设为首页 加入收藏

用户注册· 联系站长 · · ·

>> 您现在的位置: 文山苗族网 HMONGB BANGX DEUS DEB >> 苗文空间 >> 文章作品 >> 正文
 
 

“Ged Ngoux Ged Ndrous” Bual Juab Yis

文山苗族网 HMONGB BANGX DEUS DEB·[2015-4-13 21:37:00]

 

Zhud Yaob Hmaob

 

“Us us us……gaox uat jangl yuad duas uat zaof nyif luax nat nix Baok!Gaox jat let muab beb zhaot zhes,beb yuad uat jangl nyaob nghel mol ax!Us us us……”Xongt 2014 lob 5 hlit hnob 3,nyaob Bangx Deus Mual Bef deb qeut ndeuf ib lob raol Hmongb,ib dos box Hmongb pux dreud ndeuf nil dol yeus gus duas leuf fuf zas,nyad uat maob shab ntraot, nil get nyad get muab del nbleuf fuf zas,duab nens ib pangb nghol luax dus lak nil zhit zhes. “Box lad ghangb,gaox rongt ngoux hend leuf,nif yuad lol rel god dol yeus,muab god dol yeus haf duas,huaf nat gaox shab nghes lak!”Dol box nyad ib tangf,zhas zheuf ib tangf. Shaib lol zos,nad zhit yaos ib lob mid bloub ndos.Uat let nil yaos ib lob bloub ndos dlangb zhit nid?

Yenx tab Baok yaos aob gud dix cenb cenb,Yenx yaos dix yos,Baok yaos gud yos,buab nyaob uat get drout Bangx Deus Mual Bef deb qeut ndeuf lob raol Hmongb hot uat Raol Chab.Aob dos muax juab muax yis,Yenx dol box hot uat Ncongt,Baok dol box hot uat Zhot.Nyaob beb Hmongb deb qeut,wef zhit muax ged ntrad zax,Yenx tab Baok muax juab muax yis dout ndout xongt,dangb shik uat nenx zhenf bluas.Xongt 2013 lob houd xongt,aob gud dix hnaod haik dak nyaob Mink Dinf muax deb rongt jaos ndongt draox hmangb muas ek dout zax,aob dud dix jeuf shik yof mol yuad dout deb tab muab yob ndongt draox hmangb jaos drout hod.Ndongt draox hmangb jaos dangl,yuad zhib drout xongt let hlob dad tab dout hlaik guat draox muas.Uat ndex touk nat,yuad dout ntrad luf yangf uat ek let muax zax lol bangb ceub lob nenx.Yenx zeux kheb cheb,nil uat nax hlangt draod lol pangb Zhongb Gox dif nat kheb lob cheb yout hait duab nens drout cuat khaod.Baok zhit boub uat dlangb zhit,nil zhos zeux nyaob rod nil blangl deb sub.Rod rod zos lob 12 hlit ndox,Zhot yuad nyaob ndruab hlit,nil jeuf draod mol zhed loul leuf.Uat let nat,touk dex Yenx draod lol pangb Zhongb Gox hait duab nens,muax hnob buad jeuf zhos chuad Baok tab Ncongt nyaob jat nyal rod nyal blangl deb jaos ndongt draox hmangb shik ghuak zhit dleb.Zhot draod lol yos nyuas dangl tab nyaob dout ib lob hlit ndout,nil let draod mol ndros Baok uat get rod deb.Muax ib hmaot naox hmaot dangl,Zhot lol muab Baok lob sod dongx shaib shaib,uat jangl bof hod Baok lob sod dongx muax ib rangx lol shout haik dak: “God duab dos nyaob zhit muax luas,gaox duax ndros god nyaob ib njuat”.Dol shout tab sangt yaos Ncongt.Zhot lob shab ncod raos,nchangd sut let yuad ndlul deuf shout dax hout.Nil jeuf jat let muab Baok tab Ncongt zheuf ndox zheuf deb.Ncongt hnaod Zhot zheuf drous yol,maob shab zhit doul, lak tlat duax zenb ib dol shub yenx.Nongs dreud zheuf maob hend das,Ncongt lak jat let deb dak: “Yaos lak yaos lak,dout dlend zhas uat jangl uat?”Ncongt boub zhit zos,dex lol nat drous Zhot muab sod dongx del geut hod shit.Yenx tab Baok dol box nyangx nyaob ghuak aob dos zhit dleb,hnaod muax bloub ndos uat let nat,dout  duax qenf tab khuab khat haik dak zhit bof zhit langf haik,hod zhed dex bloub ndos rongt let nat mak zhit dek ntet uat nchot ghens luak hnaod jek zhit rongt.Haik dangl,aob lob juab yis rongt nzhas dot ib ndot.

Nyaob nyaob zos drout lob bloub hlit yuad dangl,wef yaos yuad zhaot jaix shot,Yenx zhos draod lol pangb Zhongb Gox nat hait duab nens mol drout ndrangl Hox Keud.Zos Hox Keud,nil jeuf zaik dout Ncongt hot sod dongx duax dak Baok houk chuax duat ndraox,guak nil shait shait draod ghangb.Yenx lol ib hmaot,dangd shot dluat let draod lol zos drout pangb Mink Dinf ndeuf nil buab lob zhed rod ndongt draox hmangb.Shaib hlaot Baok chent nyaot ib dos zhit muax shad ros hlaot,nil uat ib dos hangb nod zhit boub yuad uat jangl,sangd dak yuad sangt shait lol drout pangb dif Zhongb Gox nat let kot dout,dangb shik tlout jaix leuf,zhit muax ngaox nghuaf hlangt dlex,zos hnob ghangb,nil mex let muab Baok jaox dout lol drout pangb dlex dif nat.Wef laof drous hnyangd tlout tab jaix nyongs nded leuf,ndeuf lob mid kut lak uat zhit dout let jangl.Nil buab zhas kheb cheb muab Baok hait zos Jenk Hongx,luak shaib hlaot, luak lak jot jot hout zhit gangd kot.Yenx hnaod haik dluat dak nyaob Bangx Deus Bleud Lax muax ib dos guk kob maob zeux kot houk chuax laof drous,nil buab jeuf kheb cheb ndruab hnob hmaot ndox muab Baok haik zos Bleud Lax,dangb shik,dol guk kot maob dak jaix nyongs hait lex leuf nchait yuad kot zhit dout.Zhit lex,Baok jat let duas drout ndangt ged.Yenx,Ncongt,Zhot buab beb bloub dos zhos rongt muab Baok hait lol hod zhed,bangf sut let rangx ndeud daof houd ndex haik nat.

Uat let hnob gus Baok houk chuax ghangb houd yaos rongt let jangl nid?

Haik zos hnob ndeuf,Yenx mol hait duab nens leuf,chuad Yenx dol box tab baok aob naf zid nyaob hod zhed sub.Ndeuf lob raol ghuak buab zhit dleb,muab ib dos gud dix duax hod Baok zhed ndros Baok houk ib hnob jeud,houk houk yuad zhouk ndox,dol gud dix let mol leuf.Hod zhed zhos chuad Baok tab Zhot leuf sub.Zhit boub wef uat jangl,touk nat Zhot jeuf jat let muab Baok zheuf ndox zheuf deb.Ncongt nyaob ndrangl yol lob zhed hnaod,nil jeuf njet mol shaib yaos uat jangl.Mol zos,nil uat hlob lal dout haik lot buad dak uat jangl yuad zheuf ndox zheuf deb uat let ndeuf.Touk nat,Zhot jeuf dis hlaot draod drout ndeuf Ncongt,haik dak jeuf yaos Ncongt dlend drous nil dol yeus,zhuak bual drous nil lob nenx.Zhit dangb haik,zhenf muab jaod lol gus teux ras geut zhes zhaot lol drout Zhot nongs tab,haik dak gaox dob renf leuf gaox hax zhit dout?Ncongt uat zhit dout let jangl,nil jat let draod ghangb drout ndrangl zhed leuf.Mol zos ndrangl zhed zhit lex,Zhot jeuf ghut dak Baok houk chuax lak,duab nens ib njis tlat duax mangx ndox mangx deb ib hmaot,muab guat yenb tongx cuat yangf couk lak zhit rongt let,hnob ghangb dangd shot dluat Yenx mangf lol zos tab ndros buab muab Baok sangt drout pangb dif Zhongb Gox nat.

Ib zox shad,jeuf uat nat dangl leuf.Zos hnob nat,Baok duas leuf,Ncongt lak dak Ncongt zhit dout dlend Baok,Zhot haik dak dout dlend sub,dangb shik nos zos dak uat let nil bof muax nyaob khaod dus,nil zhos haik zhit deuf lol.Let nat,beb zhit boub dak Baok tab Ncongt aob dol uat naf dix zid yel buak muax ged uat ngoux uat ndrous das,beb zhos boub dak Baok duas leuf das das.Zhit haik uat jangl,lob bloub ndos nat,uat drout beb sangd zos ndout yangf,sut let mangx ntrad zax,buak zhif nyaos muab box nas dob shet zhaot nyaob zal shab ral?Sangd dak luak uat ngoux uat ndrous,zhit muax buad pinx buak langf haik nyaos dout?Nil nat lenx lenx muax sod dongx del,uat naf zid ib dos buak yuad shaib dout ib dos let sod dongx tab dex lol hod sod dongx buak yuad nzhens nyaos dout?Uat ngoux uat ndrous yaos muax das,buak zhif nyaos sangt ib zod shad,laif zhes naf zid dob git uat nenx zaof nyif draod daof ghangb?.....

Gud luas,gaox sang let jangl tab deb let jangl?Uat nenx yuad dout uat duab rongt das!

 

(Touk shout dleuk dluat nbet nenb)

 
【 文章作者:熊玉有 文章来源:熊玉有 点击次数:2472 文章录入:苗族风    责任编辑:苗族风 】 
 
 【发表评论】【加入收藏】【告诉好友】【打印此文】【关闭窗口
 网友评论:(评论内容只代表网友观点,与本站立场无关!)
 
 

 

点击申请点击申请
| 设为首页 | 加入收藏 | 联系站长 | 友情链接 | 版权申明 | 管理登录 | 
云南网警


主办:文山州苗学会
Copyright 2007-2015 © 文山苗族 All Rights Reserved 滇公网安备 53262102000271号

苗山新事:侯 健 七彩苗山:吴德华 苗学研究:李维金 苗山音视:陶志文
苗文空间:张元奇 文学园地:陶兴安 苗山风谣:杨朝山
站长信息:QQ 464402767 邮箱464402767@qq.com 手机 15308766544
 站  长:张 元 奇..技 术:杨 永 平、许 东

信息产业部备案
滇ICP备15005284号