nil dled shad, zhit chuad nil dlangb zhik leuf, yaos nil zhas gangd quab lal zhod khaod zouk nchait mol deub rel, yuad zhof yaos yol ntrad shad lot duas zhit yuad caik.

Lat Lat zhit muax dlangb zhit zhud yif uat leuf, nil zhit yaos dlangb zhik dled dlangb, nil lob dlangl ros muax khaod shid dangl. Nil bout hout neux ghuax aob shuab zhuas blil, traik druaf mol drout ndeuf khaod drongx hlout. Nil uat zhit dout let jangl leuf, sex nyaod hod zhod langd zhit muax dlangb zhik ghangb hout, zhit juas nzod nzhik njaif mol.

Kuangt langt!Ib lob shuab kheb drongx hlout ndraod duax. Nil shaib bof, jenk yex Daf Mangf muab khaod drongx hlout drob kheb ib gangb, jot dreud del drout nil. Dangf zhenb yaos dol nenb zhud ndros nil ndruab hnob hmaot ndox uat get, shaib deuf nil dex ged langx, shaib deuf nil uat zhit dout jangl, dreuk jaix deut khat nil chef draod ghangb dak:Lat Lat, draod lol! Lat Lat, draod lol!

 

JUAX

     Duax vangx zhed ndruab ndrangb zos ndeuf drongx hlout, khaod ndout zeuf yaos ghuak 20 mik, bes deb dax lal dlot dlad, ndruab ndrangb zhit muax dlangb zhik taid jat. Dangb shik Lat Lat nongs dreud, suk let mol drout hod bangl hangd ad nded longt, mol ib druaf ged dus dob naox ros hend, mol dout ghenb ghenb tab hnyangd ghenl.

     Khaod nat zhit yaos yol uat yuaf ged, Lat Lat hlob nghent yol. Ndrangt nof zeud tlout leuf, dleb tlout leuf dol dled jend suf lob dlangf ros uat nyaos zos. Dled jend suf ndros nenb ib suk, lal zhit muax dol hout draos dus uat nax ndouk yenx, shub yaos hof ged let. Nil shid dangl ros wef nil bangb jait, dangb shik, shab hax shik hnyangd njeud, muax ib khaod shab zhouk nchik uat zhit deuf bangt.

     Ndot ged 20 ndout mik dleb mol dangl leuf, Lat Lat ib caik deut daof ndex hlangt tlout khaod drongx hlout, doub hout tab jangx dlangb dob xangb deuf mol leuf, jed tab got dud zhenf nyaob drout hod khaod drongx. Nil nzhat ib muas dol nenb zhud, shout Daf Mangf lob plot zhit muax shab guaf shab nyaok, dol nenb zhud boub nil qeut langx, jat nil dis toub ghangb, dol nenb zhud zhit zeux wef khaod bloub nat ntet tab jef nil. Nil uat zhous dol nenb zhud shab dlangd. Dangb shik, shout dol nenb zhud lob plot lal zhit muax khaod luas khaod rongt shab, dol nenb zhud ib nyuas reuf laos bloub muas, gouf njoux bok dout jend jend, raik dreud ib zhot ab khet. Zhax Cot Uat Yenb Yangf jid dol nenb sheud drout ndeuf Daf Mangf daof ghangb, shout plot lal shout bod zhuas shab bong shab. Nil hod shab maob ib rangs. Khaod nil nyaf dluat, zeuf yaos touk nil ndouk yenx draod lol, dol nenb zhud luas uat rongt shab laos, ntuad hlaot aob caik nbangb buas nil, muab lob ghangb buab zhais fux zid ncab kuad cuaf nil lob khaod nzhus.

     Zeuf dak ged shub yaos ndraif zhit tlout let, dangb guas hax shik shub leuf, nil bongb shab dangl ntraot.

     Nyaob hod nil lob nenx uat dled jend suf ndout xongt, zeuf dak dous dluat ndout zheus ged nkouk ged langx, dangb shik shub suk ral nat ib nzhik dob bangb zhit dout draod lol, hax shik yaos teux ib ras.

     Nil got dud duas dut longt, nil shab guas zhouk nchik draod hlangt ib druaf mol daof ndex, caik lob jed dob qeuk deuf drongx hlout, zhos yuad draod hlangt ib nyuas druaf mol daof ndex, dol nenb zhud zeuf zeux kuangt langt  nzhol jend zhod langd lob naf drongx, lob bloub nat zeuf yaos uat nat jat let souk ghangb zhit rongt.

      Zeuf nyaob touk nat, duab blas, daof ghangb hnaod  zhod hlot bangt, nongs dreud suk let nzhangx ghak leul. Nil bok zhit zhuf dis doub hout mol nzhat ib muas, Langx Langx but ndangd lenl drout bes deb, ghangb blangb nbuab dreud dlaif reb Taif Hux nbluat nblend, cuaf uat muax cenx cenf laos, draod uat duab rongt nzhat, yaos Langx Langx cuaf nil lob mis zhangf ndaos, dex guat mis suk guat ncait lot drout shout reb Taif Hux choud lal, duax laos ib zhot ncab zhod mis ghangb nyongl zhal zeud raos. Lat Lat shaib bof dex nat, lob shab jat let tlat jend sheud lol, suk let nyaob hod khaod bongb shab draod bof muax  jat shab duax. Yaos dakyaos dak nil uat nyaos dout dol nyuas zhod, nchait...nchait bangb nyaos dout Langx Langx zhid dlif  hod ged kuk shab deuf lol.

     Touk Lat Lat yout muax dluat ib ndot ged tlout lol langx des hnaod ghangb suk let nat. Ndeuf yaos touk nil khaid nyik bod ib lob hlit, dled jend suf zhed geuf muax ib dol naf dled nbet hot At Lif yos dout beb dol nyuas dled, zhit rongt let yaos, dangs hmaot lol ib gaob naf nangs, beb dol nyuas dled drous sob duat duas leuf. At Lif maob shab zhit doul, ib hnob hnob ghuax nyad, vuf laox vuf les, bof dol dus zeuf sangd dof dol dus, chaob dob zat uat ib dol dled vuf shef jed leuf. Hnob nat, Lat Lat drous dob yos zhax duax ndeuf nil naf buas mol leuf, geut drout hod ib lob deub xongb, dout ib hnob zhit bob khaod drout nil, nil chaib uat deud blangb ngouf dit cangt ndrouk ghouf, nzob zhit doul yuad muab deub xongb juat maol nghaol mol nzheuk blangb. Touk yuad zhouk ndox, dob yos zhax muab nil buas mol ndeuf At Lif ib pangb. Shout At Lif jangx dlangb kit dreud ib zox mid sheut hlout, shout khaod njoux tlaok dreud ib lob deub longx. Nil hnat drous ib bangt mis ghangb, wef zox ged senb zeuf muax mis zeuf yaos naf, nil shub ghox ghenl mol ndeuf At Lif. Sob teux, At Lif langf dout langf dof, yaos zhit jaox lob deub longx, yuad zhof muab nil dof duas leuf, zhenf muab got deut duaf nil, zhit jat nil zangd ret. Nil zeuf dak nchait ntrut, dangb shik nil dob chaib yuad duas, zhit nchait dlangb zhit qeuk mol hod At Lif ghangb blangb, nbuad ngouk zid mis zhangf ndaos. Touk nil nzaik deuf guat mis, At Lif lob shuab nyongx let dis uat shuab nghent rongt shab zix nat dluat leuf, nil chenx leuf At Lif dol dob buas hmaod chuat, At Lif dol maob vuf laox vuf les jat let rongt leuf, draod uat leuf dol dled jend suf rongt zouk.

    Nchait lob zhud yif nat lal jeuf nyaos dout box zhod Langx Langx!

    Dangb shik, dol nat zhit yaos box dled, nil yaos ib dol box zhod. Ib dol box zhod buak zeux jat ib dol dled mol naox nil lob mis nid? Langx Langx dob boub yuaf ged drout nil leuf, dob ndual ndof ndit guas nil zhit dek zangd ret, nchait zhit dout daol nil naox drous zhod mis, Langx Langx zeuf druat hlaot lob njoux lox muab nil nghaol leuf. Shout Langx Langx jangx dlangb zhit dout kit mid sod hlout, shout khaod njoux lal zhit tlaok deub longx, yongx yongx yif zeuf muab nil dof duas. Nchait zeux deuf muax khaod shab rongt drous dangf uat luad lob bleud das das, nchait zeux deuf muax muab yol jed duas ndangt ndrangt nof das das. Buak zhif nyaos wef ib dol zhod mol dous zox ged zouk nchait uat luax nat?

    Dangb shik, ib yangf shab nzhens kaod kaot khuak ceub dreud nil. Nyaob ndeuf ged nchait toub ghangb, nat zhit yaos dled jend suf dol ghoud. Haik drout dled jend suf, zhos yuad muax ib nzhik uat nyaos dout, zeuf yuad zhof shid deuf gouf nbous dlangl ros. Nil uat zhit dad dol nenb zhud lob ndrangt nof muab drout nil, ged zangx muas khaod shub, laif zhit deuf mol, ris raox hod nil lob shab. Nil zhes zhit dout khaod bongb shab gus nzid zhit dout drout hod yol lob nenx uat dled jend suf. Nil yuad jat dol nenb zhud Daf Mangf shout plot touk dus dob muab khaod luas ncit!

      Lat Lat got dud zhangt shab, zhangt dreud doub hout tab houd shab, khaod shab guas ndous ros bout hout ib blas blox nchik leuf, hod shab ntoub laos ib ndus shab guas did deuf sangd drangs sangd tlat. Zeuf nyaob touk dob jend suf Daf Mangf ib caik del lol nghol nil lob goux shout jangx dlangb, ib caik del nbangx geut lob khaod drongx hlout, Lat Lat nzhux hlaot lob dluad, dis hlaot jed mol, suk let ndus juat, yangt nzas mol drout hod bleud vangx zhed leuf.

      Daf Mangf tab nbaox nenb hod Zhax Cot Uat Yenb Yangf nyaob ndeuf ib huaf jenb uat druat muas nchod.

 

GOUF

      Lat Lat yaos drangs uat ghangb dob zhit bof tlat mol let, daol Langx Langx boub, nil dob qeuk dout mol hod Langx Langx ghangb blangb leuf. Touk nil nbuad dout Langx Langx zid mis, Langx Langx lal ib gous dof drous nil jangx dlangb. Touk nat, ndeuf Lat Lat khaod nzhex hnaod muax ib lob shuab ndraod  suk lot jangx dlangb yuad lod, uat drout nil bok bangt yuad duas. Nil hod shab boub dout, nil nat zeuf yaos sangd boud shab, lal lis tlout leuf. Uat zhit dad lal dout nbet, uat ib shab nchait zhenf muax khaod jax. Nil ghok ngouk deud njoux shid ros nzaik mis, Zit-- lob shuab guat zhuas deuf lol ndraod shib shib, guat zhod mis ndlul drout hod nil khaod njoux. Nzaik deuf teux bangt mis leuf, nil hnaod nzhongd, hnad zhod kuab shout nil jangx dlangb, zhaot rox rol khaod shid ros dof, aob caik zhod drout muax ros, lal shot zhes khaod dluat ndox dluat deb.

     Zhod mis nyenf dlangf, daf muax ib zhot ncab nyongl zeud zeud, zhit chuat rongt houk bes zheus, dangb shik Lat Lat hax shik naox uat ghangb laos, hod shab ghangb rib nzas, suk let houk ib jaod guat ghangb. Nil shid zouk ros, nzaik dangl ib caik mis, draod nzaik ib caik...

     Langx Langx zhaot rox rol jaod goul hnad dof Lat Lat jangx dlangb, druat laos lob naf njoux nyongx ghenl uat shuab ncet ncak, nzhat shaib suk let did deuf Lat Lat mol quab zenb, dangb shik lob jed muas ntangd but drout bes deb, jat Lat Lat naox dex zhod mis ghangb chab zouk shab ngouk. Tlout leuf ib tangf, lob shuab zhod ncet ncak ndous nghel lol, Hut hut lot lot…” boub zhit zhenb yaos lob shuab nzhangx maob shab, hax shik yaos lob shuab nzhangx rongt nyaob.

     Lat Lat muab Langx Langx jid lob mis zhangf nzaik dangl ib ras, naox uat zhout blangb langf, zos drout khaod uat ghal.

     Langx Langx dex gangb muas chaib blangb nzhat nzhongd dlaif dangd nyox nchangd lab vaos hod lob dlangb reb ndeuf deut cangx, sheud zhenl hlaot. Lat Lat nzhat nzhongd Langx Langx caik deut lous daol ghangb uat shab jend ndrenl, caik deut lous daof ghangb gus dlait dreud, zhit boub touk dus, dob hloud laos drout bes deb leuf. Langx Langx hloud nblais yaif yaif dlit njoux, traik druaf zangd mol daof dlangb reb, bloub caik zhod deut muax ndex muax ghangb, mol dout dol yenl ghak laos.

     Khaod das das, Langx Langx caik deut lous daof ghangb zhit muax dlangb zhik maob, dob yaos wef hod shab ceud zeuf, let nblangf leuf dol ros dous ged. Huaf nat, hod shab dout leuf ib yangf lol nzid, caik deut lous daof ghangb zeuf draod rongt leuf.

     Ndrout drongx hlout, shuab nbuax del shod shab ndraod sheud lol. Lat Lat dis hout shaib mol, Daf Mangf zhenf uat plot luas ncit nzhat dreud nil, haod jid dol nenb nyaob hod Zhax Cot Uat Yenb Yangf zhenf shid ros nbuax del drout nil.

      Langx Langx hot laox hot laib naox leuf ib naf dlaif dangd nyox nghel mol hod blangb, draod houk leuf ib jaod dlex, xangb xangb hluab uat zouk shab ngouk, lol zos ndeuf Lat Lat ib pangb, hloud deuf dol zhod nblais nded yaif yaif Lat Lat jaod bloub ndrouk ghouf. Ged hmaod ged chuat, nenb dob zeuf muax, zhod lak muax tab. Haik khaod das, Lat Lat zhit nyaf Langx Langx  yaif nux, zhod nblais ncib kuad, deut del lal hnyangd tlout, yaif drout shout jed hax shik muax nzhik maob. Dangb shik nil hax shik uat deuf dol ghoud rongt nyaob, lenl zaik Langx Langx plut hlob. Nil boub dout, zhos muax uat nat, let jat nyaos dout Langx Langx dlif deuf hod zox ged maob shab nblangf dob git juas let nzhib dlangb nbout shuad.

      Nyaob hod rongd nox zens sab, lal kend deuf muax dex bloub ndos ib suk nat. Dol box hmangt nyaob lob jaix bob mis, nyuas hmangt duas leuf, zeux did ndrenl ged duas zouk nchait, ngangs mol hod dex rex raol nenb nyaob, nyas ib dol nyuas maol zhenf naox mis, uat duab rongt bob yos, las hot uat  nyuas nenb hmangt; Box dlaik nyaob lob jaix bob mis, nyuas dlaik duas leuf, zeux did ndrenl ged duas zouk nchait, ngangs mol hod dex rex raol nenb nyaob, nyas ib dol nyuas maol zhenf naox mis, uat duab rongt bob yos, las hot uat  nyuas nenb dlaik; Box lab nyaob lob jaix bob mis, nyuas lab duas leuf, zeux did ndrenl ged duas zouk nchait, ngangs mol hod dex rex raol nenb nyaob, nyas ib dol nyuas maol zhenf naox mis, uat duab rongt bob yos, las hot uat nyuas nenb lab; Box baok nyaob lob jaix bob mis, nyuas baok duas leuf, zeux did ndrenl ged duas zouk nchait, ngangs mol hod dex rex raol nenb nyaob, nyas ib dol nyuas maol zhenf naox mis, uat duab rongt bob yos, las hot uat nyuas nenb baok...

      Muab haik drout dex box zhax nyaob touk jaix bob mis nblangf leuf dol nyuas, buas ib dol nyuas lol yos, zhit dangb dleuk dout dex bloub ndos mil zhangf, zhenf yaos ib zox ged nzid dout nil lob shab, kot nyaos dout lob shab drous shangb hnyangd ndeul ndas rongt sheud lol, draod ghangb dout uat lob rongt nenx.

      Langx Langx draod zat uat dol zhax ntuad zox shab ngas nongs lol nyaob shout Zhax Cot Uat Yenb Yangf tax zid muax nbet jit muas los, zhos yaos muax ib nyik khaod ncod shab, uat jangl dob yuad muax Lat Lat nyaob ndeuf, Langx Langx let kend uat duab rongt ntuad zox. Uat zhit dout let jangl, Langx Langx mol Bat Jit Sit Tangk, lal zhos rongt jat Lat Lat boux dreud. Lat Lat lak suangf yaos zhit yuad zax mol ndox ndrout njis uat shit ib ras, shaib shaib ndox ndrouf dex rangf ruas zeud. Caik xongt tlout leuf, zos touk nyuas zhod lob jaix jaik mil, Lat Lat let njaif Langx Langx draod mol hod pub jend suf xenx jenk leuf.

     

 

 
【 文章作者:熊玉有 文章来源:熊玉有 点击次数:105 文章录入:hmongheu    责任编辑:hmongheu 】 
 
 【发表评论】【加入收藏】【告诉好友】【打印此文】【关闭窗口
 网友评论:(评论内容只代表网友观点,与本站立场无关!)
 
 

 

点击申请点击申请
| 设为首页 | 加入收藏 | 联系站长 | 友情链接 | 版权申明 | 管理登录 | 
云南网警


主办:文山州苗学会
Copyright 2007-2015 © 文山苗族 All Rights Reserved 滇公网安备 53262102000271号

苗山新事:侯 健 七彩苗山:吴德华 苗学研究:李维金 苗山音视:陶志文
苗文空间:张元奇 文学园地:陶兴安 苗山风谣:杨朝山
站长信息:QQ 464402767 邮箱464402767@qq.com 手机 15308766544
 站  长:张 元 奇..技 术:杨 永 平、许 东

信息产业部备案
滇ICP备15005284号