设为首页 加入收藏

用户注册· 联系站长 · · ·

>> 您现在的位置: 文山苗族网 HMONGB BANGX DEUS DEB >> 苗文空间 >> 文章作品 >> 正文
 
 

DOUS GHOB NEND DEUT

文山苗族网 HMONGB BANGX DEUS DEB·[2016-4-21 17:15:12]

云南民族大学 14级苗语班 熊朝兰 Xix Maib Hmaob

 

Dex nax xongt wangf minx nat, lenx lenx dob sangd dout ib lob rongt nenx uat, zhit ceux naox zhit ceux hnangd lal zhit ceux zhaot mid nyuas mol geuf ndeud. Dangb guas zax zhit yaos rongt kud let, jeuf dak ib dol duab nens nghuas kud ghongb longt, kud kud ib xongt lal zhos muax ib nzhik maod naox zhit muax zheus dlaif zax lol shid, muax dex yif nenb uat lob nenx zaof nyif hend.

 Nyaob Raol Hangd Roub muax ib yif duab nens, dol yeus nbet hot uat Chenx, dol box nbet hot uat Maik, touk shik yuad muab jeud houk dangl aob nas zid jeuf faib deuf lol yol nyaob yol, aob nas zid uat nghuas ghak nchak uat nenx, muab yol dex zhax cot dot rongt dex deb plut dlot dlad, nyaob dex huaf dout gus aob nas zid ib zis mol uat shuad ros, ndros dex shuad taob xangb yenb jaos yenb, zuad nyangb vod caik tab jaos caik. Shuad muax dol dlangb zhit dlex nof hot nil aob nas zid nil aob dol dob mol uat.

Aob nas zid nat yos dout ib dol dob tab ib dol ncaik, dol dob nbet hot uat Baod, dol ncaik nbet hot uat Bangx. Chenx shaib nzhongd Baod tab Bangx hlob duax, lob shab sangd langl dak:“Aob dol mid nyuas mangf mangf hlob duax, nchait yol yuad dout ndout kud ib nzhik zax let dout mual chaot chab drout aob mid nyuas tab zhaot nil aob dol mol geuf ndeud, jat yol lob nenx uat rongt sheud lol.”

Zax zhit dangb muab Chenx lob khaod muas bok leuf lal muax Chenx lob shab keud leuf. Huaf Fax Lunx Gongb zheb zos hod Raol Drongb Dlob, hnaod luak haik xof Fax Lunx Gongb zeux jat nenb nbluat nox duax, dangb guas dex duab nens zhos yuad muax ib nzhik hlub hout dob boub dout Fax Lunx Gongb yaos pleuk ghet let, hnaod haik zos Fax Lunx Gongb dob rangf dleb nzhik. Chenx leud luak dex duax nens xof Fax Lunx Gongb, touk jangd uat mak muab dol ghaib lol shik, daof ghangb nat jeuf yad muab mid ncaik Bangx lol hlangb dlex gob. Maik haik uat jangl Chenx dob zhit nongs, zhit doul del, Maik jeuf guas Baod tlat mol hot jaod gud dix duax, jaod gud dix dlat duax zos daof daos zhed jeuf hnaod mid Bangx lob shuab ghuax duas luab, tlat zos hod zhed Bangx aob chait deut dob mangs hlangb drous, dob yaos Maik ndros Chenx quat drous, mid Bangx let drous gob got deut sub, yaos Maik zhit nyaob nchait Mid Bangx yuad drous dlex gob muax hlangb duas.

Jaod gud dix duax zos, gad rens muab Mid Bangx jaox mol zhed kot maob kot. Mid Bangx zox shad nghol dout draod lol lak, jaod gud dix sangd zhud yif yuad muab Chenx lob shab nghol draod lol drout hod lob nenx. Muab dex gud dix ib huaf hot duax kab huef, dex gud dix haik drout Chenx dak:“Yaos dak gaox zhenf sangd xof Fax Lunx Gongb, jeuf zhit jat gaox uat beb yit dlangb khuak, gaox sangd mol uat nenx uat dlangb ndros beb zhit muax dol dlangb zhit bloub ndos. Yaos sangd uat rongt mex lob nenx, nat jeuf zhit bob xof Fax Lunx Gongb, uat duab rongt lol ndros box nas dob shet kud naox kud houk, jaod zax kot mid Bangx beb nbaox gud dix deuf drout gaox.”Jaod gud dix muab Chenx lob shab haik ntuad ncend, Chenx shout shab lol uat nenx.

Dangb shif lob shab sangd muax zax zhit duas, kud ib xongt dangl ib xongt tab dob langx mual ib jed rongt dril chaot drout Baod tab Bangx. Nil shaib nzhongd dex yif jaos caik, zhed zhuangb zhed vual uat sheud nzhel yenl jid lob, muax naf cheb kheb muax mid cheb jaix. Shaib bof dex nat Chenx lob shab sangd nbluat nox zhas draod lab lak.

“Huaf nat caik nghet rongt hend, nchait beb yuad ndros luak dex ib yangf jaos ib nzhik caik, shaib yol lob nenx buak zeux rongt duax.”Chenx haik uat nad drout nil dol box. Maik boub dout yol muab ghob njous haik khuad Chenb dob zhit nongs, haik ndout yol lal zeux mangs ndouk ib denf, nil sangd uat jangl jeuf uat, yol guangd rongt yol beb nas dob lob blangb jeuf dout.

Chenx shaib nzhongd dol zid nyox dlangs ib hnob draos tlout ib hnob, dol nyuas nyox uat jangl naox roub dob nzous kongf, nil jeuf muax dol zid nyox dlangs jangb mol shout gab muas, lob jaix nyongs nat nyox nghet rongt hend, dol nyox muas dout ib wangf ndout dlaif zax, dout mol mual hongx zid, zid tiaox, sod hlout tab wangk drongl changd. Chenx ib dol mol nzhual ndaos deb shuab, nzhual muax zhib muk, nil sangd mol sangd lol:“ib wangf dlaif zax nchait zhit zouk jaos zhib muk, jaos beb muk suangf lak, ib muk jaos hongx zid, aob muk jaos zid tiaox.”Congx nil yuad jaos caik, ib dangs gil sheud nzod nzod hot jaod nas dob sheud lol uat chaik naox, mol nzod nzhik dif drongb hlaik nyangb, hlaik muax gouf dangs gil, hlaik dout gouf nyox cheb. Chenx shaib nzhongd dex dlex nof nat dob nbangx rongt nbangx dad, nil jeuf mol shout gab mual dout beb buak dlait zax ib git let hongx zid lol nzuad, ndros dex duab nens jaos caik mual dout bloub buak ib kongf let zid tiaox. Ral nat yaos Chenx dif ib ras jaos chait.

Muab hongx zid tab zid tiaox jaos dangl zhit dout tlout bes zheus lex, dex caik jeuf duax ndaot lak, dex caik duax cix ghak vaos, shaib bof dex nat, Chenx shaib bof dex zax nyaob hod dex tlat dreud. Dangb guas rongt jaix nyongs zhit nded, daol zos dex nblongx caik hlob dangl deuf duax, jaod erf ninx qix jeuf drous maob dangl, Chenx zhit boub yad duat dol dlangb zhit chuax, jeuf mol mual dout ib nzhik chuax lol duat, duat dangl muax dex khaod nblongx caik suk ngouk hluad deul hleud, dex nblongx gob nyab dangl. Chenx lob shab maob zhit doul dangl, cax mol nos jaod duab nens jaos caik, lauk khat drout nil aob beb zhongd chuax, mual jaod chuax duat dangl beb ras, jaod maob cax mangf mangf rongt leuf.

Ndox zhit hot said, zix Chenx jaos dout caik lol nghet caik ghous rox rol. Daof ghangb nat hongx zid ghet ghous zos aob beb dlaif ib gid, zid tiaox xangt yif jouf dob zhit muax duab nens yuad, erf ninx qix xangt yif dlaif ib git lal zhit muax duax nens yuad. Shaib bof dex nat Chenx lob shab bual dangl, yol muas leuf ib dol zid nyox dlangs lol jaos caik, nchait dol got dud nyox dob muab zhit dout draod lol. Caik nghet ghous shangb leuf ,jat Chenx zhit muax shab lol guangd jaod caik, jat caik nyaob hod deb uat lux uat langf, erf ninx qix lux uat dlangb uat duas, hongx zid dob zit zhit dout zheus nzhat, dex zid tiaox lal drous maob dangl. Chenx dol zid nyox dlangs jeuf uat nad mangs jaod angd fouk dangl, ib zox bloub nyox dob zhit bof dangl.

Zix jaos caik lol, Chenx yit lob nenx uat dout zaof nyif nzuad, muab dol nyuas nyox nzous kongf ghous dlax ghous dlait lol laix deb hait cheb, aob nas zif zhit ib zis mol uat shuad ros, zax dob zhit muax ib dlaif lol shid. Jeuf dak jaos caik muas zhit dout zax, dangb shik Chenx lob shab lal zhit dout duas.

 Deuf bleuk ndox chab, dex duab nens shout khad duax nbleus ndat hod raol, khad rongt muas hend, bloub zhib dlaif zax ib gid. Dex duab nens jaos khad muas dout ib del naf zax. “Ghet caik zhit rongt, ghet khad rongt, dex duax nens jaos khad muas zhit dout chenx buat wangf lal muas dout aob beb wangf, yol nchait yuad dous luak dex ghob nend deut shaib lob nenx buak zeux rongt sheud lol.”Chenx sangd duab yuf hod lob shab. Muax ib hnob Chenx haik drout Maik dak:“god yad mol ndros Nbeul Senb sheb ib cab gid khad lol jaos, luf xongt muas khad mangf muab zax drout nil.”Maik bout hout neux zuad roub nbuak zhit deb Chenx. Nbeul Senb yit khad jaos dout ndout, muab nongb khad zhes zouk hax muas dout zhib wangf dlaif zax.

 Hait dout nongb khad lol, Chenx hot hlaot beb nas dob jeuf mol jaos khad lak, get jaos get vod ghuad mil, ib yit jaos dout beb hnob. Lol dluat nangs muax dex ghongb jaos dangl drout hod deb, dex khad dob zhit dout duax cix dex ndraox jeuf hlob uat cix ghak vaos. Bloub dol duab nens chaob dob hnob hnob dob nyaob hod ndruab deb dlaob ndraox khad, dlaob dangl ib ndaos deb, sob dlaob let deb dex ndraox zhas dlaob nyaos lak. Ndaos khad zhit boub dlaob leuf bes zheus daof ndraox cax zos fouk houd boul khad, fouk dangl zhit dout bes zheus dex ndraox yeuf dlaox nyaos lak. Ib xongk jeuf uat nad dangl lak, dex khad suk dol mid nbuat but duab yuf drout hod angd daol duab nens mol keub. Chenx shaib bof dex nat uat shab shod shaot, dangb guas Chenx sangd zhit zos nghet khad zeux ghous huaf luax, ghous zos xangt yit jox ib git. Chenx hnaod dex nat, uat shab bual dangl, nchait yol kud ib xongt dob zhit zouk boux Nbeul Senb jaod nongb khad. Chenx shab guas zhit rongt, deb dob ngenl mol laix, denf denf dob ib dol duab nens houk uat ghous ghak laik, ndrout rongd hod zhed dob yaos beb nas dob nbangx rongt nbangx dad.

Duab nens zhit boub lob nenx uat jangl uat, dex nenb muax bangx hlub mol ib druaf zhangt khaod muas lol shaib ib njuak, dex nenb zhit muax bangx hlub mak bout hout neux dous dreud luak let ghob nend deut. Luak mol tlout luak lob nenx nbluat nox duax, yol leud dreud luak ghangb nyax zas uat khuad dangl lob nenx dob uat bual dangl.

Ib dol duab nens yaos dak zhit muax rongt bangx hlub lol cif kot yol lob nenx, yol yuad muax ib nzhik bangx hlub lol shaid rongt yol lob nenx yuad mol ib zox get rongt let jangl, zhit xaob shaib luak zox ged mol dout rongt jeuf ghet khaod muas ghak ndit dous luak dex ghob nend deut. 

 
【 文章作者:熊朝兰 文章来源:熊朝兰 点击次数:1505 文章录入:苗族风    责任编辑:苗族风 】 
 
 【发表评论】【加入收藏】【告诉好友】【打印此文】【关闭窗口
 网友评论:(评论内容只代表网友观点,与本站立场无关!)
 
 

 

点击申请点击申请
| 设为首页 | 加入收藏 | 联系站长 | 友情链接 | 版权申明 | 管理登录 | 
云南网警


主办:文山州苗学会
Copyright 2007-2015 © 文山苗族 All Rights Reserved 滇公网安备 53262102000271号

苗山新事:侯 健 七彩苗山:吴德华 苗学研究:李维金 苗山音视:陶志文
苗文空间:张元奇 文学园地:陶兴安 苗山风谣:杨朝山
站长信息:QQ 464402767 邮箱464402767@qq.com 手机 15308766544
 站  长:张 元 奇..技 术:杨 永 平、许 东

信息产业部备案
滇ICP备15005284号