设为首页 加入收藏

用户注册· 联系站长 · · ·

>> 您现在的位置: 文山苗族网 HMONGB BANGX DEUS DEB >> 苗文空间 >> 语文教学 >> 正文
 
 

Ndox Chab

文山苗族网 HMONGB BANGX DEUS DEB·[2015-2-4 1:40:55]

 

Nyaob nyaob sob ntet uat ndox deb nqangt ghenl , zhangt hout shaib laos puat shout ndox , zhos bof dex huab nangs huab juat shik leud shik jouf , suk ngouk dex mid nyuak shik nbob shik yeuk . Zhit nded , dex nangs zeuf ndix ndix ndeux ndeux bongb zhit dot ,ib nzhat zaox ib nzhat ghangb ib haid leud ib haid duax, suk let nchait naox tuax leuf yif naf ndef , jouf jouf let congx pangx daox dif lol zhos pangb drongb nat , draod congx pangb daox nat shait shait let duat pangb dif lob dleuf leuf .

  Sob, hot send lak ndax deb chab buat zhangd yangf , houd angd dex gus nyaob ghangb ndox zhous rens bongb let nongb zid nongb ndongt nongb cuat yangf , lak send nyaod gongk angd xangb hout deuf tuax . Gaox shaib , dol goul ndeuf suk ngouk ib dol mid ncaik khaid nik sheud lol uat dout lob rongt rangf , zangx muas ncak , baot hout nyaot .

  Juat, chuab nzhuab lak daox drongb houd bes dex mid ndongt mid ndraox , ib drongb drongb ib hangt hangt dob hlangd uat nzhuab vaos . Juat sib ib ndus ndus , blongx nzhuab ib hangd hangd, juat sib vux vul cuab tlout, blongx nzhuab lak yaox del yenl, nil buab shik zaik shib nzhib, draod shib sangt shib njaif , juat ib ndus ndus uat ndex , blongx nzhuab ib haid haid yaox del yenl leud ghangb .

  Nangs, ndob lab lak bangx zid dluax , ndluad dleub lak bangx zid ruax , yous dlangx lak dex bangx roub ......Zhit dangb dangb yaos dex bangx nad , ndax deb cuat yangf dob jat nangs nzuad uat chab laos.

Sob, hot send lak ndax deb cab buat zhangd yangf, nil zhit dangb dangb yaos sob ,yaos ndox chab ; Juat, cuab nzhuab leuf daox drongb houd bes dex mid ndongt mid ndraox, nil zhit dangb dangb yaos juat, yaos ndox chab ; Nangs, ndob lab lak bangx zid dluax , ndluad dleub lak bangx zid ruax..... nil zhit dangb dangb yaos nangs, yaos ndox chab. Ndox chab deuf dleus , ndax deb leuk dlaif deud ghob hlod dout lob rangf ruas chab kob. Dangb shik , nil jed rongt rangf nad zhit yaos jaox lol shaib let, luak uat nax haik dak : “ Ib xongk sangd rongt shaib ndox chab , ib hnob yad rongt nyaob sheud nzod ”, ib xongk ndox rens , lob ndox chab juef yaos lob jaix kab teux, duab nens ib shif jeuf suk ib xongk, touk hluak dob hluak ncaik zhenf nyaob yol ib shif let lob jaix kab teuf , ndox chab zhit shid ros jaos ghongb jaos longt uat naox houk , zos hnob ghangb jek zhos muax houk juat sub, duab nens ib shif lak ib yangf , touk hluak zhit drout shab xof zox xof jit geuf bend shif , zos hnob ghangb lak ib yangf let langx uat nenx . Dex hluak dob hluak ncaik , sheud dleuk, yad chenf hluak, uat rongt yol lob jaix  kab teuf , mol rongt yol ib shif .

Chenf zhenf hluak , shid rod das , yol zhit bangb yol hax muax lenx dus zeux lol bangb yol , drout shab uat rongt yol lob nenx , chaob jat touk hluak duef cuat yangf ndlul let ghob njous chenx yol nyaob hnob ghangb ndlul let guat muas .

 
【 文章作者:Ndox Cha… 文章来源:Ndox Chab 点击次数:1430 文章录入:苗族风    责任编辑:苗族风 】 
 
 【发表评论】【加入收藏】【告诉好友】【打印此文】【关闭窗口
 网友评论:(评论内容只代表网友观点,与本站立场无关!)
 
 

 

点击申请点击申请
| 设为首页 | 加入收藏 | 联系站长 | 友情链接 | 版权申明 | 管理登录 | 
云南网警


主办:文山州苗学会
Copyright 2007-2015 © 文山苗族 All Rights Reserved 滇公网安备 53262102000271号

苗山新事:侯 健 七彩苗山:吴德华 苗学研究:李维金 苗山音视:陶志文
苗文空间:张元奇 文学园地:陶兴安 苗山风谣:杨朝山
站长信息:QQ 464402767 邮箱464402767@qq.com 手机 15308766544
 站  长:张 元 奇..技 术:杨 永 平、许 东

信息产业部备案
滇ICP备15005284号